So Samuel ỹocorelec so Saúl, qaiyi lashi na llaalqaipi so Israel
1Co'na'le, ca' so Samuel icona aso locoraxanqate aceite lahi', ca' ỹocorelec na lqahic so Saúl. Ca 'naaco':
—Ñi qara'gaxala' ỹoỹoote'oga qami' nagui, qaiyi loqoira'a na llaalqaipi so Israel ná'maq lalamaxareteripi ñi'maxare. Ca' qami' ná'maq loqoira'a ma'le, na'maxare chaqai 'ootaxañirelec chaqai nca'laxachirec ma'le quena npa'guenaxauaripi sqoỹoqaque quena la'a'. Ca' 'eda dá'maq letanec ñí'maq qara'gaxala' quiyim ỹano qami' quiyim qami' lashi ma'le ná'maq lalamaxareteripi ñi'maxare. 2Ca' nagui ma' mashic noỹoochirec caỹim, ca huañiterelgoto ma'le caua dos ỹale' quiyi leseeque'ta yi nishinqa' na'le aso Raquel, quiyi Selsa quiyi 'laua huaugui yi Benjamín. Caua'maxare 'nerac ma'le quiyim shi'gue qaỹanatalo cauá'maq daañisapigui 'ashiñi', chaqai ñi qataa'i' qaica huapigui lauel quecaua'maxare, ta'ta'a caqamiri. Ca' 'naac negue' cá'maq 'neeta caqami' ma'le. 3Ca ma' liỹa quiita, ca' ma' viriỹa ada qo'paq encina na'ñi yi Tabor, ca nachiñiỹa'guita ma'le caua tres ỹale' taira'gue da Betel quiyim nqouagaxaintot ñi qota'olec. Ca 'óna i'xatete' caua tres queta', chaqai ca liỹa, ca i'xatete' caua tres paañi', chaqai ca liỹa, ca' i'xateta aca liỹoxoso loshicmaxa no'qaachigui quena lataxa. 4Ca ma' riquiñi', ca ỹahotaque ỹaañiraxarom ma'le caua dos paañi'. Ca' coñichiguita ma'le. 5Ca ma'le, ca' viriu'a yi Gabaa, la'a' ñi qota'olec, yí'maq na'ñi yi nouaataxanaq nalliripi na filisteoipi. Ca ma' noxoñiho quiyi na'a', ca nachiñiỹa'guit ma'le so letaxaỹaxaquiripi ñi qota'olec chicqashi'megue ada ncopatoxonaxalate. Ca' queso'maxare 'auetauec ma'le so qomyipi iviiquetapigui ana liviigue, lasaquinata, lpe'te chaqai ana niviigue 'xoic na lequet, leenaxat arpa. 6Ca ma'le, ca' so ne'espíritu ñi qara'gaxala' novita qami' ma'le, ca' se no'viñi', ca 'ñi'sari' ma'le saua'maxare, ca 'ec dalaxaic da no'ueenataxaqui'. 7Ca ma' 'ue dajo caqami', ca 'viichi' cá'maq piichira'a 'maxaraic. Ca' ñi qota'olec rotauañi' ma'le. 8Ca' qui', quirepegue' yi Gilgal yí'maq hua'ñi ma'le quiyim liỹa ñauanaxata' ma'le ma' so'uet na nachitaxanataxanaxat quiyim qaỹavigaxat chaqai ca nachitaxanataxanaxat quiyim ỹo'uet ca neuagaxa. Qam nauaañira'piguito' aỹim ma'le quiyi'maxare quecaua siete na'xata', toco' ma' sovi', ca sa'xatem qami' cá'maq reloqo'tegue ca ro'ueenataxanaxaqui'.
9Ca' so Saúl co'na' necona'guit so Samuel quiyim eec, ca chaqa'ma' qaỹadalaxat añi le'taxanata quiñi qota'olec. Ca' chaqaiso so na'xa'a, ca ipaquichiguilo naua'que naua qaỹachaxantapeguema netanqa so'maxare. 10Ca co'na' so Saúl chaqai so lelaatec ỹovirero quiyi Gabaa, ca' so letaxaỹaxaquiripi ñi qota'olec 'eco' se no'uen, ca'guit so'maxare, rasotetagui. Ca co'na'le, ca' so ne'espíritu ñi qota'olec ta'ñigui so Saúl, ca hua'ñi quiyim so'maxare se no'uen, ca' rasot, ỹalequetaugui so'maxare. 11Qam ná'oco' ná'maq shi'gue lauanatec so'maxare, co'na' iuane'ta quiyim ỹalequetaugui so letaxaỹaxaquiripi ñi qota'olec, ca' chi retaqatecta', 'naaco':
—¿Nega'ỹo' ca 'neeta da llaalec ñi Cis? ¿Peeta'a qai'neeta da Saúl letaxaỹaxaqui ñi qota'olec?
12Ca 'uo' só'maq na'ñi yi'maxare 'naaco':
—Ca ¿nega'ỹo' cá'maq leta'a najo qomyipi?
