Lhawuk in'amejen
1Dios häpe lhaletnhawet,
wet häpe t'at lhakhajyhayaj.
Ipej n'amejen wet tach'ot n'amehen
chik näm lhawit'äy.
2Tä mälhyejtso, tek lhanowayhyaj in'amejen,
tejlak honhat wachuhi
wet chenhas nichätho lewomekitaj,
3tejlak fwitsaj lewomekitaj
wet iwo lhetheya inät,
wet w'ahuhen chenhas,
mat tek y'anowayhen.
4Iche tewok lesas tä Dios laka hupuy isej,
häp Dios tä N'owujtaj Lew'et tä T'amajchet tä lhamya.
5Dios ihi t'at lechowej
wet tek lewit'äyhyaj ihichela,
tsi lham tach'othiyela
tälhe tä nech'e fwala.
6Wichi tä ihiche honhates t'änwethä,
ichettiyejche lenowayhyaj,
wet leniyatyajay nemhit kalelhäj.
Dios ifwitsenej lepak
wet honhat wachuhi.
7In'amejen Lhawuk, wuj tä takhajay.
Häp Jacob laka Dios häpe t'at lhaletnhawet.
8Lhuyay, yahinay m'ayhay tä Lhawuk
iselkat n'amejen tä yenlhi honhatena.
9Itäyhat n'oka'tshayajay,
yäk nichäte honhat lhip tä lepes
tä nem n'oka'tshayaj ihi.
Inäksen lutses hal'äy,
wet iwo lhipeya hunis,
wet iwunhomche kaletas tä n'oka'tshayajchal.
10Wet yok, “¡Leyej aka'tshayajay!
¡Hanayej tä olham ohäpe Dios!
¡Oniyatej nilhokej wichi
lhäy'e nilhok honhat!”
11In'amejen Lhawuk, wuj tä takhajay.
Häp Jacob laka Dios häpe t'at lhaletnhawet.