Job tumeje lakalay'is lhämtes
1Job nichulho wet yok:
2“¿Chihlatek leleyayej tä lelhaklitn'o
wet lelän n'oyej ämtes?
3Lhachajlhaho tä leläkwlhin'o.
¿Hä len'äfwelhit'a tä lewoynayejetso?
4Tejin'ek matche tä otes ihi thayej,
y'ajit'a amehen.
5Lhenayet che amel ha'isyaj tefway n'o'pe.
Lhenay n'oye elh tä letes ihi
wet lhoyaykwe, Häp tä aiwit'äyen.
6Mat ofwel amhohen tä Dios t'at tä yatchenlhin'o,
tsi ikäfwellhi n'ohi laka niyhäy.
Job fwetaj Dios itech'aynej elh tä häpe letayhfwa
7“Che ot'än wet oyok,
¡Leyej aka'tshayaj tä leti n'oyej!,
niwohit täjche nichulh n'oho.
Che ot'alhch'oye och'otyaj,
wet newache elh che hip'altsenn'o.
8Dios hip'ohi on'äyij
häpkhilek n'am nukwe,
wet äp itihi honataj on'äyij.
9Itäyhat t'at owujyaj,
wet nech'e wichi yenn'o w'et m'ayeka.
10Matche tä iwasit at n'okwe,
nemhit oniwhayaj ihi,
otet iwoye hal'ä tä lefwettsil nämche.
11Iti n'oyej lewäk,
tet iwoye itäj tä y'uho.
Itech'ayen n'oyej elh tä häpe letayhfwa.
12Imälhewek laka nifwotaj inu n'oye,
ilunejlhi t'at owukwe tä iti n'oyej laka'tshayaj.
Job lepuhfwas lhäy'e lakalay'is nemhit ihumin
13“Dios itonte n'ohlä
opuhfwas lhäy'e okalay'is.
Itech'ayen n'oyej elh tä w'enha lhamej.
14Wichi tä oiyhäj itiyejn'o kanhi,
wet okalay'is hip'ethet n'ohlä.
15Wichimhaj iyej ow'et,
lhäy'e okawos tsinhay,
lhamel yen n'oye elh tä w'enha lhamej,
tet häp che nitäfwela n'oyej.
16Che ot'äne okawo, nichulhiya t'at,
tej che onityen at thayej.
17Che otott'aye och'efwa,
takawoy n'ohlä,
wet opuhfwas ikokyen n'oye.
18Tej tä n'atfwas,
tha iläkwlhin'o.
Häpet che onephä,
tha iwoyej at n'oye lhämtes tä ni'isa.
19Okalay'is tä lhamenya y'ulhan'atn'o,
wet iyhäj tä ohumnhay tatay n'ohlä.
20Olopen, ts'ilak ot'äj tä i'pe olhiley.
Tatäynaj lhimphaj che nem oiche,
owit'äyhyaj yämet'atn'o.
21P'altsenn'o, amel tä oalakalay'is,
p'altsenn'o tsi Dios tä ichätyen n'o'pe takwey.
22¿Chipte tä letenay Dios tä lelhaklitayn'o?
¿Chipte tä kaleyayej tä lelän n'oyej ämtes?
Atet iwoye hin'ol tä teskanej m'ak tä ikänchä.
Job ihanej tä lech'otfwa iche
23“¡Is t'at che iche elh
tä ilesayen olhämtes wet itihi lehi!
24¡Is t'at che iche elh
tä hiw'en chinaj tä tijejo tunte,
häpkhilek olhämtes nittäya!
25Ohanej tä Och'otfwa iche,
wet che lepese häpkhila t'at okachiw'et.
26Wet tej che nofw ot'isan thayej,
tä kamaj oiche ow'enla t'at Dios.
27Ottelhoy hiw'enla t'at,
ontäfwenhiyeja tä häpe lham.
“T'ayhchä okhajyhayaj
28tä olät amehen tä lhoyaykwe,
¡Lham t'at tä tamen lhamej!
¡N'en tesayej!
29Mat olham oyok,
Is che amel tä lenowayaye
Dios lefwajnhat tä häpe lakalelhthayaj.
Itiyej lewäk häp wichi,
tsi lham t'at tä N'okalelhthayaj Lewo.”