1¿Atsi tä imatitche m'ak tä olhamel owo silätayej?
¿Wet atsi elh tä Lhawuk hin'älteji lakhajyhayaj?
2Lhawuk t'uhläk lhaichihelit lakawo
hätet iwoye hal'ä tä nech'e tälh,
lefwettsil tiyäjo t'at honhat tä tamchäy.
Lesilatyaj ihihit'a, niwohit m'ak chik t'uhawetej.
Y'aw'en mat tek n'aikänitwethä.
3Wichi yen häpeya m'ak tä lajit lahaya wet tek tachumlä.
Ihanej t'at m'ak tä häpe n'oteläythayaj,
tsi matche tä äytaj.
Y'atech'aynej elh chik häpek kay'at'uyahläk y'ayahin.
Y'en w'et m'ayeka wet y'enhit'a lhatichunhayaja.
4Matkat lham tä tilhäj n'amel lhateläythayajay,
wet lhaitumtejlä m'ak tä äytaj tä n'ailänhen.
Wet y'afwetaj Dios t'at tä itasinlhi wet hiw'enho lelhakli.
5Mat oyok, tä n'amel y'attayhlä Dios,
häp tä y'atmenej tä lelätshay ihi,
wet lhach'isukyajay tamenej tä lewit'äyhyaj
tä lhäy'e lhip tä ni'isa nichätpe.
Mat n'aisej tä n'otasnhayaj iyej,
wet lhatamsek ihi t'at.
N'aisej tä lham lelätshay ihi,
wet y'achesen t'at.
6Nilhokej n'amel n'ahätet iwoye tson'atas tä wetahen,
elhpej inukwet len'äyij tä ihuminche.
Matkat Lhawuk ilhuhyenej lham
häp n'amel lhach'isukyajay.
7Tej tä õ'nhäpäjlhi,
mat lhayen w'et m'ayeka wet tek tahuy.
Mälhyet tson'ataj lhäs tä õ'häne lew'et tä õ'län,
lham yok tam, tek hich'enhi lak'aj.
Mälhyet tson'ataj tä õyisetche lew'ole,
iwohit'a lepaka.
8Wichi tach'anlhaye t'at,
wet õy'ithatejlhi letes.
Wet õ'häne lew'et tä õ'län,
wet nehit katsik yen tichunhayaja lewit'äyhyaj.
Õ'soyej wichi tä ihonhatena,
häp oka wichi lech'isukyajay
tä tamenej tä õ'län.
9Wet lep'itsek õ'tiyej wichi tä ni'isahen
lhäy'e hin'o tä hiw'en m'ayek lep'itsek,
tej tä okawo häpe hin'o tä laj lefwitseyaja
wet newache lhämet chik t'akanyaj.
10Lhawuk lenech'ethayaj t'at
tä hiw'enho leteläythayaj.
Wet tä lakawo lhahiw'enho t'ilek
yämthilek tatäy wichi letes,
lham nemla lepes iche lew'atshancheyaj,
wet hiw'enla leles tä lepes lheley.
Wet häp tä isej lham,
isila alhoho m'ayhay tä Lhawuk t'uhläk iwoye.
11Wet chik tajyäme leteläythayaj tä wuj,
hiw'enla isi wet lakäjyaj ihiyeja.
Lhawuk yok, “Okawo tä is wet lehanyaj ihi,
hi'isyenhihena wujpe wichi,
tsi lhamlak tilhäj lhamel lech'isukyajay.
12Wet häp tä tamenej
tä oyenla lewuka wujpe wichi,
wet n'owustas iwujyenla,
häp tä lham lhahiw'enho t'ilek
wet õ'tan'istej keyis länhay.
Wet tä matche tä tilhäj wujpey wichi lech'isukyajay,
wet y'alhyen n'oye lhamel
yämthilek otäyhat letes.”