₁Ipuhfwas, isit'ak wujpe amel alhenay chufwenyajwosa. Tsi lehanayej t'at, häp olhamel tä ochufwen wichi, lhäy'ehila lhip Dios lakalelhthayaj chik iti n'oyejen. ₂Tsi y'alhokej y'awetahenpej. Mat häp elh chik newache m'ak chik wetayej tä yäme, häpe hin'o tä is alhoho wet ihanej iwoyneje wet tumlä t'isan.

₃Lhek tetshanay yel'atas. Tä y'at'uhläk iwoye m'ak tä y'ahuminche, häp tä tamenej tä y'awo t'aka lak'aj wet y'akalhi tä y'a'isyen alhoho imälhewek t'isan. ₄Häte lhek tetshanay barcos. Tej tä wus wet ihwokwetas tä ihut lhamel wuj tä äytesiche, mat häp lecha tä lhämsaj tä lhey timón, häp tä lewos isyenej alhoho yämthilek ihoye lhip tä t'uhläk ihoye. ₅Wet häp n'ok'ajlhich'u häp tä mälhyej at iwoye tähestso. Häpe olhip tä lhämsaj, mat wuj tä lhaichäjejlhi m'ayhay tä wus.

Lhek yahinya häp tayhi tä wuj, matkat itäj tä lhämsaj ihanej tä iwunho. ₆Wet häp n'ok'ajlhich'u häpe t'at itäj. Häpe m'ak tä ni'isa lew'et tä ihi n'ot'isan, iwit'äyen hin'o wet kok'ayeje. Wet ahättaj lew'et häp tä ilhänhi, wet nilhok ifwalas tä iläy hin'o, y'uho t'at. ₇Hin'o ikalhi t'at chik ifwihat elh chik häpe itshätäy tä fwitses, wok ifwihat afwenche, wok amlhäj, wok lewomekitaj lhele. Wet matche, ifwihat t'at. ₈Mat häp n'ok'ajlhich'u nehit katsik ihanej iwoyneje chik ifwihat. Häpe t'at m'ak tä ni'isa tä iwohiyet'ak õ'kalhi, wet äp m'ak tä n'ot'ilek tapoyej. ₉Y'achumyenlhi tä y'awunit Dios Lhajcha, mat häte y'achumyenejlhi lhasitäyhyaj tä y'atiyej n'aiyhäj tä Dios lhenhay wet äp lepeykas. ₁₀Tä mälhyejtso, m'ak tä is lhäy'e m'ak tä ni'isa tälhche t'at lhak'aj. Isit'a täja, ipuhfwas. ₁₁Lhek yahinya, ihichet'a ts'ifwik tä inät tä akäji lhäy'e inät tä tapay tälho. ₁₂Wet häp higo lhile iwo lhaya, häpkhit'a aceituna, wok häp uva lhile iwo lhaya, häpkhit'a higo. Wet häte, ipuhfwas, inät tä akäji tälhihot'a ts'ifwik tä nosoyhi.

₁₃Chik iche elh amel tä ahantsaj wet nitäfwelej m'ayhay, is chik hin'älit lechumyaj tä is wet tek lhaichäjlhi, mälhyej tä lhaichufwenej tä tälho lehanyaj. ₁₄Mat chik aschenyaj ihiche ahusey, wet nemhit is atichunhayajay, wet letatayejwek m'ak tä lewoyaye, tä mälhyejtso, niwohit m'ak chik ahäpehen, wet mathichet'a tä lefwetaj letach'ote Dios lhämet tä matche.

₁₅Tsi n'ohanyaj tä mälhyejtso tälhiyet'a pule, tälhe honhat, wet tälho hin'o letichunhayaj, wet tälhe ahättaj. ₁₆Tsi chik let'ischenche ahilähen wet letatayejwek m'ak tä lewoye, tälhe tähestso kalelhäjit'a m'ayhay, wet nilhokej iwoye m'ak at chik häpe tä ni'isachehen.

₁₇Mat häp lhamel tä lehanyaj tälh puleye, chunkat tä lhamel lehusey ts'ilak, wet häte letamsekis ihi wet lechowhal ihi, tach'ahuye m'ak tä iyhäj yäme, wet wuj tä hap'altsentses, lechumtes tä iwoye isen, ihumin nilhokej wet akantsesit'a. ₁₈Wet lhamel tä iwo yiya n'otamsek, tutcheyhi t'at n'otamsek yämthilek ihutwek lhay tä häpe n'o'isyaj.