Ca' chaqaiyi chicqochigui da na'qaatec 'ec nanatec: ¿Ca' da Saúl qai'neeta ỹalequetaugui na netaxaỹaxaquiripi?
13Ca co'na' ime'uegue dá'maq 'ec quiyim se no'uen so Saúl, ca' ỹoviro quiyi la'a'. 14Ca' so neteesqo' inato' so Saúl chaqai so lelaatec:
—¿Nega'ỹo' cá'maq 'iico' na'le?
Ca' so Saúl 'naaco':
—Sedaanqatapigui caua 'ashina. Qam na' se sanataxalo, ca qolaxapegue' ca Samuel.
15Ca' so neteesqo' so Saúl 'naaco':
—Ca ¿negue' ca 'naaco' na'le ca Samuel? Qouaquiric, 'qaataxañirim.
16Ca' so Saúl ra'qaataxanem so neteesqo', 'naaco':
—Ñi'maxare ra'qaataxanalo qomi' quiyim cauá'maq 'ashina shi'gue qaỹanatalo.
Qam so Saúl se ỹa'xat quiyim chaqaiso so'maxare qaỹahotaque quiyim nashi, dá'maq la'xaỹaxac chicqo'ot so Samuel. 17Ca co'na' ime dajo, ca' so Samuel 'naapega so llaalqaipi so Israel quiyim nqouagaxainot ñi qara'gaxala' quiyi Mizpa. 18Ca' quiyi 'naaco' queso qomyipi:
—Ñi qara'gaxala' ñí'maq qota'olec quena Israel 'naac: “Ỹim ñaqata'a na'le qamiri quiyi Egipto, qamiri llaalqaipi so Israel, chaqai ñaqata'alo qamiri na'le queda lquesaxanaxa na Egipto laseripi chaqai quená'ogue na nashillipi ỹahotaque da re'xoriguii.” 19Qam nagui qamiri liỹoxoỹa'piguit ñi qota'olec ñí'maq naqata'alo qamiri quená'ogue nanchaqaina ỹo'ueetetac na re'xoriguii. Ca' qamiri liỹoxoỹa'piguit na' shiilaxañitaque ca rashii quiyim reloqota'alo qamiri. Ca' vichiguiño' nagui naguipegue' ñi qara'gaxala', riỹahitac cá'maq chaqai qachaalaxahipi chaqai ca chi qauori laseripi.
20Co'na' ime, ca' so Samuel 'naapega quiyim nqo'neuo sá'ogue so llaalqaipi so Israel. Ca tajlec quiyim qaỹaconeu'a na llaalqaipi so Benjamín. 21Ca lotqai 'naapega quiyim nqo'neuo so llaalqaipi so Benjamín, ca' tajlec quiyim ỹaconeu'a na llaalqaipi so Matri. Ca' queso llaalqaipi tajlec quiyim qaỹaconeu'a so Saúl só'maq llaalec so Cis. Qam co'na' qaimitaque, ca' se qaỹanata. 22Ca co'na'le, ca' lotqai qainat ñi qara'gaxala', ma' qaỹahotaque quiyim qaỹa'den quiyim ỹalequetaho so Saúl. Ca' ñi qara'gaxala' ỹa'xat quiyim ỹalequetaho so'maxare, qam nqañoxojñi, hueetaugui so ni'ỹaaquipi. 23Ca qane'guentau'a so'maxare, qoyiga'a quiyi nqañoqotqa'. Ca co'na' so Saúl qaiuana queso qomyipi, ca qaiuana quiyim qaica ca ỹovi' yi ladogaxa quesá'ogue so Israel llaalqaipi. 24Ca' so Samuel inat sá'ogue so qomyipi, 'naaco':
—¿Mashic huañiỹa dá'maq lca'acsec ñi qara'gaxala' quiyim nashi? ¡Quená'ogue na llaalqaipi so Israel qaica ca 'nejem da'maxare!
Ca' so llaalqaipi so Israel 'naaco':
—¡Ajá'a, chaqaida dá'maq qarashi!
25Ca' so Samuel ỹaatqajam ra'qaataxanem so qomyipi quená'maq leloxoỹaxac da lo'ueenataxanaxac ca nashi, ca ỹiriñi caso lere, ca ỹa'maxat illaugui ñi lauo' ñi qara'gaxala'. Ca co'na' ime dajo, ca' so Samuel 'naapega so qomyipi quiyim pil quenaua la'aate'. 26Ca' so Samuel qai'neeta pila ca la'a' quiyi Gabaa. Ca' ñi qota'olec viichigui lauel nqai'en quiyim so 'ñaaxaiquipi coỹa' so'maxare. 27Qam sqoue ná'maq se no'viiñi naua la'qaatqa queso qomyipi. Ca 'naaco':
—¿Ca chaqaido' dajo dá'maq qarca'laxatec ma'le?
Ca' qaỹañijintac chaqai se qaimaqachin. Qam so Saúl se na'xaỹaxana dajo queso qomyipi.
