Hin'o iwunit Lhawuk tä yenlhi p'ante nilhokej m'ayhay tä iche
1Iwuk, chik ochoylhi
oyenhipeja teneka tä ahäpe hap'altsentsaj,
wet olehiyejt'ala tä oyen lhämeta
tä ahäpe Dios tä t'ifwtiyej laka wichi.
2Owohla silätayej wichi
häp ahumnhayaj tä nittäya,
wet afwtihyaj tä letiyej wichi lewohit'a elha,
ahätet iwoye pule, wet pule t'at.
3Lewoyeje p'ante ämet häp David,
wet lefwenho akawotso tä letatshupiye wet lhok:
4“Häp ales oyenla häpeya
hin'ol tä icheyäjo haw'et,
häpkhilek aniyatyaj nittäya.”
5Iwuk, nilhok pule lheley aiwujyen
tä ahäpe Dios tä t'ifwtihyaj ihi,
wet lhamel iwujyen m'ayhay tä isis tä lewoye.
6Ihichet'a pule lhelek häte iwoye am, Iwuk.
Ihichet'a dios chik w'awulh amhi
7tä ahäpe Dios tä N'owujtaj wet len'ohyaj ihi
tä ihi lechowej pule lheley,
wet lhamel tä i'awhäye iti amej lenowayhyaj.
8Iwuk Dios tä lajit atumfwaya,
ihichet'a elh chik häpe chik w'awulh amhi,
tsi ahäpe Dios tä takhajay
wet äp afwtihyaj ihi.
9Lewo letamseka lewomekitaj tä fwitsaj
wet ileyej tä iwo lhetheya.
10Lep'ajtitchä p'ante
inät lheletaj wet lelän.
Häp tä isej akhajyhayaj,
lefwtsatkatpe honhat atayhfwas.
11Alewuk t'at pule lhäy'e honhat tä lhenwethä,
lhäy'e nilhokej m'ak tä ihi.
12Wet lhenlhi lhip tä tumej tafwojhiye
wet lhip tä tumej tapinhiye.
Wet chenhas Tabor lhäy'e Hermón lakäjyaj ihi,
wet ichoywethä tä aiwunit.
13Akwey takhajay,
akwey tä afwomkat takhajay
wet ikalhi letayhfwa.
14M'ak tä is alhoho
lhäy'e m'ak tä matche
ikhajyen aniyatyaj,
wet ahumnhayaj lhäy'e afwtihyaj i'amej.
15Iwuk, akäpfwayaj tä is iyej t'at
wichi tä yen käjyaja tä aiwunit,
wet lhamel is amej tä len'ältej lhamel.
16Imälhewek lewhäy tä lhamel akäjlhi amej,
wet wuj tä ihumin ha'isyaj.
17Häp lhamel lakhajyhayaj lhäy'e lesilatyaj tälh ame,
wet tä lep'altsenhen olhamel,
let'isej lhip okhajyhayaj.
18Olhamel op'ot t'at häp Owuk Dios,
wet häpe t'at oka Rey
tä häpe Israel T'amajchet.
Hin'o yen letichunhayaja Lhawuk lhämet p'ante iwoyeje David
19Ifwalas tä pajche lewo lew'eneka
akawos tä afwtintses wet lhok:
“Otchuma hin'o tä takhajay tä iyej oka wichi,
ow'enho lewujyaj wet otch'ote.
20Matche, onlhoke t'at okawo David,
otsäype aceite tä ot'amajchet
wet oyen häpeya niyat rey.
21Tek och'otyaj tatäyhiyeja,
wet okhajyenhiyeja okhajyhayaj,
22wet letayhfwas tä häpe
wichi tä ni'isahen ikalhihit'ala.
23Ot'äsila'pe letayhfwas wet nemla hiw'en.
Otäyhthila wichi tä n'äyiho.
24Lham itihla lhamej
ohumnhayaj lhäy'e ot'ifwtihyaj,
wet oy'isiyeja lhip lakhajyhayaj.
25Oy'ayhthitshila leniyatyaj,
tälhe lewomekitaj pajla'tha nichäte tewokitaj.
26Wet lham yohlak, Ahäpe Ojcha,
ahäpe oka Dios tä ifwayhatn'o wet t'u n'oye.
27Wet olham ow'enhihola owahnhayaj
yämthilek häpe olhäs tä ochunkatsek,
wet niyathiyeja nilhokej reyes tä i'pe honhat.
28Wet tek otäyhthiyeja ohumnhayaj
lhäy'e olhämet tä owoyeje häp lham.
29Häp leles oyenla häpeya
hin'ol tä icheyäjo lew'et,
wet leniyatyaj nofwit'ala
tä kamaj pule ninofwa.
30-31“Matlak lhamel ileyej ochufwenyaj,
wet niwoyaye olhämtes wet äp inäk'äs,
32otasnhihena wet opäjiyejawethä hal'ä.
33Mat olehiyejt'ala tä ohumin David,
wet oyisthit'ala op'altsenyaj tä otiyej häp lham.
34Owasthihit'ala olhämet tä pajche owoyeje,
mat omatthichela.
35Tä ohäpe Dios tä le'isyaj ihi,
ot'untejchehte olhämet tä owoyeje,
wet tek ofwech'enhilhila.
36Leles icheyäjihola leniyatyaj
chik kamaj ifwala iche.
37Tek nofwila, hätehlat iwoye iwel'a,
tatäyhit'ala chik kamaj pule iche.”
Hin'o tafwlhi'pe rey tä letayhfwas ikalhi
38Mat athana, Iwuk, let'ulhan t'at
wet lhen w'et m'ayeka häp rey tä am letatshupiye,
wet wuj tä letiyej awäk.
39Lewasthi ämet tä let'untejche akawo,
wet lethat katsi leniyatyaj tä letihi.
40Lefwoyenlhi lelafwek tä hupuy lep'otes,
wet lewasthiche laka hupuy tä takhajayhen.
41Wichi tä ihiche honhates tä iwhäye
t'etane m'ayhay tä ihi
wet iläkwlhi rey,
42wet lewahnej chik letayhfwas
ikalhi wet akäjejlhi.
43Lesoyej laka'tshayajchal
wet nemhit lhewej tä iwo laka'tshayaja.
44Lelehtej len'ohyaj tä iyej
wet letiyej kanhi leniyatyaj.
45Lhen häpeya hin'o tä yofwajkwet hich'ut,
wet lhen n'oläkwika.
46Iwuk, ¿atsihila ifwalak leleyej tä akan'älita?
¿Hä tek tatäyhla awäk
tä tet iwoye itäj tä y'uho?
47Tichunche tä pitajit'a ow'atshancheyaj,
tsi t'unhihent'a wichi tä enhay.
48Nehit katsik iläy wet ihanhiyejt'ak y'il,
wet nehit katsik tafwayhiyeja n'ot'ilek khajyhayaj.
49Iwuk, ¿chip ihitso ahumnhayaj tä ichun,
tä lefwenho p'ante David
häp tä isej hap'altsenyaj?
50Iwuk, tichunche tä wichi
wuj tä iläkwethä akawos,
wet wuj tä olät tähestso.
51Iwuk, mälhyej'attso
tä iläkwethä olhamel häp otayhfwas.
Mälhyej'attso tä tujlhache t'at
tä iläkwlhi elh tä letatshupiye.
52Lewujyaj ihi Lhawuk pajla'tha tiyäj'attsiy.
Amén. Amén.