Rubén laka wichi, Gad laka wichi, lhäy'e lechowej Manasés laka wichi, lhamel yäpnhomche lew'etes
1Josué t'äne Rubén kawichi lhäy'e Gad kawichi, lhäy'e lechowej Manasés kawichi. 2Wet tahuyej tä yok:
–Amel lewoyaye t'at nilhokej m'ak tä Lhawuk lakawo Moisés ne'tehtek lewoye, wet äp lewoyaye m'ak tä olham one'tek lewoye. Athana wak'alh t'at. 3Tälhe ifwalas tä tajyämetso yäk häp ifwalana, wet amel tek lhekaych'oye apuhfwas. Let'amajayej t'at häp Lhawuk Dios lhämtes. 4Athana tä wak'alh t'at tä imatitche lhämet p'ante ifwel, wet letamsek ihi t'at apuhfwas, tä mälhyejtso, äplaye haw'etes lhäy'e aka honhates tä Lhawuk lakawo Moisés hiw'en amhohen tä tumej Jordán lhip tä hichä. 5Ämay kalelhäj tä lewoyaye Lhawuk lhämtes wet yej leleyayej, lhäy'e m'ak tä lakawo Moisés ichufwen amejen tä yok, Huminay Lhawuk Dios, nuyaykwe t'at len'äyij wet woyaye lhämtes. Hänlhi wet en Awuka mälhewek ahusek, mälhewek atichunhayaj.
6Tä Josué ileyej tä iwoyetso, wet takäpfwaye lhamel wet iwo tsilhekayej. Wet nech'e yikhen tä yäpnhomche lew'etes.
7Häp lechowej Manasés kawichi pajche Moisés hiw'enho lhamel häp honhat tä lhey Basán tä ihi Jordán lhip tä tumej hichä. Wet iyhäj lhamel Josué hiw'enho honhat tä ihi Israel lhayis kahonhat tä ihi Jordán lhip tä tumej kaphä. Wet Josué takäpfwaye lhamel tä yäple Basán, wet ichen 8wet ifwenho tä yok:
–Amel äplaye aka honhates athana. Chäj akäywet tä wuj, lhäy'e wujpey aläy, lhäy'e oro, plata, bronce, lhäy'e chinaj, lhäy'e wesas tä wuj. Wet w'enhomchela aiyhäj häp m'ak tä lesoyej atayhfwas.
9Tä mälhyejtso, Rubén kawichi lhäy'e Gad kawichi, lhäy'e lechowej Manasés kawichi, lhamel yikch'oye Israel lhayis tä ihi Silo, häp honhat tä Canaán. Wet lhamel yäple laka honhates tä ihi Galaad, häp honhates tä Lhawuk ne'tep'antek Moisés hiw'enho lhamel.
Õyenlhi altar tä iwhäye Jordán
10Rubén kawichi lhäy'e Gad kawichi, lhäy'e lechowej Manasés kawichi, tä lhamel nichäte tewok tä Jordán lhip tä kamaj häpe t'at Canaán, lhamel yenlhi altar tä wuj, itiwhäye tewok. 11Wet iyhäj Israel lhayis ihanch'oye tä lhamel yenlhi altar tä itihi Canaán lepes tä iwhäye tewok Jordán tä Israel lhayis kahonhat. 12Wet lhamel lhaihutwek tä ihi Silo, t'uhläk yike iyhäj yämthilek iwo ka'tshayajayej. 13Mat chunkat ichen Finees, sacerdote Eleazar lhäs, ne'tek ihoye Rubén kawichi lhäy'e Gad kawichi, lhäy'e lechowej Manasés kawichi, tä lhamel ihi honhat tä Galaad. 14Wet Finees ichäj lhamche diez Israel lhayis kaniyatey tä lhamenya. N'äl tä nilhokej t'at Israel lhayis tä wusche'pe y'ajwek letichunhayajay. 15Tä lhamel nichäte Galaad, wet tahuyej iyhäj wet yok:
16–Nilhok Lhawuk kawichi yok, “¿Chipte tä letatayhlä Israel lhayis laka Dios wet letiyayej akanyaj? ¿Chipte tä leleyayej, wet lhenlhi amhohen altar? 17¿Hä lefwetaj let'ayhtejen n'och'isukyajte y'awoye tä y'ehi honhat tä lhey Peor, wet tamenejte wujpey Lhawuk kawichi tä y'inhen? Wet athana kamaj nofwit'a tä in'amejen. 18¡Isit'a m'ak tä lewoye tä leleyayej Lhawuk! Chik letatayhlä Lhawuk fwalana, wet chik fwala lham itihiyeja lewäk häp nilhokej Israel lhayis. 19Chik lew'en honhat tä alewuhuy tä nit'uhawetayej yämthilek len'okwiyej Lhawuk, hoyaye Lhawuk laka honhat tä lew'et tä t'amajchet ihi, wet chumaye lhip wet en haw'eta tä lheyay n'oyejen. Mat yej tatayhlä Lhawuk wet yej tatayhlä olhamel tä lhenlhi elh altar. Tsi pajche iche t'at Lhawuk Dios laka altar. 20Tichunache hin'ohte lhey Acán, häp Zera cheyäs. Lham iwoyehte m'ak tä ni'isa tä t'etane m'ak tä pajche õtkäpfwayeje letäyhyaj, wet tamenej tä Lhawuk itiyej lewäk häp nilhokej Israel lhayis. Ts'ilakhit'a lham Acán tä t'etanyajtso tamenej tä y'il.”
