1 Samuel 11

₁Ca' so Nahas só'maq lashi so Amón llaalqaipi quepegue' yi na'a' Jabes huaugui yi 'laua Galaad. Ca na'maxajñi nqai'en so nalliripi, ma' ỹahotaque nalauate'e' yi'maxare. Qam so na'ñi yi Jabes 'naaco' queso'maxare:

—'Maxaraic quiyim 'ue ca qana'maqataxac, ma' qomi' ñañaanqot qami' ma'le.

₂Ca' so Nahas amonita le'ec 'naaco':

—Ajá'a, ña'maxachiguita qamiri, qam no'm 'maxariñita quiyim ñaqat añi nqote loicse quiñi 'óna caqamiri, qaiyi so'uet quiyim ỹaatqajam qai'neetac na llaalqaipi so Israel.

₃Co'na'le, ca' so qo'xoiquipi nashillipi na'ñi yi Jabes 'naaco':

—Ñaqai 'ỹaañitema qomi' caua siete na'xata' ma' sahoqe ca qarelaatqaipi quiyim ỹa'ue la'xaỹaxac ná'ogue ná'maq neeta'ñi na llaalqaipi so Israel. Ca no'm sqaica ca qarotauan, ca' ñañaanaxaguit qami' ma'le.

₄Ca' saua nelaatqa ỹovirera'a yi Gabaa yí'maq na'ño' so Saúl, ca qara'qaataxanem so qomyipi, ca sá'ogue so qomyipi noỹen naualqategueñi. ₅Ca noviro' so Saúl, chicqauec quena no'ueenaxa, no'deeta so lalo ñii'lolaipi. Ca renataxano':

—¿Negue' ca 'neeta na qomyipi? ¿Chi'negue ma' noỹentagui?

Ca' qara'qaataxanem so'maxare queda na'xaỹaxac nodo so qomyipi chicqa'gue da Jabes. ₆Ca' so Saúl co'na' 'xaỹa dajo, ca' so ne'espíritu ñi qota'olec na'ñaxat nqai'en so'maxare. Ca' ỹaatqajam chalego lauel. ₇Ca' ỹacona'alo saua dos laloo ñii'lola, ca ỹouaxana'que, ca' ỹa'ue so lelaatqaipi quiyim ỹoda'a na neeta'ñi na llaalqaipi so Israel. Ca' saua nelaatqaipi 'naaco' quena' 'ue na ỹovira'a:

—'Eda qohine'tegue ca laloipi cá'maq se lapo'guita yaua Saúl chaqai ñi Samuel, chaqai quiyim queguelo.

Ca' ỹaatqajam chalego lqolonaxa so qomyipi, ca chaqa'ma' eec lapoỹata', 'ec 'oonoqui' qom lapooguita saua'maxare. ₈Ca' so Saúl co'na' naloqochin so nalliripi quiyi Bezec, ca' ỹovi' trescientos mil so ỹalliripi chicqaugui na llaalqaipi so Israel, chaqai ỹovi' treinta mil na chicqaugui na llaalqaipi so Judá. ₉Ca co'na' ime, ca 'naaco' queso nelaatqaipi chicqa'gue da Jabes:

—'Ñiỹapega ná'maq qomyipi quiyi Jabes nete'e ma' na'xa'a lavinñi, ca ñca'laxataxauec.

Ca' so nelaatqaipi pil, ỹa'xat dajo quená'maq na'ñi yi Jabes, ca' ỹaatqajam netoontagui so qomyipi. ₁₀Ca' so qomyipi 'naaco' queso Nahas:

—Ma' nete'e, ca' ñañaanaxaguit qami', qaiyi qaratoiquiñi'sac.

₁₁Ca' queso liỹa na'xa'a, ca' so Saúl naloqojñi nqai'en so nalliripi tres nqai'ne' saua lomaate'. Ca co'na' saqa' richiguiñi, ca inoxonaugui na lavinñi ca nco'matqa' ca npa'guenaxauaripi. Ca' ỹaatqajam qanalauajñi so Amón llaalqaipi, chi ỹovireta'a so na'xa'a lavinñi. Ca ná'maq ca'laaxaiquipi ỹaatqajam neuagaxatetac, qaicaua caua nauequetecta'. ₁₂Ca co'na' ime dajo, ca 'uo' so qomyipi 'naapega so Samuel:

—¿Nega'ỹo' cá'maq sqai huelec quiyim nashi ñi Saúl? Ca 'ỹaañitema qomi' cajo qomyipi, qaiyi salauataq.

₁₃Qam so Saúl 'naaco':

—Qaica ca qaỹalauat quenajo na'xa'a, ma' ñi qara'gaxala' mashic nca'laxatec na Israel llaalqaipi.

₁₄Ca' so Samuel 'naaco' quesá'ogue so qomyipi:

—Qolaq, qolaxapegue' yi Gilgal, qaiyi sa'maqtaxañi ca lo'ueenataxanaxac da Saúl quiyim nashi.

₁₅Ca sá'ogue so qomyipi quepegue' yi Gilgal. Ca co'na' qaỹovita yi'maxare, ca' ỹauanchigui nqohin ñi qara'gaxala', ca' qoỹanshiguim quiyim nashi so Saúl. Ime, ca' qoỹaanot ñi qara'gaxala' aso nachitaxanataxanqate, qaiyi 'ue ca neuagaxa. Ca' so Saúl chaqai sá'ogue so liỹa llaalqaipi so Israel ỹaatqajam 'xoic da netoonaxac.