Dios laka wichi tapinhiyela honhat tä lew'et
1Lhawuk yok:
“Chik nichäte lewhäytso,
olham ohäpkhila nilhokej wichi
tä Israel lhayis laka Dios,
wet lhamel häpkhila t'at oka wichi.
2Häp ifwalaste Israel lhayis ihi ts'anis,
otiyej op'altsenyaj häp wichi tä tefwayej n'ot'ilek.
Täjte lhamel t'ukwe lhip tä letamsek ihi,
3olham olhain'ältej lhamel.
Israel lhayis, oaihumin t'at
wet ohumnhayaj tatäyhit'a amejen.
Häp tä tamenej tä olehichet'a
op'altsenyaj tä oti amejen.
4Oainech'aynhihila,
lhachajiholak letachuma n'okäjyaj lechal
wet letakatinhiyejawethä.
5Lhachajiholak letihchä uvas
tä i'pe tachenhas tä ihi Samaria,
wet lhamel tä itihchä
akäjiyejlhila tä tuj lhay.
6Tsi nämla ifwala tä silätwos
iwo lepaka tä i'pe tachenhas
tä ihi Israel lhip tä lewuk
wichi tä tälhe letes Efraín.
Lhamel yohlakwe, Lhuyay,
n'ahoye Sión tä Lhawuk Dios lew'et.”
7Wet Lhawuk äp yok:
“Achoywethä tä lewo akäjyaja'pe Israel lhayis,
häp wichi tä lhamenya tä lhetekej honhatil iyhäj.
Fwitsenej achoslis tä lewunit Lhawuk wet lhok,
Lhawuk tä ifwayhat laka wichi,
ifwayhthen häp Israel lhayis tä imälhehiche.
8“Onachajihola lhamel laka honhat,
otälhthiyela lhamel honhat tä tumej tafwojyhiye
lhäy'e häp honhatil tä wuj tä atosehen.
Wet asnamis lhäy'e tsufwlas nekhichela lhamel,
lhäy'e atsinhay tä hich'otshanhen
lhäy'e iyhäj tä pajche iwo lelesa,
pajla'tha wujpey.
9Chik lhamel nekche len'äyij,
iwohla t'alhyaja tä häpe t'at lhafwyhayaj.
Ohänhiyela inät tä ihiche lew'etes,
ohänhichela n'äyij tä w'awulhchä
häpkhilek newache m'ak chik tanhäphänej.
Tsi olham t'at tä Israel Lajcha
wet Efraín häpe t'at olhäs tä ochunkatsek.
Dios laka wichi akäsiyejawethä m'ak tä wuj tä is tä ihiyeja lhamel
10“Amel tä lhehiche honhatil,
ch'ahuyaye olhämtes
wet wo silätaye lhipey tä atosehen.
Tsi olham ofwtsatkatte'pe honhat häp Israel lhayis,
mat ohutlawek wet ot'uhiyela,
otehlat iwoye tson'ataswo tä t'uye leläy.
11Ofwayhthiyeja Israel lhayis
wichi tä inu'pe lhamel
tä wuj tä lakhajyhayaj ihi.
12Chik nämhen, wet ihohla'pe tachenaj tä Sión
wet itenla letenek tä häpe lakäjyaj.
Tsi akäsiyejawethä m'ak tä wuj tä is tä ow'enhomche,
häp yachuyaj lhay, hat'es,
aceite tä tälho olivo,
lhäy'e leläy tson'atas lhäy'e w'asetas.
Lhamel mälhhiyejat iwoye
n'okäsw'et tä õ'tsäype inät, w'atshan.
13Atsinha lhutshay takatinhiyejawethä lakäjyaj,
lhäy'ehila mamses wet lhäy'ehila iyhäj tä lewumhay.
Ow'enhihola lhamel lakhajyhayaj wet okäsyenlawethä,
nemla lhafwyhayaj ihi wet nofwila lefwitajayaj.
