Lhawuk itäyhthila n'otw'ayhtesw'etes tä ni'isahen
1Israel lhayis tet iwoye uva lhile tä wuj lhay,
wet äpte yäm at wuj tä yenlhi lhamho
lecheyälis t'ewayhtes lew'etes.
Wet tä lhäy'epej lhip tä isilataj laka honhat,
wet wuj tä isilatyenpej tuntey tä iwo len'okhayajayej.
2Israel lhayis itäkwyen lechowhal,
wet athana iwohla lahaya lech'isukyaj tä iwoyepej.
Lhawuk iwasthihichela lecheyälis t'ewayhtesw'etes
wet äp itäyhthila tuntey tä lhamel iwo len'okhayajayej.
3Athana wichi yohlak:
“Oka niyat ihichet'a,
tsi häp tä olhamel n'am wujyen Lhawuk
wet äp n'am woye lhämtes.
Tha ¿atsihila m'ak che iwoyej n'oyehen niyat che iche?
4Ilehiyejt'a tä w'et tahuylhi t'at,
w'et lhetnhayaj t'at m'ak tä fwetaj hit'unteji lhämet.
Lakalelhthayajay tet iwoye hon'al tä n'ot'ilek
tä yiklhaphä tä iche yachuyajw'etes.”
5Wichi tä ihi Samaria inuhat lhamhohen
wet y'äyen tä tatäy lecheyä
tä w'asetaj peyak tä ihi N'omukwehyajw'et.
Wet lhamel ihowatshan lhamejen,
lhäy'e sacerdotes,
tsi tatäy t'at lecheyätso lewujyaj.
6Õ'hänhiyela Asiria tä õ'fwenhihola
niyat tä ihi tä lewujyaj ihi,
häpkhilek Israel len'äfwlhi ihi
wet n'äfwelhlatpe lecheyä tä n'olhenek.
7Tatäyhihilat niyat tä ihi Samaria,
tehlat iwoye hal'ä lhip tä inät ichäj.
8Wasihichela lhipey tä n'ot'amajchetesej
n'ot'ekhahyaj tä kamatache
tä Israel iwo lemukwehyajahi.
Ch'uthanil lhäy'e hon'al tä yelaj
lhaichiyhelthila tä i'pe lecheyälis laka altares.
Wet häpkhilek wichi tahuye tachenhas
wet yok, “¡Chät n'o'pehen!”,
wet äp yohlak, “¡P'o'pe olhamel!”
Lhawuk itiyej letes häp Jerusalén
9Lhawuk yok:
“Israel lhayis ilehiyejt'a tä iwo lech'isukyaja,
tälhe t'at täjte lhamel ihi Gabaa.
Tujlhache t'at lech'isukyaj,
wet häp tä n'oka'tshayaj ihämthiyeja
che lhamel ihi Gabaa.
10Ifwala che otshupyene,
otihiyeja otasnhayaj wichi tä ni'isahentso.
Owesyenla'pe wichi iyhäj
wet otasnhila'pe lech'isukyajay tä wuj tä iwoye.
11“Israel tet iwoye weyis tä n'ofwihtsek
tä ihumin t'at tä t'äsche trigo tä iwo lhoya.
Mat oti'pe lew'o tä isilataj
hal'ä tä itonej m'ak at che häpe.
Wet Judá itonla n'ochumetcha tä isaji honhat,
wet Israel lhayis iwasthihichela itshatas.
12Oyohtekwe, Tiyayhchä m'ak tä matchehen
wet hutwek n'ohumnhayaj.
Waklhat honhat tä häpkhilek
õyachajo tä õtutcheyhi.
Tsi taj t'at lewhäy tä is che
let'u n'okwe tä ohäpe Awuk Dios,
pajla'tha onäm wet ochäj afwayhyaj,
tehlat iwoye pelhay che nitsäy atapehen.
13Tha matlhat amel letiyayhchä amhohen m'ak tä ni'isa,
wet tä lelanayhi häpe t'at m'ak tä ni'isa,
wet äp lehämitay amejen ämtes tä kamatachehen.
“Tä let'ekhayaye amel akhajyhayaj
lhäy'e aka nifwotaj,
14wet häp tä ihichela huyaj
tä ihi aka wichi,
wet wasihichela nilhokej honhates
tä lhen lep'otesa nolafwey tä tach'opwayhen.
Tehlat iwoye täjte niyat
tä lhey Salmán iwo laka'tshayaja,
wet iwasthi honhat tä Bet-arbel,
wet õhp'ajthiche atsinhay lhäy'e leles.
15Tehlattso amel tä lheyayhi Betel,
tsi m'ak tä wuj tä ni'isa tä lewoyaye
häp tä tamen amejen.
Häp Israel kaniyat y'inhila che taj laka ifwala.”