Da lo'ueenaxanaxac aso Ana
1Ca' da nqouagaxainaxac aso Ana 'neetasa':
Qami' ỹa'gaxala', somato'ot qami' añi i'taxanata queda ñitoonaxac,
ma' qami' vite da dalaxaic ña'ñaaqataxac.
Ca' ỹim nagui seshit setaxaỹa na ñpa'guenaxauaripi,
ma' qami' yotauañi'.
Ca' ¡ỹim nagui 'ue da iuagaxa!
2¡Qaica ca co'teeta 'nejem qami' ỹa'gaxala'!
¡Qaica ca quepaqataxanlec ca qom, 'nejem qami', qami' qota'olec coqomi'!
¡Qaica ca liỹa, chi qaqamite'!
3Qaica ca nemaqajan quiyim retaqa,
qaica ma' napacqajan quet ca qom,
ma' ñi qara'gaxala' chaqaiñi ñí'maq qota'olec ñí'maq ỹa'den ná'ogue,
chaqai ñi'maxare naloqochin chaqai imit cá'maq ỹo'uet ca qom.
4Ñi'maxare ishit ỹaqaicchigui aca lo'xoso na 'ñaaxaiquipi,
chaqai ỹa'ue da lquesaxanaxa ná'maq qaica ca lquesaxanaxa;
5ná'maq 'au qaica na'le ca ỹouentaque,
qam nagui ro'ueenataxanteguelec ca loq;
qam ná'maq 'ue na'le na lqopaaxa, qam nagui, ca' qaica ca ỹouentaque.
Chaqai aná'maq 'aalo qaica quen ca llaalec, qam siete co'o nqai'en;
qam aná'maq 'xoic na'le na llaalqaipi, ca' nagui ỹaatqajam 'ec ỹaso nqai'en.
6Ñi qara'gaxala' ishit rouootaxana'gue da chaalataxac chaqai ishit ỹa'ue;
ñi'maxare ỹo'uet quiyim qareleu,
chaqai ñi'maxare ishit quiyim qarca'laxatec.
7Ñi qara'gaxala' ishit quiyim 'xoraiqa nqai'ne' qomi', loqo'm nesallaxanqa;
ñi'maxare ỹo'uet quiyim seuqañi, chaqai ne'laxachishiguim nqai'ne' qomi'.
8Ca' ñi qota'olec ne'laxashiguim nqai'en quena 'laua ca 'xoraic,
chaqai ỹachigoxochichicñigui na lete loma' ca shiilaxanaxaic;
ca' nqa'xanaxañigui na nashillipi,
chaqai illa'ñi ca 'xoic lemaqachic noma';
ma' ñi qara'gaxala' ỹaatqajam looỹac na lomala' na 'laua,
ime, ca' illaalec ná'ogue nanchaqaina.
9Ñi'maxare cochiỹalo caua lqauaxaqui' cá'maq qamaxaraic quiñi'maxare,
qam na hualoxonyipi ileuaugui nqai'en na napalaxa,
ma' qaica quet cá'maq doxonaxan chicqochigui cá'maq chi lquesaxanaxa.
10Ñi qara'gaxala' lahiletajlec nqai'en na npa'guenaxauaripi,
chicqo'ot nqai'en na piguim aca soxonaxa, ca nouaxañi'ña nqai'en na'maxare.
Ñi qara'gaxala' imit ma'le ná'ogue na hueetalec na 'laua;
ca' ỹaanem ca lquesaxanaxa cá'maq lca'acsec quiyim nashi,
ca nqo'naxatec da lquesaxanaxa.
11Ca co'na' ime dá'ogue dajo, ca' so Elcana pila ca la'a' quiyi Ramá. Qam so noctoqui' no'ueenañi, ca ro'ueenataxanot ñi qara'gaxala', qam hueeto'oto naua lelaataxanaxaco so netaxaỹaxanqajnec Elí.
