Wichi iwo t'alhyaja'pe laka niyat häpkhilek ikalhi laka'tshayaj
1Ika niyat, is chik Lhawuk tach'ahu ame
chik lewo aka'tshayaja.
Is chik lham tä häpe Jacob laka Dios
ifwayhat amej atayhfwas.
2Is chik ichen ame
akhajyhayaj lhäy'e hach'otyaj
tä tälhe Lew'et tä T'amajchet
tä i'pe chenaj tä Sión.
3Is chik yen tichunhayaja
nilhokej m'ayhay tä lhen t'awayhata,
wet tachumlä itshätäy tä lewunhomche
tä i'pe altar wet akäjejlhi.
4Is chik hiw'en amho
m'ak tä achowej iwatlä,
wet yäm wak'alhen m'ayhay tä lewoye.
5Chik mälhyejtso,
olhamel oyenla okäjyaja tä lekalhi aka'tshayaj,
wet oneyhthiyejphäla banderas häp lhaka Dios.
Is chik Lhawuk iwoye nilhokej alhyajay.
6Athana ow'en tä matche tä Lhawuk aifwayhthila
tä ahäpe niyat tä lham tatshupiye.
Lhawuk tach'ahuhla ame tä ihi
Lew'et tä T'amajchet tä häpe pule,
wet hiw'enla amho lakhajyhayaj
yämthilek lekalhipej aka'tshayaj.
7Wichi yäme tä hiw'en kaletas tä laka'tshayajchal
wet iyhäj yäme tä hiw'en yel'atas.
Mat n'amel y'äme tä Lhawuk Dios häp tä in'amejen.
8Wet lhamel nichäthichela katsi wet tatäy,
mat n'amel y'atkhajayhen wet y'atkasthen.
9Iwuk, ¡w'enho lakhajyhayaj häp niyat
yämthilek ikalhi laka'tshayaj!
¡Ch'ahu n'oyehen chik ot'än hach'oye!