Israel lhayis ikalhi Amorreo lhayis
1-2Adonisedec, niyat tä ihi Jerusalén, lhäy'e lhip tä lenowayhyaj ihi tä ihanej tä Josué ikalhi wet itäyhat häp hupuy tä lhey N'owastsek, wet m'ak tä iwoyeje hupuy lhäy'e laka niyat itech'aynej t'at m'ak tä iwoyeje Jericó. Häte ihanch'oye tä Gabaón lheley lhamel lhaip'ajtej Israel lhayis wet iyej t'at lhamel. Wet häp tä Adonisedec lhäy'e lhip tä lenowayhyaj iyej tä ihanch'oye täjtso, tsi Gabaón häpe t'at hupuy tä wuj wet inu'pe häp N'owastsek. Lhäy'e lhip tä lewujyaj ihi, häte hin'ol tä ihi häpe wichi tä takhajayhen. 3Tä mälhyejtso, Adonisedec ichene lhämet niyatey iyhäj, häp niyat tä ihi Hebrón tä lhey Hoham, lhäy'e Piram tä ihi honhat tä lhey Jarmut, lhäy'e Jafía tä ihi Lakis, lhäy'e Debir tä ihi Eglón. Wet yok:
4–Lhuyay, ch'ot n'oye yämthilek ottayhlä Gabaón, häp tä lhamel lhaithate Josué lhäy'e laka wichi Israel lhayis.
5Tä mälhyejtso, häp cinco niyateytso tä häpehen Amorreo lhayis, lhamel lhaip'ajtitwek, lhäy'e laka nifwotas, wet yikhen tä tiyäje Gabaón. Tä nichäte, iwo lew'etawhäye tä lhaiwaklhathen yämthilek inuye. 6Wet häp wichi tä ihi Gabaón ichene lhämet Josué tä ihi Gilgal, wet yok:
–Yej fwun n'oyehen tä akawos n'ohen. Mat ch'ot n'oyehen, ho n'oyehen thahya wet fwayhat n'ohen. Tsi nilhokej Amorreo lhayis kaniyatey tä iche chenhas, lhamel lhaihutwek yämthilek inu n'oyehen.
7Tä mälhyejtso, Josué lhäy'e nilhokej laka nifwotaj, lhäy'e hin'ol tä takhajayhen, lhamel yikhen tä ihoye. 8Wet Lhawuk tahuyej Josué wet yok:
–Yej nowaye lhamel. Olham oyachaj amehen. Ihichet'a elh chik häpek ihanhiyeja iwoyneje yämthilek ikalh amhi.
9Wet lhamel yikhen tä honatsi wet iselkat Amorreo lhayis tä inuye. 10Wet Lhawuk istun lhamel, wet yikhen tä inukwe alhoho tä nowaye Israel lhayis. Wet wujpey lhamel tä Israel ilänhen tä ihi Gabaón. Wet lhamel ihän iyhäj tä inukwe n'äyij tä tälhe Bet-horón, wet äp ilänhen yäk nichäte N'ojäkw lhäy'e Makeda. 11Wet tä Amorreo lhayis yikhen tä inuhihchä lhip tä nistakchä tä tälhe Bet-horón, Lhawuk itsäype kalatu tä wus tä tälh puleye. Wet ilänhen wujpey Amorreo lhayis, inu'pe tä Israel lhayis ilänhen.
Ifwala takasit
12Wet häp ifwalatso tä Josué hiw'en tä Lhawuk tach'ote Israel lhayis yämthilek ikalhi Amorreo lhayis, wet tahuyej Lhawuk tä ihi tä Israel lhayis tatache, wet yok:
“Ifwala, kasit tä lhe'pe Gabaón,
wet iwel'a, kasit tä lhehi chenhas kawayhi tä Ajalón.”
13Wet ifwala takasit wet iwel'a ihi tä ihi,
pajtha Israel lhayis ikalhi letayhfwas.
Wet häp n'olesaynek tä ihi lehi tä tälhe Jaser, häp tä yäme täjtso, tä ifwala takasthi lechowej pule yäk w'awulhej tä ifwala tefwajni. 14Ihichet'a ifwalak mälhyej iwoye täjtso, tälhe tä nech'enyaya yäk nämena, tä Lhawuk tach'ahuye hin'o. ¡Tsi Lhawuk matche tä iwo laka'tshayaja wet tach'ote Israel lhayis!
15Tä Josué lhäy'e laka nifwotaj ileyej p'ante laka'tshayaj, lhamel yäple lakasthawet tä ihi Gilgal.
Josué ilänhen häp cinco niyatey tä Amorreo lhayis
16Häp cinco niyatey tä oyämetso lhamel fwetaj ilethanhen, wet y'uche chowej tä ihi chenaj tä ihi Makeda. 17Mat tä paj õhw'en tä ihi chowej, wet õ'fwenho Josué. 18Tä iläte, wet yok:
–P'oyeji tuntey tä wus häp chowej tä lhamel ihi. Wet is chik iche iyhäj tä t'uye häpkhilek ninuyakwephä. 19Wet amel yej takasthen, mat mähen, hänay lhatayhfwas wet istejlä lhamel. Yej tach'anlhaye tä fwetaj yäpnhomche lew'etes, tsi Lhawuk Dios yachaj amehen.
20Wet Josué lhäy'e Israel lhayis ikalhi Amorreo lhayis wet wujpey tä ilänhen, mat iche iyhäj tä ilethane hupuy tä lew'etes. 21Mat Israel lhayis newache elh chik tatäy lhamel, wet tapile Josué tä ihi Makeda. Wet tälhe ifwalatso newache wichi chik itiyej lhämet häp Israel.
