Ñi qota'olec ỹa'ue so llaalec aso Ana
1'Uo' so ỹale leenaxat Elcana, so'maxare na'ñi yi Ramá, yi'maxare huaugui yi quemaralec qa' ladocaipi quiyi Efraín. So'maxare leta'a so Jeroham, chaqai lapi' so Eliú só'maq llaalec so Tohu chaqai so Zuf, saua'maxare chicqoraugui so llaalqaipi so Efraín. 2So Elcana dos saua loua'. So 'óna leenaxat Ana, chaqai aso liỹa Penina. Aso Penina 'vio' saua llaalqa, qam aso Ana, ca' qaica ca llaalec. 3Ca naua'que naua ñaxari so Elcana inoxonec quiyi la'a', ca quepegue' yi Silo quiyim nqouagaxaintac chaqai ỹo'ueetetac ana lachitaxanataxanqate ỹavigaxatetac, ca' ỹaanot ñi qara'gaxala' ñí'maq qaica ca lqalanec. Yi'maxare neesa'ñi saua Ofni chaqai so Finees, llaalqa so netaxaỹaxanqajnec quiyim qaretaxaỹa'pegue' ñi qota'olec, leenaxat Elí. Saua'maxare qai'neeta netaxaỹaxanqajanqa.
4Ca co'quena' so Elcana ỹo'uet so lachitaxanataxanaxat, ca' ỹavigaxat quiyim ỹaanot ñi qota'olec, ca ỹaanem na lachitaxanataxanaxat aso Penina chaqai sá'ogue so llaalqaipi ỹalliripi chaqai so 'aallipi. 5Qam aso Ana paguec loyac na ỹaanem, ma' paguec lqo'itqate, 'eno'm ñi qara'gaxala' se co'o nqai'en aso'maxare. 6Ca' vichiguiño' aso Penina, ma' lasaxaua, ỹaatqajam se ỹala'gue i'neetac, chi ỹahotaque da layiloxo aso'maxare, ma' ñi qara'gaxala' se co'o nqai'en aso'maxare.
7Ca quena' ỹovirec yi ñaaxa, co'quena' que' querepegue' saua'maxare añi no'ueenaxanaxaqui quiyim qanqouagaxainot ñi qara'gaxala', ca' aso Penina ỹaatqajam se ỹaqamaxat aso liỹa. Ca noỹentaco' quen aso Ana chaqai se que'e. 8Ca só'maq loua Elcana 'naaco' quen:
—Ana, ¿chi'negue ma' noỹiñi'sac? ¿Chi'negue ma' chicoite' chaqai se qui'i'? ¿Mashic 'eco' se sapacauec quetqai 'vii caua diez qachaalaxahi'?
9Ca 'uo' so na'xa'a co'na' hueeta'ñi yi Silo, ca' aso Ana co'na' ỹomat ca lqui'ỹaxac, ca ne'laxashiguim. Ca' so netaxaỹaxanqajnec Elí nqa'xantañi, neeta'ñi yi lahi ñi lasom añi no'ueenaxanaxaqui quena' qanqouagaxainot ñi qara'gaxala'. 10Ca' aso Ana noỹentac, ỹaatqajam chalego lecaic da le'xoric, ca nqouagaxaintacot ñi qara'gaxala'. 11Ca' ỹaanot da la'qaatec, 'naaco':
—Qami' ỹa'gaxala', ma' qaica ca qalañirac: Ma' 'ajñisac da chalego le'xoric najo relaata'e', ca' o'lliinchira'a aỹim, ca 'viichi' ca ỹaalec. Ca ma'le, ca saanot qami' dá'ogue da nachaalataxac ca'maxare quiyim ro'ueenataxanot qami'. Ca dá'maq netanec ma'le ca'maxare quiyim saanot qami', ca' se qanepetec na lqahic laue.
12Ca' aso Ana shi'gom nqouagaxaintacot ñi qara'gaxala', ca' qara'iichigui na lap queso Elí. 13Qam ma' so'maxare pa'xantaho da nqouagaxainaxac, ca' se qara'xaỹa ca ỹa'xatetac, ma' chi idaxanta'pe naua lapi'. Ca' so Elí 'neetapego' quiñiuguetaxai aso'maxare. 14Ca 'naaco' caso'maxare:
—¿Chi' laquio' remi'rec queda rquiñiuquichi'i'? ¡Liyi, 'xañiriñi na lataxa!
