1Mat tä Balaam hiw'en tä Lhawuk ihumin chik lham takäpfwayeje m'ak tä is häp Israel, nemhit ihoye Dios yämthilek ifwenho m'ak chik yen lhämeta, mälhyej tä iwoyepej. Mat nitilhake wet iyahne ts'anis, 2wet hiw'ene Israel lhayis tä lhaiw'enhathen lhamel tä wusche'pe tä ihi lakasthawet. Wet Dios laka Espíritu iho'pe lham, 3wet nech'e yen lhämeta Dios lhämet wet yok:
“Beor lhäs Balaam lhämet täja,
hin'o tä tatey hit'unteji m'ak tä iyahin.
4Yokwe hin'o tä iläte Dios lhämtes.
Nichät katsi mat tatelhoy isiche,
wet lew'enhay tälhe t'at Dios tä lajit letumfwaya.
5“¡Israel, Jacob laka wichi,
matche tä isis haw'etes!
6Hätet iwoye fwitsuk lhayis tä ifwilhahchä,
wet hätet iwoye n'okäsw'etesas tä iwhäye tewok.
Hätet iwoye hal'äy tä lhits'i lenij akäjche
tä Lewuk Dios yen lakäsa,
wet hätet iwoye pänhichetek lhayis tä iwhäye inät.
7Israel hiw'enla inät tä naya,
yämthilek iyäyej wet itsäype lakäs yachuyaj.
Laka rey ikalhihila Agag, Amalek lhayis kaniyat,
wet leniyatyaj häpkhila m'ak tä wuj.
8Häp Dios tä itonphä tä tälho Egipto,
iwopej laka'tshayaja'pe lhamel,
hätet iwoye w'asetaj tä fwitsaj.
Israel ihämthiyeja wichi tä letayhfwas,
ilänhiyejena lech'ähal wet inäksenla lhiley.
9Tä imä katsi tä iwo t'elakw'eta,
hätet iwoye t'owalhaj,
wet nehit katsik fwetaj hin'omhatlhi.
Wichi chik takäpfwayej amehen m'ak tä is,
is chik Dios lakäpfwayaj iyej t'at lhamel.
Wichi chik takäpfwayej amehen awit'äyhyaj,
is chik lewit'äyhyaj ihi t'at lhamel.”
10Tä Balac iläte täjtso, wuj tä fwitsaje Balaam. Wet ikhajyenchehen takweyey wet yok:
–Olham ot'ännaj ame tä one'tek letakäpfwayeje m'ak tä ni'isa häp otayhfwas. Matkat athana tres veces tä letakäpfwayeje m'ak tä is. 11¡Is chik lhäpil! Ofwetajnaj ow'enhi amho han'ohyaj tä wuj, mat Awuk Dios tach'anlhahiyet'a.
12Balaam nichulho wet yok:
–Pajchenaj ofwenho aka silätwos, oyonaj, 13“Tej chik Balac hiw'en n'oho nilhok oro lhäy'e plata tä tapoyejej lewukwe, mat okalhihit'ak n'am woye m'ak chik Owuk Dios ne'tek owoye. Owohiyet'a olham onech'ethayaj yämthilek owoye m'ak tä is wok ni'isa. Oyämhiyelat m'ak chik Owuk Dios ne'tek oyäme.”
Balaam yäme Israel lewujyaj chik ihiyeja
14Wet Balaam äp tahuyej Balac wet yok:
–Athana oyäple oka honhat. Mat chunkat ofwel amho m'ak tä wichina iwohiyejela aka wichi häp ifwalas tä tatay alhoho.
15Wet nech'e Balaam yen lhämeta Dios lhämet wet yok:
“Beor lhäs Balaam lhämet täja,
hin'o tä tatey hit'unteji m'ak tä iyahin.
16Yokwe hin'o tä iläte Dios lhämtes,
wet nitäfwelej m'ak tä Dios tä N'owujtaj nitäfwelej.
Nichät katsi mat tatelhoy isiche,
wet lew'enhay tälhe t'at Dios tä lajit letumfwaya.
17Ow'ene m'ak tä tatay alhoho.
Ow'en m'ak tä ow'en mat wuj tä atofwey.
Häpe niyat tä tälhihola Israel lhayis,
hätehlat iwoye kates tä n'äl tä ihi pule.
Hip'ajthihila niyatey tä ihi Moab,
t'äsihila nilhokej Set leles tä lepes lheley.
18Ikalhihila letayhfwas tä Edom lhayis
wet lhayenla lewuka laka honhat Seír.
Wet Israel iwohiyela m'ayhay tä wus.
19Hin'o tä takhajay tälhiyela Israel,
wet itäyhthila wichi tä imälhehi hupuy.”
Balaam lhämtes tä lepes
20Wet Balaam hiw'en Amalek, wet yen lhämeta Dios lhämet wet yok:
“Amalek häpe wichi tä i'pe honhat lhetek,
mat wasihila wet tatäy.”
21-22Häte hiw'en Ken lhayis, wet yen lhämeta Dios lhämet wet yok:
“Ahäpehen Caín leles,
wet tej tä lhen awukweya chowhay tä ihi chenhas,
wet tej tä aletnhawetes wuj tä t'un,
mat itäj itäyhthila awukwey
chik Asur lhayis ayen kwenkaya.”
23Wet äp yen lhämeta Dios lhämet wet yok:
“¡P'elitsaj elh chik kamaj n'ila
chik Dios iwohiyela tähesna!
24Ow'en tä nekhen barcos tä nekche Chipre lhip,
wet ilhaklitla Asur lhayis lhäy'e Heber lhayis,
tsi Heber häte wasihila.”
25Tä Balaam ileyej tä iwoyetso, wet yik tä yäple laka honhat. Balac häte yäpil.