22Wet nech'e Josué tahuyej laka wichi wet yok:
–Fwoyenpe häp chowej tä ihi chenaj wet tonphä cinco niyatey tä lep'ohi.
23Wet Israel lhayis ifwoyenche chowej tä lhamel hip'oyeji tuntey, wet itonphä cinco niyateytso 24wet ihäne Josué. Wet lham t'äne nilhokej hin'ol wet ifwenho nifwotaj kaniyatey tä iyej lhamel wet yok:
–¡Lhuyay amel, äspe lew'ol häp niyateyna!
Wet lhamel iwoye, t'äspe. 25Wet nech'e Josué ifwenho lhamel wet yok:
–¡Yej nowayay wet yej t'ayhatchä akhajyhayaj! ¡Akhajyenhen wet otle t'unhatay, tsi Lhawuk iwoynhiyejela täja nilhokej atayhfwas!
26Tä Josué ileyej tä iwoyetso, wet nech'e ilänhen häp niyatey, wet ne'tek õ'fwuhatwethä tä ihiche hal'äy pajtha honaj. 27Wet tä ifwala y'uy ne'tek õ'lanche tä ifwuwethä wet õ'iskonche chowej tä pajche lhamel y'uche. Wet sip'äl iwoye, wet hip'oyeji tuntey tä wus, wet ifwalasna kamaj ihi t'at.
Israel lhayis ikalhi hupuy iyhäj tä tumej Canaán lhip tä tapinhiye
28Häp ifwalatso Josué lhäy'e laka nifwotaj ikalhi hupuy tä Makeda. Wet ilänhen nilhokej wichi tä ihi yäk nofwej, niwohit elh chik imälhehi. Wet häp Makeda laka niyat, Josué itech'aynej m'ak tä iwoyeje Jericó laka niyat.
29Wet Josué tälhe Makeda, lhäy'e nilhokej Israel lhayis, wet yike hupuy tä lhey Pelaj wet inuye. 30Häte Lhawuk tach'ote lhamel yämthilek ikalhi wichi tä ihi, lhäy'e laka niyat. Wet Israel lhayis ilänhen nilhokej, niwohit elh chik imälhehi. Wet niyat tä ihi, Josué itech'aynej Jericó laka niyat.
31Tä lhamel ileyej Pelaj, ihoye hupuy tä lhey Lakis. Tä nichäte, lhamel iwo lew'etawhäye, wet nech'e lhamel inuye. 32Tä ifwala elh Lhawuk yachaje lhamel häp hupuy, wet lhamel ilänhen nilhokej wichi tä ihi. Itech'aynej m'ak tä iwoyeje Pelaj, niwohit elh chik imälhehi. 33Wet Horam, niyat tä ihi Gezer, yik lhäy'e laka nifwotaj yämthilek tach'ote Lakis. Mat häte Josué ikalhi lhamel, wet Israel lhayis ilänhen nilhokej wet nofwej.
34Wet Josué lhäy'e laka nifwotaj, lhamel tälhe Lakis wet yike hupuy tä lhey Eglón. Tä nichäte, lhamel iwo lew'etawhäye, wet nech'e lhamel inuye. 35Ifwalatso lhamel ikalhi, wet ilänhen nilhokej wichi tä ihi yäk nofwej. Itech'aynej tä iwoyeje Lakis.
36Wet lhamel tälhe Eglón wet yike hupuy tä lhey Hebrón. Wet inuye 37wet ikalhi, wet ilän niyat tä ihi, lhäy'e nilhokej wichi, lhäy'e wichi tä lew'etes tott'ahomche. Iwasthi hupuy, wet niwohit elh chik imälhehi, nofwej t'at, mälhyej iwoye Eglón.
38Wet Josué lhäy'e laka nifwotaj, tä lhamel ileyej Hebrón tä iwasthi, lhamel yike hupuy tä lhey Debir. Wet inuye 39wet ikalhi, wet ilän niyat tä ihi, lhäy'e nilhokej wichi, lhäy'e wichi tä lew'etes tott'ahomche. Israel lhayis ilänhen yäk nofwej, niwohit elh chik imälhehi, mälhyej iwoye wichi tä ihi Hebrón lhäy'e Pelaj lhäy'e laka niyatey.
40Mälhyejtso tä Josué ikalhi imälhewek honhattso. Ikalhi niyatey tä ihi chenhas, lhäy'e tä ihi ts'anis tä Négueb, lhäy'e tä iche honhat tä w'awulhchä, lhäy'e tä yen w'etesa lhipey tä nistakchehchä. Israel lhayis ilänhen nilhokej wichi wet niwohit elh chik imälhehi. Nilhokej y'inhen, mälhyej tä Israel Lewuk Dios ne'tek õ'woyeje. 41-42Weihalhache t'at tä Israel lhayis iwo ka'tshayajayej niyatey tä ihi honhattso wet ikalhi nilhokej laka honhates, tälhe Kadés-barnea yäk Gaza, lhäy'e imälhewek honhat tä Gosén yäk nichäte hupuy tä Gabaón. Tsi Israel Lewuk Dios iwo ka'tshayaja wet tach'ote lhamel.
43Tä Josué lhäy'e laka nifwotaj ileyej p'ante laka'tshayaj, lhamel yäple lakasthawet tä ihi Gilgal.