Wichi tä lew'et Moab t'uhläk ilethane Judá
1Moab lhayis kaniyatey tä ihi Sela,
häp honhat tä hupuy ihi tä ihi ts'anis,
lhamel ichene tson'atas tä yen t'awayhata
häp rey tä ihi Jerusalén.
2Wet häp wichi tä tälhe Moab,
lhamel nichäte n'olhijtshanw'et tä ihi tewok Arnón,
tet iwoye afwenchey chik noway chik yikch'oye lhup.
3Wet iwoyeje lhämet häp Judá lheley wet yok,
“Ch'ot n'oyehen, fwayhat olhamel,
is chik leskat olhamel
häpkhilek nehit katsik hiw'en n'ohen.
Wet yej fwel n'ohen,
mat is chik leskat olhamel tä ka'ow'eta täja,
wet yej lhachaj n'oyehen otayhfwas.
4A'en oletnhaweta, ch'ot n'oyehen
häpkhilek owit'äyhyaj nitaja n'ohen.”
Tajyämhiyela hin'o tä ilhaklitwethä wichi.
Häp lham tä ilänhen
yikhilach'oye lhamel laka honhat.
5Chik mälhyejtso,
elh David leles tä lepes lhele
nichäthihola leniyatyaj,
wet nittäya lehumnhayaj tä itihiyeja wichi.
Häpkhila n'okalelhthayajwo tä is,
wet iwohiyela'thahya lech'otyaj tä is alhoho.
Õtafwlhi'pe Moab
6Y'ahanej t'at tä Moab lheley
wuj tä lhaichäjwethä,
lhaiwujyenhen, lhay'ayhatphä,
fwetaj newache elh chik w'awulhi,
wet iwoye lhämtes tä lajit lahaya.
7Tä mälhyejtso, tafwichelahchä
tä y'äyen lhamel laka honhat
wet wuj tä lelhakli ihi.
Lhamel yenla tichunhayaja
n'olhäk tä wuj tä akäj
tä ihi honhat lhip tä lhey Kir-hareset.
8Häp n'olafwey tä uvas ihiche
tä ihi Hesbón lhäy'e Sibma, nech'e tamchäyhen.
Ifwalas tä pajche wuj m'ayhay tä tälho,
wet nichäte Jazer, wet äp nichäte ts'anis,
pajtha nichät w'echehi Lewomekitaj Nosoy.
Mat niyatey tä tälhomche honhates
nämhen wet t'äschehen wet iwasthiche.
9Häp tä tamenej tä otafwlhi
tä ow'en n'olafwey tä ihi Sibma,
lhäy'e tä ihi Jazer, lhäy'e Hesbón,
lhäy'e honhat tä lhey Dios Wujyaj,
tsi n'oka'tshayaj lepak tumpe yachuyajw'etestso.
10N'ot'änyajay tä wichi lakäjyaj
nofwila tä ihiche yachuyajw'etes.
Nemla iche wichi chik t'änwethä chik iwo lakäjyaja,
wok ichoywethä tä ihiche lelafwey tä uvas ihiche.
Ofwone wichi wet yok tam,
wet nemhit iche uvas chik õt'äsiche tä õyen hat'esa.
11Tä mälhyejtso,
ohusek tachetteylhi tet iwoye arpa
tä wuj tä op'altsen häp Moab lhäy'e Kir-hareset.
12Tejlak Moab lheley fwetaj ihoye chenhas,
tejlak fwetaj ihoye len'okhayajw'et
yämthilek iwo let'alhyaja,
mat pajla'tha w'et y'el t'at,
niwohit m'ak chik isej.
13Häp täjtso Lhawuk lhämet tä pajche tä iwoyeje Moab. 14Athana wet äp Lhawuk äp yok:
–Mälhyej tres nekchämis tä hin'o tä chumaj tachumlhi, ikalhi t'at lakaha, häp tä mälhhiyejatso, chik taj lewhäy, Moab lhäy'e laka wichi tä wuj, lhäy'e lewujyaj, õyenla w'et m'ayeka. Tajlhamhiyela iyhäjfwas chik imälhehi, wet nemla lakhajyhayaj ihi.