Rubén laka wichi lhäy'e Gad laka wichi, lhäy'e lechowej Manasés laka wichi, lhamel ikalelhtho iyhäj m'ak tä tamenej tä yenlhi altar
21Wet nech'e Rubén kawichi lhäy'e Gad kawichi, lhäy'e lechowej Manasés kawichi, lhamel nichulho Israel lhayis kaniyatey wet yok:
22–¡Lhawuk häpe Dios, inu'pe dios lhayis iyhäj! ¡Lhawuk häpe Dios, inu'pe dios lhayis iyhäj! Lham ihanej m'ak tä tamenej tä olhamel oyenlhi altar, wet äp is chik amel lehanej t'at tä tek ottayhlä häp lham. Chik kamatache olhamel olhämet, mat amel ämtes häpe m'ak tä matche, ¡is chik itäyhthen olhamel! 23Chik matche tä olhamel oleyej Lhawuk wet oyenlhi altar elh häpkhilek oti'pe m'ayhay tä owunho, wok yachuyaj lhay, wok tshätäy tä olänhen häpkhilek olha'isyenhen - chik häp täjtso, is chik Lhawuk yen tesa n'oyejen m'ak tä olhamel owoye. 24Matkat m'ak tä tamenej tä olhamel oyenlhinaj altar, häp tä olhamel onowayek ales, fwalas tä tatäy alhoho, tahuyhiyela olhamel oles wet yohlak, “Y'ajit'a amehen Israel Lewuk Dios. 25Lham hiw'enhat amel wet itumhat amejen lhip elh, wet olhamel otumej lhip elh. Tek ahäpehen Israel laka Dios kawichi.”
“Wet chik mälhhiyejatso, amel ales tamenhiyejak olhamel oles ileyej tä n'okwiyej Lhawuk. 26Tä mälhyejtso, olhamel oyenlhi altar, mat häpkhit'a n'otw'ayhtes chik tamenej tä oyenlhi, wok tshätäy tä owunhomche tä oyen n'okhayajayej chik tamenej. 27Mat is chik häpe m'ak tä lhatetnekej m'ak tä matche tä y'awoyej n'amehen, amel lhäy'e olhamel, pajla'tha nichäte lhales tä lepes lheley, tä äpte olhamel oyen Owuka Israel laka Dios, wet olehiyejt'a tä ohäne lew'et tä t'amajchet tä ihi amel aka honhat häp m'ak tä oyen t'awayhata, lhäy'e tshätäy tä owunhomche, wok olänhen tä oyen t'awayhata yämthilek olha'isyene häp lham. Wet häpkhilek amel ales ihanhiyejt'a iwoyneje yämthilek itiyej lhämet tä ni'isa olhamel oles wet yohlak, Tek alaka wichi häp Israel laka Dios.
28“Wet olhamel oyok, Chik ihichela elh chik iwoynhiyejelatso lhämet chik iti n'oyejen wok itiyej olhamel oles, olhamel onchulhihola wet oyohlak, Lhek yahinya, olhamel ochätilis yenlhi p'ante häp Lhawuk laka altarni. Mat häpkhit'a n'otw'ayhtes wok tshätäy tä owunhomche chik tamenej p'ante tä lhamel yenlhi. Mat häpe n'otetnek tä yäme m'ak tä y'awoyej n'amehen tä n'ahäpehen Lhawuk laka wichi.
29“Ihichet'a olhamel otichunhayaj chik ottayhlä Lhawuk wok oleyej wet tamenej tä oyenlhi altarna, häpkhilek olhamel ow'enhayej wet nemhit otetshan Lhawuk Dios laka altar tä ihi tä lham lew'et tä t'amajchet tatache.”
30Tä sacerdote Finees, lhäy'e Israel lhayis kaniyatey tä yikche, iläte Rubén lhäy'e Gad lhamel laka wichi lhäy'e lechowej Manasés kawichi tä iwoyetso, wet lhamel yok:
–Is t'at.
31Wet nech'e Finees tahuyej lhamel wet yok:
–Athana nech'e matche tä olhamel ohanej tä Lhawuk in'amejen, tsi amel tek letatayhlä häp lham. Tä mälhyejtso, lefwayhtejen lhaka wichi häp Lhawuk tasnhayaj.
32Tä lhamel ileyej tä iwoyetso, wet Finees lhäy'e iyhäj tä yikche, lhamel yikch'oye honhat tä Galaad wet yäple laka honhat Canaán. Tä nichäte, wet ifwenho Israel lhayis häp iyhäj lhämtes. 33Tä lhamel iläte, wet yok:
–Is t'at.
Wet lhamel iwunit Dios. Tälhe täjtso lhamel nemhit yen tichunhayajak iwohla ka'tshayajayej häp Rubén lhäy'e Gad lhamel laka wichi yämthilek iwasthi laka honhates. 34Wet Rubén leles lhäy'e Gad leles, lhamel itihi altartso häp lhey tä yok, N'otetnek. Tsi häpe n'otetnek tä yäme tä lhamel lhäy'e nilhokej Israel lhayis iyhäj y'ajwek letichunhayaj wet yok, “Lhawuk häpe Dios.”