2 Corintios 12

₁Ỹaatqajam qaica quet cá'maq 'negue ca qom no'm chi na'xateteguelta'. Qam ỹim dá'maq qayauanaxanaxanegue chaqai dá'maq ya'deenaxanaxanegue so qara'gaxala', ca sa'xat. ₂Ỹim seuana so qom huelec so Cristo. Catorce ñaxari ỹovi' nagui quiyim so'maxare qaỹavicshi'ma ca piguim. Qam se sa'den quiyim imaashiguimo' so na'le, loqo'm 'e', qam qaiñiita ñi qota'a maq ỹa'den. ₃Qam sa'den quiyim sojo ỹale qaỹauec, qam quiyim imaashiguim, loqo'm 'e', ca' dajo se sa'den. Qam qaiñiita ñi qota'a maq ỹa'den. ₄Ca so'maxare qaỹauega yí'maq la'a' ná'maq mashic qanca'laxatec queda piguim. Ca co'na' hueeta'quera, ca' 'xaỹalo' saua na'qaatqa se qara'xaỹapegalo, chaqai qaica ca qom qaỹasene'tema quiyim ỹa'xate'. ₅Ỹim seshiteta ñimaqajanlec ca qom 'nejem so'maxare, qam sqai chi ñimaqajantac. Ta'ta'a quiyim ñimaqajan, ma' ỹim qaica cá'maq iquesaxanaxa. ₆Ma' quetqai chaqaỹim seshit quiyim lo'yaxanec ca sa'xatetac, qam chi ña'xateteguelta', ca' dajo mesqai 'ec chaqai hualoxonqaishic, ma' lliqueta quet dá'maq sa'xatetac. Qam sqai shine'tegue dajo, qaiyi qaica ca ỹapacqajnauec dá'maq la'ajnaxanaxac caỹim, loqo'm quecá'maq 'qaachigui ỹa'qaatec.

₇Ỹaatqajam chalego lecaic dajo iuanaxanaxac. Qam qaiyi sqai paguec ca ñimaqajnaxac, ca' qaỹa'ue so iueetaxanaxa mashic 'ec aca le qaỹa'deho quena ỹoshicmaxa na' noviriua' so lo'ueenataxanaxat so na'ỹaapec, ma' ỹahotaque quiyim ya'axat. ₈Ca mashic ỹovi' tres sashiila so qara'gaxala' quiyim naqat sojo iueetaxanaxa. ₉Qam so qara'gaxala' 'naac caỹim: “Da i'xorenataxanaxa mashic viisaxauot, ca' qaica quet cá'maq liỹa viñisaque. Ma' dá'maq iquesaxanaxa re'oq quena' cá'maq qom qaica ca lquesaxanaxa.” Ca' vichiguiño' ñitoon ma' ỹim sqaica ca iquesaxanaxa, qaiyi re'oq caỹim da lquesaxanaxa so Cristo. ₁₀Vichiguiño' ñitoontac quena' qaica ca ỹa'ñaxac, chaqai quena' qayishiuentac, chaqai quena' 'ue da ỹouenaxanaxa, chaqai naua ñocanaxaco, chaqai na i'xoric quenaua ñanaqataxaco, sasouetapigui so Cristo. Ma' quena' paguec qaica ca iquesaxanaxa, ca ñauata'guit quiyim paguec ỹim quesaxanaxaic.

₁₁Ca' ỹim hualoxonaq ma' chi ña'xateteguelta' quedá'maq no'uen shintari', qam qamiri nauá'maq 'viichii quiyim shintari' dajo. Ma' qamiri quet nauá'maq lo'yaxanec cá'maq 'ñiỹac caỹim, ma' sqaica quet cá'maq 'neeta quiyim ỹapacauec quet ná'maq quiita'pegue' qamiri quená'maq 'naac napacalec na lelaatqaipi so Jesús, 'eno'm aỹim qaica ca shinegue. ₁₂Ma' ỹaatqajam 'ue da iualaxavic na' so'ueenataxantac, sentauguilo qamiri. Na'le, ca re'oq na netanqaipi, chaqai na se qaiuanapega, chaqai na ỹo'uet da ne'laxa, ca' chaqaina ná'maq ichoxot quiyim ỹaatqajam llic ỹim lelaatec so Jesús. ₁₃Ma' mesqaida quet quiyim se ñaloqojñiuo quet quená'maq liỹaripi shi'gue icoñiguit da na'qaatec. Qaidaata dá'maq quiyim ỹim qaica ca ñouoretac caqamiri. ¡Qam chi yi'xoriñio' ma'le, ma' shi'ntegue dajo na'le caqamiri!

