David lhaip'altsene Dios chik t'uye häpkhilek nichätaho lewit'äyhyaj
1Ot'än hach'oye, Iwuk.
¡Kelhi, ho n'oye!
¡Ch'ahu n'oye tä ot'än hach'oye!
2Is chik ot'alhyaj
hätet iwoye incienso tä õ'wun,
lenij akäjche tä ihi tä letatache,
wet otkweyey tä otiphä amej
hätet iwoyek awayhat
tä oyachaj ame tä honaj.
3Iwuk, uye ok'aj, häpkhilek newache
olhämet chik ni'isa chik tälhche.
4Yej wahin n'oyej otichunhayaj tä ni'isa.
Yej tach'anlha n'oye
chik owoye m'ayhay tä ni'isa,
wok otw'aye lhäk keyis länhay
tä iwo lakäjyaja.
5Häp hin'o tä is,
chik itasinn'o wok ifwonn'o,
lech'otyaj t'at wet häp tä oisej.
Mat chik hin'o tä ni'isa iwujyenn'o,
häp tä oisiyejt'a, otihit'a lhamej.
Wet olehiyejt'a tä owo ot'alhyaja
tä ottayhlä m'ak tä ni'isa tä elhna iwoye.
6Häp laka niyatey
õ'thatla lech'oye tä tälhpe chenhas,
wet wichi nitäfwenhiyeja
tä olhämtes häp tä matchehen.
7Lhiley ifwtsatla'pe honhat
tä iwhäye lep'itsekw'et,
hätehlat iwoye honhat tä õ'saji.
8Iwuk Dios, ottey ilehthit'a amej.
Am tä ot'uhläk let'u n'oye.
Yej womn'o.
9Fwayhat n'oyej t'akanyajay
häp wichi tä iwoye m'ak tä ni'isa.
10Wet is chik m'ak tä ni'isa
tä fwetaj iwoyej n'oye
nichät'atpe lhamel,
wet olham owit'äy ihihit'a.