M'ayhay tä sacerdotes lechumet lhäy'e Leví lhayis lechumet
1Lhawuk tahuyej Aarón wet yok:
–Am lhäy'e ales, lhäy'e iyhäj Leví lhayis tä lhewej, nilhokej lhamenlak letes chik iche m'ak chik ni'isa chik lhamel iwoye tä ihi ow'et. Wet am lhäy'e ales, chik ni'isa alhoho achumyaj tä ahäpehen sacerdotes, amenlak ates. 2Fwenho Leví lhayis tä lhewej, Is chik tach'ot ame lhäy'e ales tä letachumwethä tä lhehi carpa tä Arca tä Ot'amajchet tä olhämtes ihi ichufwi. 3Is chik lhamel tach'ot ame wet tach'ote owukwe. Mat isit'ak lhaitott'ayne altar lhäy'e m'ayhay tä ot'amajchetes tä ichufwi owukwe. Wet chik lhamel niwoyaye olhämetna, y'inhihena, lhäy'e amel. 4Is chik lhamel tach'ot amehen chik lewoye nilhokej achumtes tä ihi owukwe. Mat yej wahnej hin'o chik häpek kahäpeya elh amel chik lhaitott'ayen amehen. 5Tsi amel t'at tä achumet yämthilek lewoyaye achumtes tä ihi ow'et tä ot'amajchet lhäy'e tä iyej altar, häpkhilek n'am nachajo chik otiyej owäk häp Israel lhayis.
6“Olham pajche otchuma apuhfwas tä häpehen Leví lhayis tä lhayej Israel lhayis, yämthilek tach'ot amehen. Oyen ot'amajchetesa wet ow'en amhohen yämthilek iwoye lechumtes tä ihi carpa tä ow'et. 7Mat ts'ilak am lhäy'e ales yämthilek lewoyaye sacerdotes lechumet tä iyej altar, wok ihi lech'o elh tä iw'echehi sak'al tä õhp'oyejlä. Achumettso häp tä awayhat. Elh chik kahäpeya sacerdote chik fwetaj iwoye sacerdote lechumet, letes ihi wet iwohiyet'ak õkniläna.”
M'ak tä sacerdotes isej
8Wet Lhawuk tahuyej Aarón wet yok:
–Am tä one'tek let'uye otw'ayhtes tä wichi hiw'en n'oho. Nilhokej m'ayhay tä õyen ot'amajchetesa tä Israel lhayis ichäj n'oye, wet ow'en amho, lhäy'e ales, wet alewuhuy t'at. Kalelhäj olhämetna wet häpe m'ak tä nittäya. 9Häp m'ayhay tä õyen n'okhayaja n'oyej tä õkniwunahomche, am is chik lew'enhayej n'olhäk tä tälhe yachuyaj lhay, lhäy'e itshätäy tä õ'länhenpe n'och'isukyajay wok õyen lahaya elh letes. Nilhokej m'ayhay tä ot'amajchetesna tä wichi ichäj n'oye, ow'en amho, lhäy'e ales tä hin'ol. 10Wet is chik amel letufw tä lheyayhi t'at lhip tä n'ot'amajchet, tsi ot'amajchetes t'at häp m'ayhaytso.
11“Häte ow'en amho, lhäy'e ales, ales tsinhay tä i'amej, häp otw'ayhtes tä Israel lhayis ichäj alhoho tä amel leti n'oye. Kalelhäj olhämetna wet häpe m'ak tä nittäya. Haw'et lheley elh chik häpek newache lakokhayaj, is chik tufw t'at. 12Häte yachuyaj lhay tä ichun tä Israel lhayis hiw'enpej n'oho nekchämpej, ow'en amho: häp aceite tä is, lhäy'e hat'es tä is, lhäy'e trigo tä is. 13Häp yachuyaj lhay tä ichun tä Israel lhayis ichäj n'oye, alewuk t'at. Haw'et lheley elh chik häpek newache lakokhayaj, is chik tufw t'at.
14“Nilhokej otw'ayhat chik Israel lhayis yen t'amajcheta n'oyej, alewuk t'at.
15“Häte Israel lhayis leles tä lechunkatshay lhäy'e leläy leles tä lechunkatshay tä lhamel hiw'en n'oho, alewuk t'at. Mat häp hin'o lhäs tä lechunkatsek, is chik lajcha tiskanpe. Wet häp n'olä tä lechunkatsek tä lakokhayaj ihi, is chik lewuk tiskanpe. 16Wet han'äfwaj wok itshäwet, is chik lajcha wok lewuk tataye pajtha iwel'a tefwajni, nech'e tä tiskanejpe cinco chinaj t'äj mhoy tä once gramos plata. Is chik häpe chinaj t'äj tä õ'chumyenlhi tä ihi olham ow'et.
