Inät tälho chenaj
1Tä iwo tesa nekchäm, häp iwel'a tä ichun, wet Israel lhayis nichätho ts'anis tä lhey Zin wet iwo lakasthawetahi häp lhip tä lhey Kadés. Wet häp p'ante tä Miriam ihi tä ileyej honhat, wet õtjänch'oye lep'itsek.
2Wet tä inät newache, nilhok wichi lhaihutwek wet iwoyeje lhämtes tä t'änejpe häp Moisés lhäy'e Aarón. 3Wet tahuyej Moisés wet yok:
–¡Isin'aj t'at chik Lhawuk hip'ajtit n'oyejen n'aiyhäjnaj lham ilänhen! 4¿Chipte tä amel lehän kana häp Lhawuk kawichi, häp honhat tä ts'anisna? ¿Hä let'uhläk oy'inhen, lhäy'e olhamel oläy? 5¿Chipte tä letonphänaj olhamel tä oihi Egipto wet lehän n'oyehen häp honhatna tä wuj tä ni'isa? Ohanhiyejt'a owoyneje chik ofwetaj otutcheyhen. Wet äp nehichet inät kana yämthilek oyäyej.
6Tä Moisés iläte wichi, yikch'oye, lhäy'e Aarón, wet ihoye lepe häp carpa tä Lhawuk lewukwe. Tä nichäte, lhamel t'upechehchä pajtha letachol taji honhat. Wet isi tä Lhawuk lewujyaj lhain'ältej, 7wet Lhawuk tahuyej Moisés wet yok:
8–Chuma n'otsut tä ihi tä Arca tä Ot'amajchet tä olhämtes lehi tatache, wet is chik am lhäy'e achila Aarón lehutwek wichi. Wet chik lhehi tä lhamel tatache, ahuyela chenaj yämthilek hiw'enho wichi häp inät tä tälho. Wet inät tälhihola wet wichi lhäy'e leläy iyäyej.
9Wet Moisés iwoye m'ak tä Lhawuk ne'tek iwoye, tachuma n'otsut tä ihi tä Lhawuk tatache. 10Wet Moisés lhäy'e Aarón lhamel ihutwek wichi tä ihi tä chenaj tatache. Wet nech'e Moisés tahuyej lhamel wet yok:
–¡Ch'ahuyay n'oye, amel tä akachuhantses! ¿Hä olhamel otälhthihola chenajna häp inät yämthilek amel leyäyej?
11Tä iwoyetso, itiphä takwey tä n'otsut ihi wet dos veces tä y'ajej chenaj. Wet wuj inät tä tälho, wet wichi lhäy'e leläy iyäyej.
12Matkat Lhawuk tahuyej Moisés lhäy'e Aarón wet yok:
–Tä amel lekachuyay n'oye wet ka'enan'o häpeya N'ot'amajchet tä oihi tä Israel lhayis tatache, amenhit'alak lechätyenho wichi honhat tä ot'uhläk ow'enho lhamel.
13Häp täja inätw'etes tä ihi Meriba, honhat tä Israel lhayis ihi p'ante tä iwoyeje lhämtes tä t'änejpe Lhawuk, mat lham ipäyne lhamel tä häpe t'at N'ot'amajchet.
Rey tä ihi Edom tek iwahnej Israel lhayis yämthilek inukwe laka honhat
14-15Tä Israel lhayis ihi Kadés, Moisés ichen hin'ol yämthilek ihäne lhämet häp rey tä ihi Edom. Wet yok:
–Apuhfwas Israel lhayis ichen ame lhämetna. Am lehanej t'at tä wuj tä äytajche m'ak tä in'oyejen tä olhamel oihi Egipto. Olhamel otetsel ihoye p'ante honhattso wet ihi wujpey nekchämis. Wet wichi tä ihi wuj tä ni'isa m'ak tä iwoyeje lhamel lhäy'e olhamel tä ohäpehen leles. 16Wet olhamel ot'änch'oye Owuk Dios, wet tach'ahuye t'at olhamel ot'änyajay. Wet ichen n'oyehen laka ángel wet itonphä olhamel tä oihi Egipto. Athana olhamel oihi t'at hupuyna tä lhey Kadés, oitwhäye aka honhat. 17M'ak tä ot'alhej ame, ot'uhläk lewahin n'oyejen chik onukwe aka honhat. Mat onuhikwet'ala lhipey tä akäsw'etes wok n'olafwey tä uvas ihiche. Häte tek oyähiyeja inät tä alewuhuy. Onuhikwelat n'äyij tä is alhoho wet tek ottsayhihena pajla'tha otfwayej aka honhat.
18Matkat rey tä ihi Edom nichulho wet yok:
–¡Yej nuyaykwe oka honhat! ¡Chik kawoyaye olhämet, olham lhäy'e oka nifwotaj ottayhla ahilähen!
19Mat Israel lhayis inityen wet ifwenho tä yok:
–Olhamel onuhikwelat n'äyij tä lhamya, wet chik olhamel lhäy'e oläy oyäyej inät tä alewuhuy, olhamel otiskanla'pe. Tajlhamat tä ot'uhläk onukwe n'äyij tä inukwe aka honhat wet oyikhen.
20Matkat rey tä ihi Edom nichulho wet yok:
–¡Yej nuyaykwe oka honhat!
Wet yik, lhäy'e laka nifwotaj tä wuj wet takhajay wet wuj takwelheley, wet ihoye Israel lhayis. 21Wet tä Israel lhayis hiw'en tä rey niwoyaye lhamel lhämet, lhamel inukwe n'äyij elh.
Aarón ileyej honhat
22Israel lhayis yikch'oye Kadés wet inukwe n'äyij tä tiyäje chenaj tä lhey Hor 23tä iwhäye honhat tä Edom. Wet Lhawuk ifwenho Moisés lhäy'e Aarón wet yok:
24–Aarón y'inhila wet ihohiyela lechätilis. Tek nichäthihola honhat tä ow'enhihola Israel lhayis, häp tä amel tek lewoyayenaj olhämet tä ofwel amhohen tä lhewhäye inätw'etes tä ihi Meriba. 25Am, Moisés, chäj Aarón lhäy'e lhäs Eleazar, wet hänpe chenaj Hor. 26Wet chik lhe'pe, lanchela sacerdote lew'uyis tä Aarón taw'uyhi, wet w'uyyenhila lhäs Eleazar. Tsi Aarón y'inhila chik i'pe chenaj.
27Wet Moisés iwoye m'ak tä Lhawuk ne'tek iwoye. Wet nilhokej Israel lhayis iyahinche t'at tä lhamel iho'pe chenaj tä lhey Hor. 28Tä lhamel nichätpe, Moisés ilanche sacerdote lew'uyis tä Aarón taw'uyhi, wet hiw'uyyenhi lhäs Eleazar. Wet Aarón y'il tä i'pe chenajtso. Wet Moisés lhäy'e Eleazar inukwehchä tä tälhpe chenaj. 29Wet tä Israel lhayis ihanej tä Aarón y'il, lhamel tafwchehchä pajtha treinta ifwalas.