Elh Lhawuk lhämet tä ithate Judá laka rey lhäy'e laka wichi
1Lhawuk yäm n'oye tä yok:
–Hoye häp Judá laka rey lew'et wet fwenho olhämetna 2häp lham tä ihi n'oniyatyajw'ette David ihi, lhäy'e leniyatfwas, lhäy'e wichi tä Jerusalén lheley. Olak, “Lhek ch'ahuyaye Lhawuk lhämet tä yok, 3Woyaye akalelhthayaj tä is alhoho wet fwayhtej wichi häp iyhäj tä t'uhläk ikanejen lhamel. Yej lhaklitwethä wichi tä w'enha lhamejen, lhäy'e iyhäj tä chipenhas, lhäy'e tesalis. Yej wo m'akayej lhamel wet yej länhen wichi tä laj letesa tä ihi lhipna.
4“Chik amel lewoye olhämtesna, ihichepeja reyes tä ihi n'oniyatyajw'ette David ihi, wet lhamel tiyäjichela awukwena lepelis. Lhamel nekhichela kaletas tä n'oka'tshayajchal, wet ihla'pe yel'atas, wet leniyatfwas lhäy'e wichi iwohla t'unfwaya. 5Mat chik katach'ahuyaye olhämtesna, oyok, matche tä nemla is hupna, wasihila. Olham tä Awukn'o olhämet täjtso. 6Tsi tej tä oyen häpeya hup tä isilataj, tet iwoye honhat tä Galaad tä isilataj, lhäy'e häp tachenhas tä ihi Líbano tä isis, tha häp tä oyenla ts'anisa wet nemla wichi ihi. 7Ochenla ame wichi tä n'otäyhyajwos tä tatayhiyeja ahilä laka'tshayajchal, wet lhamel yisthenla lech'utey tä isis wet iskonla'pe itäj.
8“Wet wichi tä tälhe iyhäj honhatil nekhila lhipche hupuyna, elhpej tay'ätshanhiyela elh wet yohlak, ¿Chiwoye Judá lheley? ¿Atsi m'ak tä tamenej tä lewuk dios itiyej lewit'äyhyaj lhamel laka hupuy tä wujna? 9Wet nichulhihola tä yok, M'ak tä tamenej häp tä lhamel ileche lewuk lhämtes wet n'okwiyej dios lhayis iyhäj wet yen lewuhuya.”
Lhawuk lhämet tä yämeje rey Salum tä lhey elh Joacaz
10-11Yej t'äyenay rey Josías tä ileyej honhat.
Yej tafwlhi'pe lep'itsek.
Mat is chik let'äyenay häp lhäs Salum,
ämay äytaji afwyhayaj,
tsi häp tä yik tä õ'häne honhat tä kalew'eta,
wet nemla tapil, nemla yachajo
tä hiw'en laka honhat.
Häp täja Lhawuk lhämet tä yämeje lham Salum, Josías lhäs tä Judá laka rey tä icheyäjohte lajcha leniyatyajw'et, wet äp yikch'oye honhatna. Lhawuk yok:
–Nemla tapil. 12Tajlhama tä lep'itsek ihihla honhatte õ'chäje, wet nemla yachajo chik hiw'en honhatna.
Lhawuk lhämet tä yämeje rey Joaquim
13“¡Awit'äy ihihila!
Tsi tä lhenlhi awukwe
tä aniyatyajw'et wet letonitphä,
wet let'isej t'at m'ak tä ni'isa tä lewoye
tä lechumyenwethä iyhäj
wet letisichet'a'pe lechumet.
14Lhok, Oyenlhi lhamho
owukwe tä wuj, oyäm atojphä.
Oyäm tsajo lech'ol lhäy'e ventanas,
wet op'oyejpe lhipey häp pino,
wet oy'ilenpe m'ak tä ichät.
15-16Lhok, Oniyat t'at.
Owatlä wuj pino häpkhilek
matche tä isilataj owukwe.
