Wichi t'alhe Jeremías chik y'alhyene Lhawuk
1-2Nilhokej sip'älis kaniyatey lhamel ihoyehte häp profeta Jeremías, wet Johanán tä Karea lhäs iyej t'at lhamel, lhäy'e Azarías tä Osaías lhäs. Wet nilhokej wichi tä len'ohyajay ihiche lhäy'e iyhäj tä laj len'ohyaja, häp tä yikche lhamel. Wet lhamel tahuyej Jeremías wet yok:
–Iche m'ak tä olhamel ot'alhej ame. Woye tä owoye, alhyen n'oyehen Lhawuk Dios. Is chik tach'ot n'oyehen, nemhit onitäkw tä omälhehi. 3Ap'altsene Lhawuk häpkhilek ipäyen n'oyehen häp n'äyij tä is chik olhamel onukwe lhäy'e häp m'ak tä lham ihuminche chik owoye.
4Jeremías nichulho lhamel wet yok:
–Is t'at. Ot'alhiyela Lhawuk Dios, ofwenhihola m'ak tä amel lewatläk ofwenho. Chik nichulh n'oho, owohla siläta amejen. Tek oskatla amhohen häp lhämet chik häpe.
5Wet lhamel yämeje Jeremías wet yok:
–Is chik Lhawuk Dios lham t'at tä hiw'enla m'ak tä olhamel owohiyela, wet tatayhla n'ohlähen chik olhamel n'am woye lhämet chik ifwel amho chik lewohla siläta n'oyejen. 6Chik häpkhila lhämet tä olhamel ohuminche, wok tej chik n'am huminche, olhamel owohiyela t'at, tsi häpe alhyaj tä Lhawuk nichulho, häpkhilek oisen wet lajit owit'äyhyaja.
Lhawuk ne'tek wichi imälhehi Judá
7Tä nichäte diez ifwalas, wet Lhawuk nichulho Jeremías. 8Häp tä t'äne Johanán, Karea lhäs, lhäy'e nilhokej häp sip'älis kaniyatey tä iyej, wet lhäy'e nilhokej wichi, lhamel tä len'ohyajay ihiche lhäy'e iyhäj tä laj len'ohyaja. 9Wet yok:
–Lhawuk tä Israel laka Dios tä amel let'uhläk ofwenho m'ak tä let'alheje, lham yok, 10“Chik amel lhenla haw'eta honhatna, oaineyhthichephäla, tek oaitäyhthihena. Oyämla kalelhäj tä haw'et, osohit'ala amejen. Tsi wuj tä oyen lhakliya tä ochente amehen awit'äyhyajay. 11Yej nowaye Babilonia laka rey, tsi ow'en tä lenowaye. Oyok, yej nowaye, tsi olham oi'amejen häpkhilek ofwayhat amejen lakhajyhayaj. Olham tä Awukn'o olhämet täjtso. 12Olham otihla amejen op'altsenyaj wet ow'enhihola letichunhayaj tä aip'altsenhen, häpkhilek iwahin amejen chik lemälhehi aka honhatna.”
Lhawuk n'äyejo wichi chik ilethane Egipto
13“Mat chik amel lhok, Olhamel okalhihit'a chik oyen w'eta honhatna, wet häp tä lewohiyet'a Lhawuk Dios lhämet tä ifwel amhohen. 14Wet chik lhohlak, Kha, is chik n'amel n'ahoye häp honhat tä Egipto, tsi häp tä n'oka'tshayaj newahi wet nemla y'aläte lepak häp n'ofwol tä n'oka'tshayaj lefwol, wet äpte nemla nehläs n'ailänhen, 15chik mälhyej'attso ämet, is chik amel tä ahäpehen iyhäj tä imälhehi Judá, letach'ahuye m'ak tä ifwel amhohen häp Lhawuk tä laj letumfwaya tä häpe Israel laka Dios. Tsi chik lhekhen wet lehoyaye Egipto häpkhilek lhenayhla haw'eta, 16wet n'oka'tshayaj tä lenowayhlä t'uhikwela t'at amel chik lhehi Egipto, lhäy'e häp nehläs tä wuj tä lenowaye, wet let'inhihena t'at chik lhehi honhattso. 17Häp tä mälhhiyejatso, nilhokej häp wichi chik ihoye Egipto tä fwetaj ilethane, õ'länhihena tä ihi n'oka'tshayaj, wet y'inhiyejena nehläs lhäy'e häp äytes. Wet ihichet'ala elhaj chik imälhehi, tsi niwohit elh chik tefwayhiyeja lhamel lewit'äyhyaj chik ochenhiyela.
18“Lhawuk tä laj letumfwaya, Israel laka Dios, yok, Chik amel lehoye Egipto, äytajichela owäk tä oti amejen, tehlat iwoye täjte otiyej wichi tä Jerusalén lheley. Wet elhlat chik häpe tä i'pe honhat chik t'uhläk elh lewit'äyhyaj ihi, yohlak, Is chik atet iwoye wichi tä ihoye Egipto tä fwetaj ilethane. Wet matche tä tanhoch'ayhla awit'äyhyaj wet wichi ayenlat leläkwika. Wet nemla yachajo chik lew'en honhatna.”
19Wet Jeremías äp yok:
–Amel tä aJudá lheley tä kamaj leläyhiche, Lhawuk yämlhi amhohen tsi ihuminhit'a chik lehoye Egipto. Nech'e amel lehanej, ofwel amhohen ifwalana. 20Amel t'at tä lew'en amhohen awit'äyhyaj tä let'uhläk ohoye Lhawuk Dios wet lhoyay, “Is chik let'alhyen n'oyehen Lhawuk. Wet chik ifwel amho lhämet, wola siläta n'oyejen häpkhilek owoye.” 21Wet olham ofwel at amhohen ifwalana häp Lhawuk lhämet tä t'uhläk owo siläta amejen, mat amel lewohiyet'a. 22Wet häp tä is chik lehanayej t'at tä n'oka'tshayaj aihänlatwethä, õ'ailänhihena, wet let'inhiyejena nehläs lhäy'e häp äytes chik lhehi honhat tä let'uhläk lhen haw'eta tä lefwetaj lelethane.