14Nech'e oyämla is m'ak tä sacerdotes tuj,
wet oka wichi hiw'enla lhäk tä naya.
Olham tä Lewukn'o olhämet täjtso.”
Israel lhayis lhafwyhayajay. Lhawuk itiyej lep'altsenyaj lhamel
15Lhawuk yok:
“Pitsaje n'opak tä tumho Ramá
tä häpe n'olhafwyhayaj lhäy'e n'olhakli tä wuj.
Häpe Raquel tä tafwlhi tä y'äyen leles,
wet tek t'uhläk wo elh chik tach'oteje lelhakli,
tsi nemhit ichehen.”
16Tha häp tä Lhawuk yok:
“Raquel, is chik leleyej tä letafwlhi,
yej tsäyhchä atet'ilis.
Tsi häp tä atichunhayaj
tä wuj tä i'amej laha ihichela
wet ales tapinla tä tälhe letayhfwas kahonhat.
Olham tä Awukn'o olhämet täjtso.
17Iche aniwhayaj, lewhäy tä letatachena,
ales nech'e tapinhihola laka honhat.
Olham tä Awukn'o tä owoyetso.
18“Oläte naji Israel lhayis
tä nilhak'alwethä tä yok,
Olhamel omälhyejte iwoye tolo lhäs tä kan'ofwihtseka,
mat am, Iwuk, nech'e lefwihat n'ohen.
Nachajn'o ame, tsi ahäpe Dios tä olhamel Owuk.
19Matche t'at, olhamel olehte amej,
wet tä paj owo ohusey iyhäja.
Tä ohan lhamejen tä och'isukyaj ihiche,
wet häp tä ofwitsenej tä onhäpäj olheche
tä oyen tetnekayej tä olhaifwonwethä.
Olät lhamehen tä on'äfwlhi ihiche,
olhay'ayhatchehchä,
tsi owoye och'isukyajay tä kamaj omamses.
20“Israel lhayis häpe t'at oles tä ohumnhay,
matche tä ohumin lhamel.
Tej tä ottayejlä olhämet,
mat kamaj ontichunpejch'oye lhamel.
Ohusek yen at lhakliya,
wet wuj tä op'altsenyaj iyej lhamel.
Olham tä Lewukn'o olhämet täjtso.
Wo tetnhayache n'äyij
21“Israel lhayis,
lhek tetshan n'äyij tä letiyäjche,
wo tetnhayache häpkhilek ni'athaya
ifwalak häpe chik letapilche.
Israel lhayis, tapilayho haw'etes tä pajche.
22¿Chihlatek leleyej tä lelun'atwethä
wet nemhit letach'ahuwethä?
Olham tä Awukn'o nech'e oyenlhi
m'ak tä nech'ayek tä i'pe honhat,
tehlat iwoye atsinha tä t'uye hin'o.”
Lhawuk inachajihola lew'et Israel lhayis
23Lhawuk tä laj letumfwaya tä Israel laka Dios yok:
–Olham owohla elha m'ak tä otiyej Judá lheley wet onachajihola honhat tä lew'et. Chik näme, yohlak, “Is chik Lhawuk takäpfwaye tachenaj tä t'amajchetna tä n'o'isyaj lew'et.” 24Wet wichi tä lechumet yachuyaj, lhäy'e tson'atas lewos, lhamel yenla lew'eta Judá. 25Wet ow'enhihola lhäk tä naya lhäy'e m'ak tä iyäyej häp iyhäj tä laj lakhajyhayaja tä y'enhen.
26Tä on'om, wet oyahinphä, oka nahati nofwi.