Saua llaalqa so Elí ỹo'ueetesac da se no'uen
12Ca' saua llaalqa so Elí ỹaatqajam hualoxona', qaica ca ỹahoraque ñi qara'gaxala', 13vire'ta da lo'ueenataxanaxague' quiyim netaxaỹaxanqajanqa quena' idaanchiguit na qomyipi. Ma' co'quena' 'ue ca ỹaano ca lachitaxanataxanaxat quiyim ỹavigaxat, ca' ỹaanot ñi qara'gaxala', ca' 'ue ñi lelaategue' lo'qoota'a la'daxanqate, ca co'quena' ñaq qaratoxotetac na la'at, 14ca ỹa'yi'ñigui aca neuoshaxaqui, ca ná'ogue ná'maq la'deguesec, ca' taỹoto nqai'ne' saua netaxaỹaxanqajanqa. Ca' chaqaida 'neesa'gue quená'ogue na Israel llaalqaipi ná'maq ỹoviretapegueu'a yi Silo. 15Chaqai co'quena' saqa' qaỹavigaxat ana lo'ỹo caso ncopatoxonaxalate, ca novi'o' quen na lelaategue' saua netaxaỹaxanqajanqa, ca' 'naapega cá'maq ỹahotaque ỹaano ca lachitaxanataxanaxat quiyim ỹavigaxat:
—Nañaañi' cá'maq la'at taỹoto yauá'maq netaxaỹaxanqajanqa, qaiyi sco'i, ma' ñaua'maxare se ỹaconchiguit ma'le ca la'at no'm mashic ratooxoic, ta'ta'a quiyim ñaqai toquichigui.
16Chaqai no'm ca qom 'naac:
—Qam 'au savigaxataq ana lo'ỹo, ca' ma' ime, ca' 'viiquiñi'sac cá'maq coñira'a.
Ca ná'maq lelaategue' 'naaco' quen:
—¡'E', nagui nañaañirim! Noma'chi', ca' souootaxana'gue.
17Ca' chaqaida 'neeta, ca' da lasauaxaset na ne'naqaipi quiñi qara'gaxala' ỹaatqajam chalego lecaic, ma' se ỹa'maxata'gue aná'maq nachitaxanataxanqate lalamaxarete ñi qara'gaxala'.
18Qam so noctoqui' Samuel queetalec ỹo'ueetetac na lo'ueenataxanaxaquipi ñi qara'gaxala' ỹansañi saua loho lo'ueenataxanaxaqui' chicqoraugui na lino. 19Chaqai co'quena' ỹovirec yi ñaaxa, co'quena' aso late'e quepegue' añi no'ueenaxanaxaqui, liỹaatac so loua, quiyim ỹaando ca lachitaxanataxanaxate' quiyim qaỹavigaxat quena' ỹovirec yi ñaaxa, chaqai qanachaaho qai'neeta aca lachiima qaỹauaaque lo'ueenataxanaxaqui' quiñi no'ueenaxanaxaqui. 20Ca' so Elí ỹaanem da lqouagaxa so Elcana chaqai aso Ana, 'naacsa':
—Ñi qara'gaxala' ỹaanem qami' ma'le ca liỹa llaalqaipi dajo 'aalo, laseue' nqai'en da llaalec ỹaanot ñi'maxare quiyim ro'ueenataxanot.
Ca co'na' ime dajo, ca' saua'maxare pile' queca la'aate'. 21Ca' ñi qara'gaxala' ỹaanem da lqouagaxa aso Ana. Ca na'le, ca 'man. Ca' chaqaida, ca' aso Ana 'vii saua liỹa' tres llaalqa chaqai dos saua llaale. Ca so noctoqui' noquiiquetashiguim quiyim neeto'ot ñi qara'gaxala'.
22Ca' so Elí mashic qo'xoỹom, qam so'maxare ỹa'deentari' ná'ogue ná'maq ỹo'ueetesac saua llaalqa quena Israel laseripi, chaqai saua'maxare vire'ta quiyim lapaasapi'ñi' na 'aallipi reloqota'a ñi lasom ñi na'daañi 'imec quiyim qoyicpegue' ñi qota'olec. 23Co'na'le, ca 'naaco' quesaua llaalqa:
—Ná'ogue na qomyipi ra'xachitac quená'maq se no'uen 'viichitac. ¿Chi'neco' 'ñiitari'o' dajo qamiri? 24'E', qamiri ỹaalqolqa, ỹaatqajam qaica ca la'maxa ná'maq sa'den na'xatetapigui na qomyipi caqamiri. 25Qamiri 'yiiñita quiyim no'm 'ue ca qom nasauaxate'e' ca liỹa, ca' ñi qara'gaxala' 'ue ca qoshiilec. Qam ca qom quiyim chaqaiñi ñi qota'olec hueeto'ot ca lasauaxaset, ca ¿negue' cá'maq qoshiilec ca'maxare?
Qam saua'maxare se na'xaỹaxanta dá'maq 'naac so leta'a, ma' ñi qara'gaxala' chaqai 'negue, ma' ỹahotaque naqat da nachaalataxague' saua'maxare.
26Qam so Samuel mashic ne'nec, noquiiquetashiguim da llaaxa. Ca' da no'ueenataxac so'maxare ỹaatqajam nqo'ta ñi qara'gaxala' chaqai na qomyipi.
(2.27-36 Qaỹa'xateta'guit da 'neeta ma'le so llaalqaipi so Elí.)
