1Häpe p'ante lewhäytso tä rey tä lhey Merodac-baladán tä Baladán lhäs tä Babilonia laka rey, lham ihanej tä Ezequías t'inhayaj ihi wet äp iches. Wet häp tä ichene lesilätwos, lhäy'e laka cartas, lhäy'e t'awayhat. 2Wet Ezequías akäjejlhi tä hiw'en lhamel. Wet ipäyne nilhokej m'ak tä hiw'en tä laha ihi, plata lhäy'e oro, lhäy'e lakacha tä lenij akäjche, lhäy'e aceite tä laha ihi, lhäy'e takwelheley, lhäy'e nilhokej m'ak tä lakäywet. Niwohit m'ak chik nipäynaye. Nilhokej m'ak tä ipäyne, lhäy'e m'ak tä hiw'en tä ihi leniyatyajw'et lhäy'e tä ihi nilhokej laka honhat.
3Wet profeta Isaías ihoye rey Ezequías wet tay'ätshane p'ante tä yok:
–¿Atsi honhat tä tälhe hin'ol tä iho ame, wet atsi m'ak tä lhamel ifwel amho?
Wet Ezequías nichulho tä yok:
–Lhamel tälhe Babilonia, honhat tä atofwe.
4Wet Isaías tay'ätshane tä yok:
–¿Atsi m'ak tä lhamel hiw'en tä ihi aniyatyajw'et?
–Lhamel hiw'en nilhokej m'ayhay tä ichufwi ow'et. Niwohit m'ak chik imälhehi tä lhamel niw'ena. Nilhokej m'ak tä ot'amajej tä lhamel hiw'en.
5Wet Isaías tahuyej Ezequías tä yok:
–Lhek ch'ahuye Lhawuk tä laj letumfwaya lhämet tä yok, 6“Ihichela ifwala tä õ'chäjiyela Babilonia nilhokej m'ayhay tä lew'en tä ihi aniyatyajw'et, lhäy'e nilhokej m'ayhay tä achätilis t'amajej yäk ifwalasna. Wet tek wohla m'ak chik imälhe kana. 7Wet elhpej amel ales tä hin'ol tä tälh ame, õ'hänhiyela Babilonia wet õ'lanhihichela lechänsilis, wet Babilonia laka niyat yenla lakawosa.”
8Wet Ezequías nichulho Isaías tä yok:
–Häp Lhawuk lhämet tä lechäj n'oye is alhoho. Chik kamaj oläy, elat letamsek ihi honhat wet laj lewit'äya.
Your browser does not support HTML5 audio.