27Lhawuk lhämet yok:
–Nämla ifwala tä oyämla wujpey wichi lhäy'e leläy tä ihi Israel lhäy'e Judá. 28Ifwalas tä tajyäme, oyahinpe lhamel häpkhilek okänchi wet oyokweschephä tä ihiche lew'etes. Matche tä otiyej lewit'äyhyaj lhamel. Mat chik ifwalas tä tatay alhoho, oyahnhila'pe lhamel häpkhilek oneyhatchephä wet oyäm kalelhäj lew'et. 29Chik nichäte lewhäytso, nemla õyok, “Hin'ol tuj uvas tä nosoy wet leles tsotey äytes, tasip'ilej.” 30Tsi elhlak häpe chik tuj uvas tä nosoy, lhamlak tasip'ilej. Wok oyok, elh chik iwo lech'isukyaja, lhamlak y'ilej.
31Lhawuk yok:
“Nämla fwalas tä oyenhilhila
elh olhämet tä nech'ayek
chik owohiyejela wichi tä Israel lhayis
lhäy'e Judá lhayis.
32Tek hätehla iwoye olhämette owoyeje lechätilis,
tä otsok takwey tä otälhtho honhat tä Egipto.
Tsi häp tä lhamel niwoyaye olhämet,
tej tä ohäpe Lewuk.
Olham t'at tä owoyetso.
33Mat chik ifwalas tä tatay alhoho,
olhämet tä owohiyejela Israel lhayis häp täja:
Otiyäjaynhihola letichunhayajay häp olhämtes,
wet olesaynhihila lehusey.
Wet ohäpkhila laka Dios,
wet lhamel häpkhila oka wichi.
34Nemla iwatläk elh ichufwenej
lepuhfwa wok elh at chik häpe
häpkhilek nitäfwel n'oyej tä ohäpe Lewuk.
Tsi nilhokhiyeja lhamel chik nitäfwenhila n'oyej,
elh tä laj len'ohyaja
yäk nichäte elh tä len'ohyaj ihi.
Otäyhthiyeja m'ak tä ni'isachehen tä iwoye,
wet nemla oyen tichunhayaja lesukyajay.
Olham tä Lewukn'o olhämet täjtso.”
35Lhawuk yenlhi p'ante ifwala yämthilek ihutunpe honhat, wet iwel'a lhäy'e katetsel häpkhilek ihutunho honatsi. Hiw'ahhathi lewomekitaj wet n'äl p'äjp'äjtas tä lepak ihi. Elh tä lhenhay m'ayhaytso häpe t'at Lhawuk tä laj letumfwaya, wet lhämet yok:
36–Tä kamaj m'ayhaytso iche, tek olehiyeja tä oyen oka wichiya häp Israel lhayis. Olham tä Lewukn'o olhämet täjtso. 37¿Hä hin'ol ihanej tä iwo kaw'awlhanhatayej pule? Kha, ihanhiyejt'a. ¿Hä ihanej tä tiyäj honhatch'oye pajtha nichäte lefwetes? Kha, ihanhiyejt'a. Wet häp tä tetso, tej tä Israel lhayis iwo lakeyisa thayej, olham ohanhiyejt'a chik owom lhamel. Olham tä Lewukn'o tä owoyetso.
38“Nämla ifwala tä oka hupuy Jerusalén õ'nech'aynhihila, tälhiyela Hananel laka hup tä atojphä pajla'tha nichäte lepe tä ihi letselhä. 39Wet línea tälhiyela täja wet tiyäjiyela tachenaj tä lhey Gareb, chik tefwayej wet tatsayhiyela Goa. 40Wet nilhokej honhat lhip tä lhey Ben-hinom tä n'op'itseyhayw'et lhäy'e tä õ'thatho mok'otaj, nech'e häpkhila honhat tä ot'amajchet, lhäy'e häp honhat lhipey tä ischephä pajla'tha nichäte tewok lhäsaj tä lhey Cedrón, wet äp tiyäjiyela lepe tä yel'atas inukwe tä tumej lhip tä ifwala tälhche. Tsi häp tä Jerusalén nemla yachajo tä õ'wasthi.”