Dá'maq 'neeta da lquelolaxa ca na'gaxala' quená'maq mashic icoñiguit da na'qaatec
1Mesqai chaqa'ma' taqaira'a ca qo'xoic, ta'ta'a quiyim qaichireta quecá'maq qohinapega qohinta'gue cá'maq ỹaatqajam neta'a. Chaqai ná'maq ne'naqaipi, ca qohinta'gue ca ỹaatqajam nqaỹa. 2Chaqai aná'maq qo'xoi 'ñiisa'gue acá'maq ỹaatqajam qachii'i', chaqai aná'maq nequetegaxai 'ñiisa'gue aca rqaỹa'e', qaiyi qaica ca na'qaataxaqui' se no'uen.
3Otauañi' aca pa'ỹe acá'maq ỹaatqajam 'ue ca louenaxanaxa. 4Qam no'm aca pa'ỹe 'ue ca llaalec loqo'm laual, ca' caua'maxare ỹa'auaxane' idaandelec da chi no'ueenataxague', chaqai quiyim ỹotauane' ca chi lauote' le'ec, ỹo'leenta'a dá'maq notauanaxac quecaua leta'al, ma' dá'maq dajo dá'maq ỹaatqajam no'uen chaqai nqo'ta ñi qota'a. 5Ca aná'maq ỹaatqajam 'chichiguiñi pa'ỹe, quiyim ma' nodaachiguiñi, ca illo'ot ñi qota'a da naquitaxac, chaqai sqai ỹaxanñi da nqouagaxainaxac quenaua'que naua na'xata' chaqai naua piri. 6Qam aca pa'ỹe quelec quiyim se netelalta', 'nesa ma' ñaq nca'leetauec, qam mashic 'eco' shi'gue ileu. 7Vichiguiño' laataxañirelec qai'neeta da sa'xatetac, qaiyi qaca aca pa'ỹe 'ue ca na'qaataxac se ỹa'maxañi. 8Ma' ca qom quiyim se idaanlec cá'maq chi lauo' laseripi chaqai paguec quená'maq lalamaxaret llaalqaipi, ca' ỹit dá'maq ỹaatqajam npi'ỹaxac. Ca dá'maq 'neetari' paguec la'aaxa quecá'maq saqa' icoñiguit da na'qaatec.
9Ca cá'maq lomalate quiyim qoỹiriñi ana pa'ỹe, qanaata aná'maq napacalgoto caua sesenta ñaxari, chaqai quiyim 'oonoqui'o' cá'maq loua. 10Chaqai ỹaatqajam qaỹa'deenta quiyim ỹo'ueetetac ca ỹa'maqachiguiñi. Ca' 'eda dá'maq 'neetari' quet aca'maxare: quiyim ỹaatqajam idaanlec ca llaalquenaxanaxac, chaqai quelola ca namaqategueri', chaqai qaica ca huapigui lauel quiyim idaañiguit na lqaỹaripi quená'maq mashic icoñiguit da na'qaatec, loqo'm ỹotauan ca se ỹa'maxagui lauel, loqo'm canchaqaica liỹa lo'ueenataxanaxac ỹa'maqachiguiñi.
11Qam sqa lecqajñiuo caca lomalate ana pa'ỹe aná'maq saqa' ỹovite' caua niñaxari. Ma' quena' que'uegue dá'maq chi lqo'itaxanqachic, ca totqai quelec so Cristo, ma' ỹahotaque quiyim liỹa 'on. 12Ca' 'ue da lasauaxaset, ma' tot ipac quiyim quelec so Cristo. 13Vireta'a quiyim queetaguilo naua 'imqa, ca ỹovireta'a quiyim hualai. Chaqai mesqaidaata quiyim hualai, qam qai'neeta la'axaqa lo'o', chaqai nishitaxai, chaqai ỹa'xateta'pe nauá'maq tot ỹa'machiñi. 14Vichiguiño' sahotaque quiyim caná'maq pa'ỹe saqa' qo'oq, ca 'maxaraic quiyim 'on, ỹa'vii caua llaalqa, chaqai idaanlec ca la'a', qaiyi qaica lligo ca npa'guenaxaua quiyim 'ue ca inaqateguelec se ỹa'maxañi. 15Ma' mashic 'ue ana pa'ỹe mashic totqai quelec so Cristo, ta'ta'a quiyim queeta'pegue' so na'ỹaapec.
16No'm 'ue cá'maq mashic icoñiguit da na'qaatec ỹale loqo'm 'aalo quiyim 'ue aca lauo' lase pa'ỹe, ca 'maxaraic quiyim ỹotauan, qaiyi mesqai qanesallaxaren'e' quená'ogue ná'maq mashic icoñiguit da na'qaatec, qaiyi na'maxare ỹotauan acá'maq pa'ỹe quiyim ỹaatqajam qaica ca liỹa pi'ỹa'gue.
17Ná'maq na'gaxalateripi quiyim ỹa'den da lcochaxac quená'maq mashic icoñiguit da na'qaatec, ca'maxare ỹaatqajam qaỹauotegue chaqai qaỹotauan, pagueco' no'm quelec quiyim ỹa'xate' naua la'qaatqa ñi qota'a chaqai rapaxaguinataxanguelo. 18Ma' naua naneresañi la'qaatqa ñi qota'a 'nerac: “Mesqai qaỹa'ue lemicse' ca no'ueenataxanaxaqui ñii'lola quena' co'uelec nqohin na trigo quiyim qanaqat ana ala.” Qai'neeta 'naac: “Ỹa'maqachiguiñi quiyim qaỹa'ue aca nishiuete cá'maq ro'ueenataxantac.”
19Se na'xaỹaxañita cá'maq chi npa'guenaxac ca la'gaxala' ná'maq mashic icoñiguit da na'qaatec, ta'ta'a no'm 'vii caua dos loqo'm tres caua ra'qaataxane'. 20Qam cá'maq queetalec sqai ỹaxanñi da leualoxonqaishic, ca' ca'maxare ỹaatqajam taqaira'a, 'qaatac nqai'ñi' ná'ogue na liỹaripi, qaiyi ỹa'den no'chi. 21Dá'maq ỹaqataxac saanem qami' nagui ỹaatqajam ỹauanchiguilo qomi' ñi qota'a chaqai so qara'gaxala' Jesucristo chaqai ná'maq nca'acseripi chicqashiguim lelaatqaipi ñi qota'a. Ca ỹaatqajam daañiterelco' ma'le da ỹaqataxac, mesqaica ca repagaxachi' chaqai ca rca'acshiqui'. 22Mesqai chaqa'ma' coñira'a cá'maq viraque la'gaxala' ná'maq mashic icoñiguit da na'qaatec, 'neeto' lliquirau'a ca lasauaxaset ca liỹa. Ỹaatqajam richilliralta' quená'ogue na se ỹa'maxañi.
23Ma' chaqai 'neetari' quen quiyim vichisapigui na qavilli', ca' nagui, ca se nodaqajanchiriñi na huaxaỹaq ni'chiisapigui, vito' ca ni'chirigui quena lataxa, qam sqai 'xoic.
24Ma' mashic 'ue na re'oq na leualoxonqaishic quiyim saqa' ỹovita quiyim qaimit, qam 'ue ná'maq saqa' re'oq da leualoxonqaishic, toco' ma' ime qaimit. 25Qaican ỹapaguec quená'maq ỹa'maqachiguiñi no'ueenataxanaxac chaqa'ma' re'qoota. Ca' 'eno'm 'ue na saqa' re'oq, qam se ishit quiyim chaqai 'neetari' se re'oq.
