Lhawuk itiyej letes häp laka wichi tä lhamel itäyhthen lhämtes tä iwoyeje p'ante
1Olham Jeremías Lhawuk tahuy n'oyej tä yok:
2–Is chik Israel lhayis tach'ahutwethä olhämtesna tä owoyeje lhamel. Is chik letahuyej wichi tä ihi Judá, lhäy'e Jerusalén lheley, wet lhok, 3“Häp Lhawuk tä Israel lhayis laka Dios lhämet yokwe, Lewit'äyhyaj ihi elh chik nitch'ahuyaye olhämtesna 4tä owoyeje achätilis täjte otälhtho lhamel Egipto, häp honhat tä wuj tä lhamel iteläytej tä ihi, tet iwoye n'onhonthi tä iwachuhathi chinaj. Ofwenhohte lhamel tä oyok, Ch'ahuyay n'oye wet woye nilhokej m'ak tä ofwel amhohen. Chik lewoye tä owoyetso, ahäpkhihena oka wichi wet olham ohäpkhila aka Dios. 5Wet oyämlat matche olhämet, ow'enla amhohen honhat tä t'os lhäy'e akäyek tet iwoye inät, iläfwelchehen tä ihi. Wet häp täja honhat tä amel tä aleles tä haw'et pajtha nämena.”
Tä olham Jeremías oläte Lhawuk lhämetna, onchulho tä oyok:
–Matche, Iwuk.
6Wet äp Lhawuk yäm n'oye tä yok:
–En asilätyaja olhämetna tä lhehiche Judá kahupuy lhäy'e tä lhehiche Jerusalén kahupuy kawayhil. Fwenhomche wichi, ok, “Häp täja Lhawuk lhämet tä yok, Ch'ahuyaye olhämtesna wet woyaye. 7Täjte otonphä tä otälhtho honhat tä Egipto häp amel achätilis pajtha nämena, wet yachajopej tä ofwenho lhamel wet oyok, Woye olhämtes. 8Mat lhamel tach'ahuhit'a n'oye wet niwoya ohaya. T'unhen lechowhal wet iwoyepej m'ak tä ni'isa. Itäyhthen olhämtes tä pajche one'tek iwoye, wet häp tä tamenej tä ochätyenpe lhamel nilhokej häp lewit'äyhyajay tä pajche ofwenho lhamel.”
9Wet Lhawuk äp yäm n'oye tä yok:
–Wichi tä lew'et Judá, lhäy'e Jerusalén lheley, lhamel lhaikhajyenhen tä tatay n'ohlä. 10Lhamel yäplej lechätilis lakeyis tä ni'isa wet nemhit tach'ahu n'oye. Lhamel ihän t'at dios lhayis tä kamatachehen wet yen lewuhuya. Häp Israel lhayis lhäy'e Judá lheley matche tä lhamel itäyhthen olhämteste owoyeje lechätilis. 11Häp tä tamenej tä ochenhiyela lhamel häp m'ayhay tä äyteschehen, häpkhilek niwohit elh chik yämla. Wet tejlak t'än n'och'oye, nemhit otch'ahuhiyela lhamel. Olham tä Lewukn'o olhämet täjtso. 12Tä mälhyejtso, wichi tä lew'et Judá lhäy'e häp Jerusalén lheley, lhamelna t'änlach'oye laka dios lhayis tä lhamel yenpej n'okhayajayej incienso tä iwun. Mat dios lhayisna tek ifwayhthiyeja häp m'ayhay tä äyteschehen chik näme lhamel. 13Judá lheley yäm wujpey laka dios lhayis, tet iwoye laka hupuy tä wujpey. Wet wichi tä ihi Jerusalén wujpey altares tä ni'isahen tä yenchelhi, tet iwoye hupuy kawayhil tä wujpey. Wet lhamel ihoyepej altarestso wet häp tä iwunejen incienso tä yen n'okhayajayej laka dios tä hich'atej tä ni'isa tä lhey Ba'al.
14“Tä mälhyejtso, am, Jeremías, leyej tä lewo alhyaja'pe wichina. Yej let'alhyen n'oye lhamel, tsi chik lhamel t'än n'och'oye tä lewit'äyhyaj ihi, nemla otch'ahuye.
15“Wichi tä oalehumnhay, amel lewoye m'ayhay tä matche tä ni'isahen, wet nemhit is chik letiyäjchufwi Owukwe. Tej tä lehänpej n'oye itshätäy tä lelänhen tä lhen otw'ayhata thayej, tek letefwayhiyeja awit'äyhyaj. Wet häp tä oyok, Leyej tä alechäjejwethä m'ayhaytso.”
16Lhawuk aitech'aynej p'ante olivo tä w'atshan tä isis lhay tä iwoye. Mat ichenla ame häp pelhay tä t'ajanlhi, wet iwunhihola haw'oley wet achal y'ohihomchela. 17Lhawuk tä laj letumfwaya tä aitihchä p'ante, nech'e iti amejen häp lhämet tä yok:
–Amel tä ahäpe Israel lhayis, lhäy'e häp amel tä ahäpe Judá lheley, olham ochätyenla atapehen m'ak tä ni'isa. Tsi häp tä wuj tä lewäkwyhayenn'o tä lewoye m'ak tä ni'isa wet len'okwiyej dios tä kamatache tä lhey Ba'al.
Iche wichi tä tatayhlä Jeremías wet t'uhläk ilän
18Lhawuk ihanhat n'oyej tä iche wichi tä tatay n'ohlä, wet itäfwnhat n'oyej m'ak tä ni'isa tä lhamel fwetaj iwoyej n'oye. 19Tä kamaj n'am hanej, otamsek ihi t'at, otet iwoye häp tson'ataj lhäs. Tä nichäte lewhäy tä õ'län, ihanhit'a lhamej m'ak tä õ'woyeje. Mat lhamel yok:
–¡Mäh n'alän hin'ona, n'iset, n'atech'aynej hal'ä, n'alanhi tä tälho honhat lhäy'e wichi, häpkhilek lhey tatäy!
20Tha häp tä am, Iwuk tä laj atumfwaya, ahäpe N'okalelhthayajwo tä is. Wet am tä wuj tä letäfwelej hin'o letichunhayaj lhäy'e m'ak tä ilech'oye lehusek. Ot'ekha ame, ot'uhläk ow'en tä lewo ohaya m'ak tä wichitso iwoyej n'oye.
21Häp hin'ol tä tälhe Anatot, lhamel t'uhläk ilänn'o. Tsi wichitso n'äyej n'oho chik oyen lhämeta häp Lhawuk lhey, häp tä tamenej tä t'uhläk ilänn'o. 22-23Wet Lhawuk tä laj letumfwaya ifwenhomche lhamel wet yok:
–Amel tä ahin'ol tä haw'et Anatot, ot'unhatche ates amel. Häp mamses õ'länhiyejena tä ihi n'oka'tshayaj, wet ales y'inhiyejena nehläs, niwohit elh chik iläy. Tsi nämla lewhäy tä oaitasnhen wet ochätyenla atapehen awit'äyhyaj.