2 Corintios 13

₁Ca' nagui ma'le quenajo, ca' tres sovitalo qamiri. Qam ná'ogue nanchaqaina quena nasauaxaset quiyim qaỹa'xat, ỹouen quiyim ra'qaataxane' caua dos, loqo'm tres qomi'. ₂Qam quená'maq shi'gue 'ue na lasauaxaset, chaqai quená'ogue na liỹaripi, nagui ma' ñaq qoỹoqo'ta ỹim, ca lotqai sopilalec da ỹaqataxac, 'nejem dá'maq shi'ntegue na' co'uaataxanaxaic salequetauguilo qamiri. Ca' nagui saho'te da ra'xaỹaxaguii: quiyim ma' sovitalo qamiri, ca' tot qaica quiyim 'ue quet ca liỹa se'xoren. ₃Ca' yi hua'ñi ma'le, ca' 'yiiñii cá'maq michitaque ma' re'oq quiyim retaqaugui aỹim so Cristo. Qam so Cristo mesqaida quet quiyim qaica quet ca lquesaxanaxa quiyim 'ue ca 'ne'teguelo qamiri. Ta'ta'a quiyim ichoxot da lquesaxanaxa ma' hueetanguilo qamiri. ₄Qam llic ma' so'maxare qaipateno 'ec quiyim qaica ca lquesaxanaxa, qam nachaatetaugui da lquesaxanaxa ñi qota'a. Ca' qomi' qai'neete' salecqau'a dajo quiyim qaica ca qarquesaxanaxa. Qam no'm ña'daqatau'a so'maxare, ca' hueetauguilo qomi' da lquesaxanaxa ñi qota'a, ma' salecqatauguilo qamiri.

₅Ca' chi na'ajñiỹalta' qamiri ma'le, qaiyi 'yiiñii quiyim ỹaatqajam llic 'ue ca rpi'ỹaxaguii. Ñaq ni'guiñiỹalta'. ¿Se retañio' quiyim so Jesucristo hueetauguilo qamiri? Ta'to'o' no'm sqai ỹaatqajam llic coñiguit da na'qaatec. ₆Ca' vichiguiño' 'ue da qanaquitaxac quiyim retañii quiyim mesqai qomi' 'maatqaqa. ₇Chaqai ñqouagaxainqatacot ñi qota'a, qaiyi qamiri sqo 'viichii ca se no'uen. Qam se sahoqotaque quiyim ñachaxanqatac quiyim qomi' ỹaatqajam llic dá'maq sa'xatqatac, qaidaata quiyim qomi' sahoqotaque quiyim 'viichii ca ỹa'maqachiguiñi, 'eno'm 'ec sqai llic cá'maq sa'xataq. ₈Ma' qaica quet cá'maq shinaxague quiyim seloxoỹaxaguit dá'maq lliqueta na'qaatec, ta'ta'a quiyim sotauanaq. ₉Vichiguiño' ñitoonaq quena' qaica ca qarquesaxanaxa, qam qamiri quesaxanaxaqa. Chaqai qolqatalec quiyim ñqouagaxainqatalgoto qamiri, qaiyi vire'to' ma' ralohichiguiñi. ₁₀Shiriñi anajo ilaata ma' saqa' shicpegueto qamiri, qaiyi ma' sovitalo qamiri se souen caqamiri da nquesaxanaxa nañaañim so qara'gaxala', qaiyi nqo'ñishiguim ca llaxataxague' qamiri queda se re'xogui, qam se sahotaque seuagaxata'pe qamiri.

₁₁Qamiri ỹaqaỹa', nagui, ca' qaidaata quiyim no'uen ca qayicyaxaguii. Ỹaatqajam daañiỹaque ca la'maxa da chaalataxac, ỹa'maqachigui nqai'ñii na qavillii, niñiiquishiñitecta' queda ra'maxahi. Ca ñi qota'a chicqo'ot da na'maxa chaqai da ne'xorenataxanaxa hueetauguilo ma'le qamiri. ₁₂Ca 'maxaraic quiyim ma' niquiñiỹata', ca' quiñi 'óna nqo'goq ca liỹa, chaqai ne'xoriñiỹata'. ₁₃Ná'ogue ná'maq mashic icoñiguit da na'qaatec ila' da liquinaxanaxac caqamiri.

₁₄Chaqai coñiguit da lqouagaxa so qara'gaxala' Jesucristo, chaqai da le'xorenataxanaxa ñi qota'a, chaqai quiyim ỹalequetauguilo qamiri so Espíritu Santo. Ajá'a, ca' chaqaida 'neeta dajo.