1Wet ichehte sacerdote tä lhey Pasur, Imer tä lhäs. Häpe t'at Sacerdote tä Lhamya lech'otfwa wet yen lechumeta tä t'uye Lhawuk Lewukwe. Wet tä Pasur iläte Jeremías tä yäme Lhawuk lhämettso, 2wet ne'tek õ'päjlhi wet õ'nayhtej chinhas wet äp õ'tihi Lhawuk Lewukwe lepe tä tumej tafwojyhiye tä tatayhlä Benjamín lhayis kahonhat.
3Wet tä ifwala elh, wet Pasur ne'tek õ'lanhi Jeremías. Wet tä õ'lanhi, Jeremías tahuyej Pasur tä yok:
–Lhawuk iwo ey elha, nemhit Pasur, nech'e Magor-misabib, wok Honhat Nhoch'ayhyaj. 4Tsi Lhawuk yok, “Tanhoch'ayhla'pe honhat, wet am wujla anowayhyaj, lhäy'e nilhokej akalay'is, wet lew'enla tä letayhfwas ilänhen. Wet otch'othiyela Babilonia laka rey häpkhilek ikalhi nilhokej wichi tä ihi Judá, wet yenla lakwenkaya iyhäj lhamel wet ihänhiyela lham laka honhat, wet iyhäj ne'tehlak õ'länhen. 5Äpte oyachajiyela letayhfwas nilhokej m'ak tä lakäywet tä ihi hupuyna, nilhok m'ayhay tä laha ihi lhäy'e m'ak tä lewuk Judá laka reyes. Wet lhamel ihänhiyela häp Babilonia. 6Wet am, Pasur, õ'sohla amej aka honhat wet õ'hänla ame Babilonia, lhäy'e nilhokej haw'et lheley, häpkhilek lhewhi chik leleyej honhat wet õtjänla ahilä. Wet nilhokej akalay'is tä lefwenho n'olhämtes tä kamatachehen tä nitälha n'oye, lhamel tan'isla amej.”
Jeremías tume Lhawuk
7Iwuk, am tä lekan n'oyej.
Olham olhaiwahin amej tä lekan n'oyej.
Atkhajay t'at, lenu n'o'pe
wet häp tä lekalh n'ohi.
Lajit whäya tä wichi t'ischeylhi n'oyej
wet yenn'o leläkwika.
8Tä owo lhämeta, oyämepej
m'ak wit'äyhyaj tä ihichela,
tsi häp tä lene'tek owoye.
Wet ämettso tamenej tä wichi t'ischeylhipej n'oyej
wet lajit whäya tä yenn'o leläkwika.
9Chik oyok, “Nemla oyen tichunhayaja Lhawuk
wet nemla oyämejlhi lhämtes”,
chik mälhyejtso olhämet, wet nech'e ämtes
tet iwoye itäj tä y'oho tä in'ohi
tä ilän ot'isan lhäy'e ohusek.
Ot'uhläk n'am fwenho wichi ämtes,
mat okalhihit'a, ofwenho t'at.
10Olätepej wichi lesamsayaj tä yok, “¡Tanhoch'aype honhat!
¡Mah n'at'ukwe m'ak chik lechahla Jeremías!
¡N'afwenho niyatey tä isit'a m'ak tä lham iwoye!”
Nilhokej okalay'is tataye chik oweta.
Lhamel yok, “Elat ikan lhamej p'iya,
häpkhilek y'akalhi wet y'awo lhahayahlä.”
11Mat Iwuk, am tä lhe n'oyej,
atet iwoye elh tä n'oka'tshayaj lecha tä takhajay.
Iyhäj tä t'uhläk ilänn'o,
lhamellak lewit'äyhyaj ihi,
tsi tek ikalhla n'ohi.
Lhamel nichäthichela katsi,
wet nittäya tä len'äfwlhi ihi.
12Iwuk tä laj atumfwaya,
am tä letetshan häp wichi tä isen.
Wet am tä wuj tä letäfwelej hin'o letichunhayaj
lhäy'e m'ak tä ilech'oye lehusek.
Ocha ame, ot'uhläk ow'en tä lewo ohaya
m'ak tä wichitso iwoyej n'oye.
13¡Choywethä, wujyenayej Lhawuk atenkay!
Lham tä tach'ote elh tä p'elitsaj,
ifwayhtej lhamel tä t'uhläk iwit'äyen.
Jeremías tume ifwala p'ante nech'e nichätchä
14Tek okäjejlhi ifwala p'ante nech'e oiche.
Isit'ak wichi yen tichunhayaja
ifwala p'ante oko iwo lhäsa.
15Tek okäjejlhi elh tä ikäjyenlhi p'ante ojcha
tä ifwenho tä yok, “Nech'e iche äs.”
16Häp hin'otso is chik lewit'äyhyaj
te iwoye hupuy p'ante Lhawuk iwasthi wet nofw t'at.
Is chik iläte tä nech'e ifwalapej n'ochos tä äytaji,
wet n'ofwol tä n'oka'tshayaj lecha tä ifwala ikanhi,
17tsi nilänan'o tä kamaj oihi oko kachowej.
Chik mälhhiyej p'antetso,
õp'ante tajänhit n'ohlä
wet tek olham oihiche p'ante.
18¿Chipte tä otälho oko kachowej?
Tajlhama tä ow'en m'ak tä äyteschehen lhäy'e olhakli,
wet nilhokej ifwalas tä on'äfwlhi ihi,
pajla'tha onchäte okapes.