Dios häpe N'okalelhthayajwo tä Lhamya
1Iwuk, an'ältej wichi
häpkhilek lhamel hiw'en
tä am lewo haya m'ak tä ni'isa.
2Ahäpe Dios tä ikalelhät m'ak tä ihonhatena.
Nephä wet tayhlä lhamel tä lhaichäjwethä,
wet w'enho laha m'ak tä lhamel iwoye.
3Iwuk, ¿atsihila ifwalak lepes lakäjyaj
häp wichi tä ni'isahen?
4¿Atsihila ifwalak nemla iwoye
lhämtes tä äyteschehen?
¿Wet atsihila ifwalak ileyej
tä w'et lhaichäjwethä
tä iwoye m'ak tä ni'isa?
5Iwuk, lhamel wuj tä ilhaklit aka wichi
wet yen w'et m'ayhaya.
6Lhamel ilänhen tesalis,
wet ilänhen wichi tä w'enha lhamej,
wet ilänhen chipenhas.
7Lhamel yok:
“Dios tä häpe Jacob laka Dios
hiw'enhit'a m'ak tä n'amel y'awoye,
wet itetshanhit'a.”
8Amel tä ahäpe wichi
tä laj lehuseya wet ch'isukwis,
lhek ch'ahuyaye.
¿Atsihila ifwalak ahusey ihi?
9¿Wok hä lefwetaj niläta ame
häp Dios tä yenlhi n'och'otey?
¿Hä lefwetaj akniw'ena
häp Dios tä lhenek n'ottelhoy?
10¿Hä lefwetaj niwohila letasnhayaja
häp Dios tä itetshan m'ak tä wichi iwoye?
¿Hä lefwetaj nhanayej m'ak tä lewoye
häp Dios tä hiw'enho lehanyaj elh chik häpe?
11Lhawuk ihanej tä hin'o
letichunhayajay laha ihihit'a.
12Iwuk, elh tä am lefwonlhi
wet lechufwenej ämtes,
akäpfwayaj tä is iyej.
13Häpkhilek tejlak näm ifwalas tä ni'isa,
mat letamsek ihi t'at.
Mat häp hin'o tä ni'isa
õ'waklhatho chowej.
14Lhawuk ilehiyejt'ala laka wichi,
wet ihiyeja t'at lhamel.
15N'okalelhthayajwos yachajiholak
yäm is alhoho lakalelhthayaj tä iwoye,
wet nilhokej wichi tä isen yohlak,
“Häp tä is.”
16¿Atsihila elh chik lhaineyhatphä
yämthilek ifwayhat n'oyej wichi tä ni'isahen?
17Chik Lhawuk nitch'othi p'ante n'oye,
olham pajichen'et oihi t'at ot'ilek.
18Tä ichehte lewhäy tä nem otkhajay,
ahumnhayaj, Iwuk, näm at n'oye wet ikhajyenn'o.
19Tä wuj otichunhayajay,
am letach'ot n'oye
wet lew'en n'oho okäjyaj.
20Iwohiyet'ak lhen akalay'isa
häp n'okalelhthayajwos tä ni'isahen
tä lhamel iwoye lechumet tä ni'isa
wet tatayhlä ley.
21Lhamel iwo huseya'pe tä tatayhlä
wichi tä ische alhoho wet laj letesa,
yämthilek õ'länhen.
22Mat Lhawuk häpe oletnhawet,
oka Dios t'u n'oye wet ifwayhatn'o.
23Häp wichi tä ni'isahen
Lhawuk iwohla lahayayej lech'isukyajay
wet itäyhthila lhamel.