1 Timoteo 6

₁Quená'maq nelaatqaipi se ishit quiyim se na'xaỹaxana ca na'co', qaiyi qaica ca qaỹa'xat se no'uen queda leenaxat ñi qota'a chaqai quedá'maq sapaxaguinataxanqata'pegue. ₂Chaqai no'm ca nelaatec 'ue ca na'co' quená'maq mashic icoñiguit da na'qaatec, ca' paguec na'xaỹaxane'ta, ma' mashic lqaỹa lpi'ỹaxaua. Lama'xa no'ueenaxat cá'maq 'neetari', ma' cá'maq ro'ueenataxantacot qai'neeta icoñiguit da na'qaatec chaqai mashic nauochaxaua lqaỹa. Ỹaatqajam paxaguinataxañitegue chaqai 'xachi' dajo.

₃Ca no'm 'ue ca rapaxaguinataxanegue cá'maq se leloxoỹaxac chaqai ca'maxare se nachiñiguit dá'maq 'maxaraic napaxaguinataxanaxac chicqo'ot so qara'gaxala' Jesucristo, chaqai quedá'maq qanapaxaguinataxac quedá'maq seuaqlec, ₄ca' cajo qom nemaqajnaxai, qam qaica ca ỹa'den. Vichiguiño' lqo'itaxat quiyim nco'uaataguilo naua na'qaatqa, ma' 'eco' 'ue da ralolaxa. Ca' dajo chaqaida dá'maq chicqaugui da pa'guenaxac, co'uaxac, shiuenaxac, chaqai quiyim tot qoyiuelec ca liỹa, ₅chaqai da napetaxanaxac qaica ca lqodoc. 'Eda da 'neeta na qomyipi quiyim mashic tot ỹalamaq da la'deenataxanaxac chaqai tot ỹa'den dá'maq ỹaatqajam lliqueta, ma' na'maxare 'neetapega quiyim chicqaugui da re'qoochigui nesallaxa quiyim icoñiguit da na'qaatec. Noỹoochirec ma'le quená'maq qom 'neetari' dajo. ₆Llicsa ma' dá'maq leloxoỹaxac dá'maq seuaqlec ỹaatqajam chalego lecaic nesallaxa, qam quecá'maq qom ỹa'den quiyim netoonta'pegue cá'maq hueeto'ot. ₇Ma' qomi' qaica ñi'xatqata na' ñovitaxa na 'laua, ca' 'nejem ma' soqolqa'e ana'maxare lotqai qaica ca se'xataq. ₈Vichiguiño' quiyim 'ue ca qonoq chaqai ca sanaxañi qotooỹac, ca' chaqaica chaqa'ma' ñitoonqata'pegue. ₉Qam cá'maq ỹahotaque quiyim nesallaxanec se nalo'guit dá'maq ne'guenaxac, vire'to' ma' 'eco' lepachigui ma' paguelec na lqo'itaxanqachic quená'maq qaica ca 'negue. Ma' na'maxare na'axat ca qom, chaqai 'eco' iyinñi nqai'en, chaqai ỹovireta'a quiyim na'laxatañi. ₁₀Ma' dá'maq nqo'iichi cana re'qoochigui plata, ca 'eco' lpa'a' ná'ogue ná'maq ỹaleque'ejta' se no'uen. Ma' mashic 'ue ná'maq imelec da lqo'itaxanqachic cana'maxare, ca' ỹaxanñi da lpi'ỹaxac, ca ỹovirau'a quiyim 'xoic na le'xoric quedá'maq chi nachaalataxac.

₁₁Qam qami', ma' mashic qami' lelaatec ñi qota'a, ỹaatqajam 'iichirapeguem ná'ogue na se no'uen. Quiisalco' quiyim na'maxachite' quiyim quirelec ñi qota'a queda npi'ỹaxac, ne'xorenataxanaxa, neualaxavic chaqai da neequesenaxac. ₁₂Na'ñaxachirelec da rpi'ỹaxaqui', lo'qo'ichiriñi dá'maq nca'laxa sqaica lqodoc. Ma' chaqaida dá'maq 'em roỹaxañiraxaua' ñi qota'a, chaqai mashic ime quiyim nachaachiriñi 'xachisac da rpi'ỹaxaqui', chaqai mashic 'xoic ná'maq ỹa'yiinchigui qami'. ₁₃Ca' nagui ỹauanchiguilo qomi' ñi qota'a ñí'maq ỹachigoqto'ot da lca'laxa ná'ogue nanchaqaina, chaqai ñi Jesucristo ma' ñi'maxare qai'neeta ỹa'xat da lpi'ỹaxac na' reloqota'guit so nashi Poncio Pilato. Vichiguiño' nagui selachi' ₁₄quiyim na'xaỹaxañitalo naua ỹaqataxaco, chaqai sqaica ca ỹochira'a, qaiyi qaica ca na'qaataxaqui' se ỹa'maxañi. Chaqai qui'salec dajo, chi ỹovireta'a ca na'xa'a quiyim rapil so qara'gaxala' Jesucristo. ₁₅Qam ma' ỹovita ca laloqo', ca' ñi qota'a ỹachaxan ma'le so'maxare, ma' ñi'maxare qaiñiita, hueeto'ot da na'maxa, chaqai da nquesaxanaxa. Ñi'maxare lashi na nashillipi chaqai la'gaxala' na na'gaxalateripi. ₁₆Ñi'maxare ñí'maq qaiñiita se ileu, chaqai hueetaugui na lauaq hueeta'ñi yí'maq qaica ca ishit nqo'neu'a. Qaica ca qom ishit iuana. Sapacqajanqauec ñi'maxare quiyim semaqachinaq quedá'maq lquesaxanaxa sqaica lqodoc. Ajá'a, ca' chaqaida 'neeta dajo.

₁₇Chaqai ná'maq mashic ỹovita quiyim mashic nesallaxanec, ca' 'ñirapega quiyim se nemaqajnaxai, chaqai sqai hueetagui nqai'en ca naquitaxac da lesallaxa, ma' da'maxare sqai 'neetari'. Ta'ta'a quiyim illo'ot da naquitaxac ñi qota'a, ma' nca'leetauec ñi'maxare, chaqai ỹaanema qomi' ná'ogue ná'maq qarouenec, qam ỹapacauec nqai'en, ca lotqai ñitoonqata'pegue. ₁₈'Ñirapega na'maxare quiyim ỹo'uet cá'maq no'uen, qaiyi 'ec lesallaxa da'maxare quiyim ỹo'uet cá'maq ỹa'maqachiguiñi. Chaqai qaica ca huapigui lauel, ta'ta'a quiyim 'ue ca ỹaan lotaanaxanaxat. ₁₉Qaiyi dajo nesallaxa se re'xogui ishit quiyim 'ue ca quitaxac quecá'maq ñaqa naataho, chaqai quiyim laueguec ca nca'laxa sqaica lqodoc.

₂₀Qami' Timoteo, ỹaatqajam cochi'to' ma'le dá'maq qaipataqairaxalec lo'ueenataxanaxac ñi qota'a. Chaqai se na'xaỹaxañita na chi na'qaataxanaxac huelec najo ma' qaica ca 'negue, chaqai da npa'guenaxanaxac chicqaugui dá'maq qohintapega na'deenaxanaxa, qam mesqaida. ₂₁Ma' mashic 'uo' na que'uegue dajo na'deenec, ca' ỹit da lpi'ỹaxac.

Ca' ñi qota'a ỹaanem qami' da no'uen qayicyaxaqui'. Ajá'a, ca' chaqaida 'neeta dajo.