Israel lhayis yistho tewok tä Jordán
1Tä ifwala elh tä nech'e fwamlafwaj, Josué yikch'oye Sitim, lhäy'e nilhokej wichi tä Israel lhayis, wet lhamel ihoye tewok tä Jordán. Mat lhamel kamaj tek yistho, wet iwo lakasthaweta tä iwhäye. 2Tajyäme tres ifwalas, wet häp hin'ol tä iyhäj kaniyatey lhamel ilunche wichi, 3wet ifwenho wet yok:
–Chik lew'enche Leví leles tä häpehen sacerdotes tä yikhen tä tilhäjlhi häp Arca tä N'ot'amajchet tä Lhawuk lhämtes ihi, mähena wet hänayla len'äyij. 4Häpkhilek lehanej ihi n'äyij tä is chik lenuyaykwe, tsi ihichet'a elh amel chik nitäfwelche n'äyijna. Mat tetshan olhämet: Yej aletott'ayne häp Arca tä N'ot'amajchet. Ehi un kilómetro tä lemälheche len'äyij.
5Wet Josué tahuyej wichi wet yok:
–A'enay Lhawuk t'amajchetesa, tsi chik nech'e fwala lew'enayhla m'ak tä lham iselkat n'amejen tä yenlhi.
6Wet äp tahuyej sacerdotes wet yok:
–Chumaye Arca tä N'ot'amajchet tä Lhawuk lhämtes ihi, wet achunlä wichi.
Wet sacerdotes tachuma Arca wet ichunlä wichi tä yikhen. 7Wet Lhawuk tahuyej Josué wet yok:
–Tälhe fwalana oayenla häpeya hin'o tä lhäy'e lhip tä len'ohyaj ihi, wet Israel lhayis aiwujyenla. Häpkhilek lhamel hiw'en t'at tä oi'amej, mälhyej tä oiyej naji Moisés. 8Fwenho sacerdotes tä ichäj Arca tä Ot'amajchet, chik lhamel nichäte tewok lhip, is chik tiyäjo t'at wet takasthi inät.
9-13Wet Josué tahuyej Israel lhayis wet yok:
–Lhuyay, ch'ahuyaye Lhawuk Dios lhämet, häp lham tä honhat Lewuk. Häp Arca tä N'ot'amajchet tä Lhawuk lhämtes ihi ichunlach'oye amel yämthilek lhistho tewok. Chik sacerdotes tä tilhäjlhi t'äsi inät, lhaich'esajila tewok wet lhip tä tumej kaphä takasthila. Wet täjtso häpkhila n'otetnek yämthilek lehanayej tä Dios tä n'ilataj i'amejen. Wet chik letiyäjo honhat tä Canaán, kalelhäj tä lham itihiyeja kanhi wichi tä ihi, häp Canaán lhayis, Het lhayis, Hiv lhayis, Ferez lhayis, Gerges lhayis, Amorreo lhayis, lhäy'e Jebús lhayis. Athana tshupyenehen doce hin'ol, weihalhapej tä tälhehen Israel lhayis tä tälhehen letetsel tä ihi doce.
14Wet Israel lhayis yikch'oye lakasthawet yämthilek yistho tewok. Wet sacerdotes tä tilhäjlhi Arca tä N'ot'amajchet tä Lhawuk lhämtes ihi, lhamel ichunlä wichi tä yikhen. 15Häpe t'at lewhäy tä yachuyaj iche, wet häp ifwalastso tewok lakey t'at tä t'ulhpe honhat. Mat tä sacerdotestso t'äsi inät tä iche tewok lhip, 16nech'e takasit inät tä tälh kaphä tä tumejlä hupuy tä atosehen tä lheyis Adam lhäy'e Saretán. Wet lhip tä tumej hichä yik t'at tä tiyäjo Lewomekitaj Nosoy, yäk tamchäy tä wichi yiwithi tä tatayhlä Jericó. 17Wet nilhokej Israel lhayis inukwe t'at tewokw'et tä tamchäy. Wet häp sacerdotes tä ichäj Arca tä N'ot'amajchet tä Lhawuk lhämtes ihi, lhamel takasthen t'at tä ihi lechowej tewokw'et tä tamchäy, pajtha wichi nilhok lhip elhe.