15Ca' aso Ana 'naaco' queso'maxare:
—Qami' ỹa'gaxala', mesqaida dajo, ma' sqaica ñi'chigui lataxa. Ta'ta'a quiyim chalego da i'xoric. Vichiguiño' dá'ogue somato'ot sa'xatetapeguem ñi qara'gaxala'. 16'Neeto' quiyim 'neetapigui qavilli' quiyim aỹim 'aalo mogola. Ma' ỹim ñqouagaxaintacot ñi qara'gaxala' naua'que naua na'xata', ma' 'xoic da shinta chaqai da nqui'ic.
17Ca' so Elí 'naaco':
—Mo'e', riỹa'iterec da ra'maxa'e', ca' ñi qota'olec quena Israel llaalqaipi ỹaanem qami' cá'maq shiilaxañisaque.
18—Ỹaatqajam 'xoic ña'aachic —'naaco' aso'maxare.
Ca co'na' ime, ca' aso Ana pilegue cá'maq chicqa'gue, ca' que'e, ca' tot qaica ma' liỹa quet rachicota. 19Ca' queso liỹa nete'e, ca' no'teesashiguim. Ca co'na' ime nqouagaxainsacot ñi qara'gaxala', ca' pile' queca la'aate' quiyi Ramá. Co'na' ime, ca' so Elcana lot lapa'ñi' aso loua Ana, ca' ñi qara'gaxala' no'uenta'gue dá'maq lashiilaxanaxac aso'maxare. 20Ca co'na'le, ca 'man aso Ana. Ca co'na' ỹovirec ca laloqo', ca ne'qaaño' so llaalec. Ca ỹanco' leenaxat Samuel (loqo'm nashiilaxanaxat), ma' lashiilaxanaxato' na'le quiñi qara'gaxala'.
21Ca co'na' ime dajo, ca' so Elcana eec, liỹaatac sá'ogue so llaalqaipi, taigue da Silo, ma' ỹahotaque quiyim ipacqajanchigui da la'qaatec quiyim ỹaanot ñi qara'gaxala' aca lachitaxanataxanqate ỹavigaxat quiyim ỹovire'oga ca laloqo' quiyi ñaaxa. 22Qam aso Ana sqai eec, ma' 'naaco' queso loua:
—Shico' ma' chaqai qague'oga ñi noctoqui' queda lillipaxac. Ca ma'le, ca' se'xat, ma' sahotaque saanot ñi qara'gaxala'. Ca chaqa'ma' ño'ueenaqtañi quiyim chaqaiyi neeta'ñi.
23Ca só'maq loua Elcana 'naaco':
—Hua', 'viichi' cá'maq paguec 'maxaraic nqai'ñi'. Ro'viiñirañi, toco' ma' ỹaxanñi da lillipaxac na noctoqui'. Ca' ñi qara'gaxala' ipaquichigui nqai'en da la'qaatec.
Ca' aso'maxare no'ueenañi, iỹaxat so llaalec, chi ỹovireta'a quiyim ỹaxanñi da lillipaxac. 24Ca co'na' ỹaxanñi da lillipaxac co'na' ñaqai cocho'qui', ca ỹauegueu'a añi no'ueenaxanaxaqui quiñi qara'gaxala' na'ñi yi Silo. Qai'neeta ỹauegue' saua tres huaqui llaalqa, chaqai veintidos kilo so trigo, chaqai aso 'óna loshicmaxa no'qaachigui quena lataxa. 25Ca ỹavigaxat quiyim ỹaano so 'óna huaqui llaalec, ca' qoỹaano so noctoqui' queso Elí quiyim chaqa'ma' no'ot. 26Ca' aso Ana 'naaco' queso'maxare:
—Chi yi'xoriñisaco' qami' ỹa'gaxala', ma' ỹaatqajam rca'lli'sauec nagui, ma' chaqaỹim ná'maq seuete'e najo na'le, ñqouagaxaintacot ñi qara'gaxala' qota'olec, ca' qami' leseeque'ta na'le. 27Ma' ỹim na'le sashiilatac ñi qara'gaxala' quiyim ỹa'ue najo ỹaalec, ca ñi'maxare ỹa'ue. 28Ca' ỹim nagui saanot ñi qara'gaxala', ca' chi ỹovireta'a ca lqodoc aca lqauaxaqui.
Ca' so Elí ỹa'dooto naua le'cootal ñi qara'gaxala', ỹoviraxata'guit na 'laua na latap quiyim nqouagaxainot.
