Efraín laka wichi tatayhlä Jefté lhäy'e Galaad lheley
1Häp hin'ol tä Efraín kawichi lhaihutwek wet yistho Jordán. Wet tatshupiye hupuy tä Safón, tä nichäte wet tahuyej Jefté wet yok:
–¿Chipte tä kafwela n'ohohen tä lenuye Amón lhayis yämthilek olhamel oyik amche? ¡Athana olhamel owunhihola awukwe tä lhechufwi!
2Jefté nichulho wet yok:
–Olham lhäy'e oka wichi olhamel olhäkleyhyaj iyeji Amón lhayis. Wet olham ot'ännaj amehen, mat lenämhihent'a yämthilek letach'ot n'oyehen. 3Wet tä ow'en tä kanämahen, olham oyik tä n'am noway letape wet onuye Amón lhayis. Mat Lhawuk tach'ot n'oye wet häp tä okalhi t'at lhamel. Tä mälhyejtso, ¿chipte tä leho n'oye yämthilek letatay n'ohlä?
4Wet nech'e Jefté ihutwek nilhokej hin'ol tä ihi Galaad, wet lhamel tatayhlä Efraín kawichi wet ikalhi. Tsi Efraín kawichi pajche yopejkwe:
–¡Amel tä ahäpehen Galaad lheley tä lhewej Manasés kawichi, pajche lhekaych'oye olhamel wet lewom n'ohen!
5Wet Galaad lheley lhayen lewuhuya tewok Jordán lhipey tä n'olhijtshanw'etes, yämthilek Efraín kawichi nikalhahi chik yäple laka honhat. Wet ichepej elh Efraín kawichi tä fwetaj ilethan wet t'uhläk õ'wo len'äyija. Mat Galaad lheley tay'ätshane chik häpe elh Efraín kawichi. Wet chik yok, “Kha”, 6tä mälhyejtso, lhamel ne'tek iten lhämet tä yok, “Shibolet”. Wet tä hin'o iten mat yok, “Sibolet”, lhamel itsoklhi, tsi ihanej tä häpe t'at Efraín kawichi elh, wet ilän tä ihi t'at Jordán lhipey tä n'olhijtshanw'etes. Wet ifwalatso õ'länhen cuarenta y dos mil (42.000) Efraín kahin'ol.
7Wet seis nekchämis p'ante tä Jefté niyatej Israel lhayis. Wet tä y'il p'ante, õtjänch'oye tä ihi hupuy tä lew'et tä ihi Galaad.
Tres iyhäj Israel lhayis kaniyatey
8Tä Jefté y'il p'ante, hin'o tä lhey Ibsán tä lew'et Belén häp tä äp iyhäj yen laka niyata. 9Iche treinta leles tä hin'ol wet treinta tä atsinhay. Wet Ibsán iwhayenhen lhamel, itiyejwethä Israel lhayis tä lew'et w'enha lhamej. Wet siete nekchämis tä lham niyatej p'ante Israel lhayis, 10wet tä y'il p'ante, õtjänch'oye tä ihi Belén.
11Wet nech'e hin'o tä lhey Elón tä iyej Zabulón kawichi, häp p'ante tä lhayen niyatayej Israel lhayis pajtha diez nekchämis. 12Wet tä y'il p'ante, õtjänch'oye tä ihi hupuy tä Ajalón tä lewuk t'at häp lham laka wichi.
13Wet nech'e hin'o tä lhey Abdón, Hilel lhäs tä lew'et Piratón, häp p'ante tä lhayen niyatayej Israel lhayis 14pajtha ocho nekchämis. Iche p'ante cuarenta leles wet treinta lechetsos, wet elh weihalhapej lhamel i'pe lew'ute asno. 15Wet tä y'il p'ante Abdón, õtjänch'oye tä ihi Piratón, häp hupuy tä ihi Efraín kawichi kahonhat tä ihi chenhas tä lewuk Amalek lhayis.