17“Mat yej wahnej chik õtiskanpe w'asetas chunkatshay, lhäy'e tson'atas chunkatshay, lhäy'e kayla lhayis chunkatshay. Tsi pajche õyen ot'amajchetesa wet is chik õ'länhen, wet lew'oyis tsäyla'pe altar, wet wunho t'alhä tä lhen häpeya otw'ayhat tä lenij akäjche. 18Mat am chumela t'isan, lhäy'e let'okwe tä häpe otw'ayhat tä leti n'oye, lhäy'e lheche t'isan tä lefwomkat. 19Nilhokej otw'ayhtes tä Israel lhayis yen t'amajchetesa n'oyej, ow'en amho, lhäy'e ales, ales tsinhay tä i'amej. Kalelhäj olhämetna tä owoyej ame, lhäy'e ales, pajla'tha nichäte lepes lheley. Häpe t'at m'ak tä nittäya, ihit'ala katsik itäyhat.”
20Wet Lhawuk äp tahuyej Aarón wet yok:
–Tek ahätehla iwoye Israel lhayis iyhäj. Ihichet'ala aka honhates wok akäywetes. Olham t'at tä akäywetn'o tä lhehi Israel lhayis.
M'ak tä Leví lhayis isej
21“Wet häp Leví lhayis ow'enho diezmo tä tälho häp yachuyaj lhay tä one'tek Israel lhayis hiw'en n'oho, yämthilek häpe t'at Leví lhayis lakaha tä lhamel iwoye lechumtes tä ihi carpa tä ow'et. 22Wet isit'ak iyhäj Israel lhayis lhaitott'ayne ow'et. Tsi chik iwoye täjtso, häpkhila lech'isukyaj chik tamenhiyejak y'inhen. 23Ts'ilak t'at Leví lhayis tä iwoye lechumtes tä ihi owukwe. Wet chik iche m'ak chik ni'isa tä ihi owukwe, lhamenlak letes. Is chik nileyayej tä yen lakeya, pajla'tha nichäte leles tä lepes lheley. Wet Leví lhayis tek ihichela laka honhates tä lhamel iyej Israel lhayis. 24Ow'enho diezmo tä tälho m'ayhay tä Israel lhayis hiw'en n'oho, yämthilek lewuk t'at lhamel. Häp tä tamenej tä ofwenho lhamel tä oyok, Ihichet'ala honhates tä alewuhuyla tä lhewej Israel lhayis.”
Is chik Leví lhayis iwo laka diezmoya
25Wet Lhawuk tahuyej Moisés wet yok:
26–Fwenho Leví lhayis, olak, “Chik amel lekatej diezmos tä Lhawuk hiw'en amhohen tä tälhe Israel lhayis wet alewuhuy, häte w'enhatay diezmo tä tälho diezmotso wet nachajaye Lhawuk. 27Häpkhila täjtso m'ak chik amel lew'enho Lhawuk, hätet iwoye Israel lhayis tä hiw'enho lhip laka yachuyaj lhay lhäy'e hat'es. 28Mälhyejtso häp diezmo tä tälhe Israel lhayis tä amel letachumlä, häte iwohiyet'ak kanachajaye Lhawuk diezmo tä tälho. Wet w'enho sacerdote Aarón wet lewuk t'at. 29Häp m'ayhay tä lhamel hiw'en amhohen, is chik lew'enhatej lhip häp Lhawuk. Wet lhiptso tä lhen t'amajcheta is chik wuj tä is.”
30“Häte fwenhola Leví lhayis, olak, Chik pajche lew'enhatej Lhawuk häp lhip tä wuj tä is, wet lhip tä imälhehi alewuk t'at, mälhyej tä iyhäj Israel lhayis isej t'at m'ak tä imälheyej. 31Wet amel lhäy'e haw'et lheley is chik letufway t'at, honhat chik häpek lhehi. Tsi häp täjtso akaha tä lewoyaye achumtes tä ihi carpa tä Lhawuk lew'et. 32Wet chik pajche lew'enhatej Lhawuk häp lhip tä wuj tä is, tufw t'at lhip tä imälhehi, ates ihihit'a. Tek lekänchi m'ayhay tä Israel lhayis yen t'amajchetayej Lhawuk tä yen t'awayhata, wet tek let'inhihena.”