Lhawuk lepak takhajay
1¡Pule lheley, wunitay Lhawuk,
wunitay lakhajyhayaj lhäy'e lewujyaj!
2¡Wujyenay, tsi t'uhawetej t'at häp lham!
¡N'okwiyayej Lhawuk tä ihi
lesilatyaj tä t'amajchet!
3Lhawuk lepak tumpe lewomekitaj.
Dios tä lewujyaj ihi iwo lepaka,
häpe t'at pelhay tä y'ip.
Lhawuk i'pe lewomekitaj tä wuj,
4lepak äytaji wet matche tä takhajay.
5Tä pitsaje inäksen hal'äy.
Lhawuk inäksen pino lhayis
tä ihi chenhas tä Líbano.
6Ichetteynhiche chenhastso,
lhäy'e chenaj tä Sirión.
Itiyäjayenchephä, hätet iwoye
w'asetas chik tiyäjchephä.
7Lhawuk lepak iwo itäja,
8wet hiw'ahhatlhi ts'anis,
häp ts'anis tä Kadés.
9Lhawuk lepak isichätlhi hal'ä tä t'un,
wet ilanche hal'äy tä ihi tayhi.
Wet nilhokej wichi tä ihi lham Lew'et tä T'amajchet yok:
“¡Lewujyaj ihi Lhawuk!”
10Pelhay lhayis laka Niyat häp Lhawuk,
lham ihi Leniyatyaj yämlek tiyäj'attsiy.
11Lhawuk ikhajyen laka wichi,
wet takäpfwayeje letamsek.