₁₄Ca' nagui ña'maxatetañi quiyim shicpegueto qamiri. Ca ma'le, ca ỹovi' tres quiyim sovitalo qamiri. Qam se sahotaque quiyim 'ue ca so'taxatetac, ma' sqa shique ná'maq hueeto'oto qamiri, ma' qamiri nauá'maq shicpegueto. Ma' cá'maq neta'a lapoonaxanlec ca llaalqaipi cana lam, mesqai ca llaalqaipi lapoonaxanlec ca leta'a. ₁₅Qam ỹaatqajam sahotaque quiyim somateto aná'maq ñishitetañi, vire'ta quiyim imeho qai'neeta da iquesaxanaxa. Ma' sahotaque quiyim ỹa'maxañi da nachaalataxaguii. Qam 'eco' quiyim paguec da ỹoqo'iichi caqamiri, ca' qamiri paguec se rqo'chiiua'.

₁₆Qam quiyim 'ue ca ỹa'deena'a quiyim qaica ca so'taxatetac caqamiri, ca qai'neeta 'naac quiyim chi ico'ỹaxaric quiyim sahotaque sayine' qamiri. ₁₇¿Loqo'm 'ue ca sayinaxangui na' 'vii caua ỹale' selatalo qamiri? ₁₈Ñi'xoresene'tot so Tito quiyim quepegueto na'le qamiri, chaqai 'ue so liỹa qarqaỹa sela' na'le quiyim liỹaatac nqaishin so'maxare. Ca ¿rayiñiỹo' na'le so Tito? ¿Mesqai qoma'que sa'maxatqa'tegue da shinqatari'? ¿Mesqai llic quiyim dá'ogue da shinqatari' queda qaro'ueenataxanaxac?

₁₉Loqo'm ¿'neetapigui qavillii quiyim ca 'óna qoshiiteguelec ca liỹa coqomi'? Qam mesqaida. Ta'ta'a quiyim dá'maq sa'xatqatac ỹa'deenta ñi qota'a, chaqai quiichigui nqaishinaq da leenaxat so Cristo. Qam qamiri ñauochaxaua' ỹaqaỹa', dá'ogue dajo taỹaugui quiyim nqo'ñishiguim ca llaxataxague' qamiri quena se re'xogui. ₂₀Ma' ỹim 'ue da itelaxa quiyim ma' sovitalo qamiri 'neeto' lotqai sqai 'ñiitari' dá'maq sahotaque quiyim 'ñiitari' quet, chaqai 'neeto' ỹoqa'a ca shintari' ma' huañiua'. Ma' 'ue da ỹoqolonaxa quiyim ñaqai hueetauguilo qamiri quiyim se na'yiiñiỹata', npa'guiñita'ta', 'ohita'ta', na'aavitegueshiguim, la'axaqa lo'o', novirqataxanaxac, maqajnaxac, chaqai sqaica ca 'maqataxac. ₂₁Chaqai 'ue da itelaxa quiyim ma' liỹa sovitalo qamiri, ca' ñi qota'olec ỹo'uet quiyim ñauata'guit ca ỹayiloxo nqai'en caqamiri, chaqai quiyim 'xoic ca ñoỹenlec caqamiri quiyim shi'gom na rasauaxashichii, chaqai saqa' 'xañiñi na napio'xot da chaalataxac, chaqai da dequenaxac, chaqai quiitalec na ramaanaxanaxahi quenanchaqaina.