Tha häp tä ajcha häpehte
hin'o tä letamsek ihi,
hiw'enpej m'ak tä naya.
Iwoyepej lakalelhthayaj tä is
wet tach'ote wichi tä p'elitses,
häp tä tamenej tä is alhoho len'äyij.
Täjtso häp tä hin'älit tä nitäfwel n'oyej.
Olham tä Lewukn'o olhämet täjtso.
17Mat am, ts'ilak t'at tä lhen atichunhayaja
m'ak tä lekalhihlä achumtes tä ni'isa.
Lelhaklitwethä wichi
wet lelänhen lhamel tä laj letesa.”
18Häp tä tamenej tä Lhawuk yämeje Joaquim, Josías lhäs tä rey tä ihi Judá, wet yok:
“Ihichet'ala elh chik ihowatshan
häp Joaquim chik ileyej honhat,
wet yok, ¡Yaelh! ¡Ika niyat!
19Tehlat iwoye asno tä õtjänlä,
õ'tonhichela honhat,
õ'hänla Jerusalén lhip tä alhoye.
Lhawuk lhämet tä ichene Jerusalén
20“Jerusalén lheley,
lhek ho'pe tachenhas tä Líbano
wet fwitsenej achoslis tä let'änhen.
Änejwethä afwyhayaj tä lheyayhi Basán
lhäy'e tä lheyaype tachenhas tä Abarim.
Tsi nilhokej wichi tä ihiche honhatil
tä lhen hach'otfwasa tatäy t'at.
21Häp ifwalaste is alhoho han'äyij,
olham otahuy amejen mat tek letach'ahu n'oye.
Tälhe tä pajchey tä tettso akeyis,
lewohiyet'a olhämtes.
22Leyalh yafwuthichetshila aka niyatey,
wet häp wichi tä lhen hach'otfwasa
õyenla kwenkaya wet õ'hänhiyela
honhat tä kalew'eta.
Wet amel han'äfwlhi ihihila,
wet õ'ayenla w'et m'ayhaya,
tsi akeyis tä lewoyaye häp tä tamen amejen.
23Amel tä lheyaychufwi aniyatyajw'et tä isilataj
tä õhp'oyejpe lhipey häp pino tä tälhe Líbano,
wuj tä lewohla ateläythayaja,
äytajichela m'ak tä i'amej,
atehlat iwoye atsinha tä eyte iwohi lhäsa.”
Lhawuk lhämet tä yäme Jeconías tä lhey elh Joaquín
24Lhawuk lhämet tä ifwenho Jeconías, Joaquim lhäs tä rey tä ihi Judá. Yok:
–Olham tä ohäpe Awuk tä n'ilataj, matche olhämet tä oyok, “Tej tä am amälhyej iwoye ofwujhi tä ihi otkwey tä ofwomkat, oailanhihila tä iche ofwuj 25wet oayachajiyela atayhfwas tä lefwetaj lenowaye, tä häpe Nabucodonosor tä Babilonia kaniyat lhäy'e laka wichi tä lhamel t'uhläk ailän. 26Oyokwesila ame honhatte kachätahihchä, lhäy'e ako, häpkhilek amel lhewhi chik leleyejen honhat. 27Wet tej tä wuj tä lehuminche chik letapile aka honhatna, mat tek letapinhiyela.”
28Jeconías tet iwoye n'olhäkwe tä nem is,
wasi wet wichi nemhit iwatlä.
Häp tä tamenej tä õyokwesila,
õ'thathiyela honhat elh, lhäy'e leles.
29¡Honhat, honhat, honhat,
ch'ahuye Lhawuk lhämtes!
30Lhawuk yok, “Lesayen lhey hin'ona,
tihi lehi tä mälhyej elh tä laj lelesa
wet ni'isayej alhoho m'ak tä iyej.
Tsi ihichet'ala elh chik tälhejlä
chik tiyäjo lechäti David leniyatyajw'et
häpkhilek niyatej Judá.”