Judío lhayis tä hiw'en m'ayek hip'altsenhit'a iyhäj
1Iche ifwala tä Judío lhayis, hin'ol, atsinhay, lhamel t'änpe laka niyatey. 2Lhamel yok:
–Wujpey oles. Olhamel owatlä olhäk, tsi nehläs ilänhen olhamel.
3Iyhäj yok:
–Ihichet'a m'ak chik olhamel otufw. Häp tä tamenej tä on'äype olhäk olafwey lhäy'e owukwey.
4Iyhäj yok:
–On'äype chinaj t'äj oka honhates yämthilek ow'en laha impuestos tä otiskanpe tä rey t'alhpe. 5Olhamel ow'enhahit'a lhamej, lhamel häpehen Judío lhayis wet äp ohäpehen Judío lhayis. Olhamel oles hätet iwoye lhamel leles. Mat ow'en tä nech'e olhamel t'at tä oyen n'okwenkaya oles tä hin'ol lhäy'e tä atsinhay. Tsi iche iyhäj tä pajche iwompe leles tsinhay m'ak chik tufw, wet athana häpehen t'at n'okwenkay. Wet niwohit m'ak chik olhamel ohanej owoyneje, tsi nemhit olafwey iche. Oka honhates nemhit lewuk olhamel.
6Tä oläte m'ak tä wichi yäme, wuj tä owäk ihi 7wet oyen tichunhayaja m'ak chik is chik owoye. Wet tä nech'e ohanej m'ak tä owoye, ofwenho niyatey lhäy'e lech'otfwas tä is chik ileyej tä iwoyeje m'ak tä äytaj häp lepuhfwas. Wet one'tek nilhokej lhaihutwek yämthilek otetshan täja, 8wet oyok:
–Lhek tetshan. N'amel y'akalhi tä y'atiskanpe lhapuhfwas Judío lhayis tä wichi tä w'enha lhamejen yen kwenkaya. Mat athana nech'e amel t'at tä lewomay aiyhäj wet äp yachajiholak äp y'atiskanpe lhamel.
Tä wichi ilät n'oye, lhamel yok tam, tsi ihanhiyejt'a iwoyehlä olhämet chik nichulho. 9Wet äp oyok:
–Isit'a m'ak tä amel lewoye. Wunitay lhaka Dios wet woyaye m'ak tä is alhoho, häpkhilek lhatayhfwas nitiya n'amejen leläkwyhanyaj. 10Häte olham lhäy'e opuhfwas lhäy'e okawos, olhamel ocheyjäntej wichi oka chinaj t'äj lhäy'e lhäk. Athana is chik y'alhokej y'atäyhtej letes häp n'aiyhäj. 11N'achaje lhamel m'ayhay tä lewuhuy, laka honhates, lelafwey, lhäy'e lewukwey. Wet n'atäyhtejen letes, m'ak at chik häpek y'aw'enho n'aji elh, chinaj t'äj, wok lhäk, wok hat'es, wok aceite.
12Tä wichi iläte olhämet, wet yok:
–Olhamel owohiyela m'ak tä lene'tek owoye. Oyachajiyela nilhokej tähestso wet tek ot'alhiyela'pe m'ak at chik häpe.
Tä oläte lhamel lhämettso, ot'äne sacerdotes yämthilek iläte wichi lhämet tä hit'unhatche. 13Häte osichät ow'uy wet oyok:
–Dios iwoynhiyejelana chik isichätej kanhihlä lew'et lhäy'e nilhokej m'ak tä lewuk häp elh chik häpek nimattache lhämet tä hit'unhatchetso. Wet chik Dios isichät kanhi, nemla wo m'ak chik hiw'en.
Wet nilhokej wichi nichulh n'oho wet yok:
–¡Amén!
Wet lhamel iwunit Lhawuk wet iwoye t'at olhämet.
Nehemías lep'altsenyaj tä itiyej wichi
14Täjte veinte nekchämis tä rey Artajerjes ihi leniyatyaj, lham yen n'oye gobernador wet doce nekchämis tä oniyatej Judá. Mat olham lhäy'e opuhfwas olhamel tek owatlä m'ak tä õyen niyatey t'awayhata yämthilek otufw. 15Mat häp gobernadores tä ichun yäm wuj m'ak tä t'alheje wichi. Ifwalapej wichi hiw'enho cuarenta chinaj t'äj yämthilek ichäj lhäk lhäy'e hat'es, wet y'aje lakawos tä lhayen wichi laka niyateya. Mat olham otenhit'a m'ak tä lhameltso iwoye, mat onowaye Dios. 16Wet olhay'amkatej ochumet tä oyenlhi n'olafwek tä Jerusalén lep'ot, wet iyhäj tä ochumyenhay lhamel yenlhi t'at lechumtes. Wet ochäjit'a honhat at chik häpe tä lewuk wichi.
17Wet ichepej ciento cincuenta hin'ol tä tachufwi n'oyej tä ot'ek. Iyhäj häpehen Judío lhayis lhäy'e laka niyatey, häte iche hin'ol tä isikay n'oyehen tä tälhe honhates iyhäj tä tott'ahomche Judá. 18Wet olham t'at tä owo lahaya m'ak tä olhamel otufw. Ifwalapej olhamel otufw w'asetaj, lhäy'e seis tson'atas tä yätajen, lhäy'e afwenchey. Wet tä onchätepej diez ifwalas, iche hat'es tä naya. Wet tä ow'en tä wuj tä atha wichi len'äyij, tek one'tek lhamel tiskanpe m'ak tä olhamel otufw. Olham t'at tä owo lahaya.
19¡Ika Dios, tichunej n'okwe täjtso, häp m'ak tä owoyeje wichi!