Lhawuk lhämet tä itech'aynej towej
1Häp nekchäm tä nueve tä olhamel oihi Babilonia tä häpe honhat tä ka'ow'eta, wet ifwala tä diez tä ihi häp iwel'a tä äp diez, wet häp tä Lhawuk tahuy n'oyej wet yok:
2–Hin'o, is chik lelesayen häp fecha tä ihi ifwalana, tsi häp tä Babilonia laka rey inuye ifwalana häp Jerusalén. 3Wet is chik lefwenho wichi tä tatay n'ohlä häp olhämetna tä otech'aynej towej, ok,
“Tihi itäj häp towej wet tsäyho inät.
4Wet thatche tshäwet t'isanis,
häp lheche lhipey tä isis
lhäy'e häp lewho t'isan,
wet lhäy'e lhiley tä matche tä is.
5Wet äp chuma häp tson'ataj
tä isilataj, häp tä lep'ajtej,
wet chuma alhetes wet ísej iyhäj alhet huy
häpkhilek matche tä naway,
pajla'tha wachuhiche lhiley.
6“Tsi häp tä Lhawuk Dios yok,
¡Awit'äy ihi tä ahäpe hupuy
tä wichi tä ilänhen iyhäj tapoyej!
Atet iwoye towej tä lech'ohle ihi,
häp lech'ohle tä niwohiyat täjche
ihanej iwoyneja chik ilej.
Tonchephä itshäwet lhipey tä iche,
wet yej lhokonphä, tonphäpej lhiphaj,
pajla'tha itolajo towej
wet nofw lheley tä iche.
7Häp hupuy matche tä wuj häp w'oyis tä nitsäy tä ihi,
mat tek nitsäyho honhat tä holo
wet häpkhilek holo nip'oya'pe häp w'oyis,
mat nitsäype honhat tä t'un tä te iwoye häp tuntey,
häpkhilek n'äl häp w'oyis tä nitsäype.
8Wet häp tä tetso, olham otsäyhla'pe w'oyistso
häp tunte tä honhat newa'pe,
häpkhilek n'äl tsi honhat ihit'a'pe.
Tsi t'uhawetej chik wuj tä owäkw ihi
wet owo hayahlä wichitso
m'ak tä matche tä ni'isa tä iwoye.
9“Häp tä tamenej tä Lhawuk Dios yok,
¡Awit'äy i'amej tä ahäpe hupuy
tä wichi tä ilänhen iyhäj tapoyej!
Wet te olham nech'e oskonla olhetes,
10wet am, is chik lhäm wuj alhetes tä lechäj alhoho,
wet lhänhi itäj wet äm y'o häp itshäwet t'isanis,
pajla'tha y'im häp t'i tä tälhomche
wet y'aje t'at lhiley tä y'ohomche.
11Wet is chik leti'pe towej
tä laj lheleya häp itäj,
pajla'tha ichät tä chayo,
wet häpkhilek y'o häp lech'ohle
tä t'unhi tä iyej wet nofw,
nemhit lech'ohle ihi häp towej.
12Wet towej tä y'oho, nits'ilakhiyat itäj
chik ihanej iwoyneja chik ilanhi lech'ohle.
13“Jerusalén, ot'unajläk oailejlhi tä hach'ohle iyeji häp akey tä ni'isa tä lewoye. Mat tek lehuminche chik oailejlhi. Wet häp tä tetso, nofwit'ala hach'ohle tä i'amej pajla'tha lekatej t'at owäkw tä wuj. 14Olham tä ohäpe Awuk Dios olhämet täja. Häp tä mälhhiyejatso m'ak tä owohiyela, omatthichela olhämet tä owoye. Ihichet'a op'altsenyaj chik otihla amej wet olehichet'ala häp m'ak tä ot'uhläk owohiyela. Oaitasnhila'pe akey tä ni'isa tä lewoye, owohla haya amej, mälhyej hach'isukyajpej tä lewoye.”
Ezequiel lech'efwa ileyej honhat
15Lhawuk tahuy n'oyej wet yok:
16–Hin'o, matche tä oselkatla amej chik oso amej häp hach'efwa tä ahumnek. Mat isit'ak let'äyen, yej lhen alhakliya wet yej tafwlhi. 17Wet is chik tet laj ateläythayaja, yej ten häp wichi tä elh ileyej honhat wet yej alhen tesayache. Yej mälhtej akawon'a wet yej mälhtej anisähes, wet yej wo atetnekayej alhakli. Yej p'o'pe hak'aj tä apäsey ihi. Chik letufw äk, isit'ak häpe wichi tä tesalis lhäk.
18Tä nech'e fwala oyämhoplhi häp wichi, wet tä honaj och'efwa ileyej honhat. Wet tä äp nech'e fwala owoye t'at häp m'ak tä mälhyej tä Lhawuk t'uhläk owoye. 19Wet häp tä nech'e wichi tahuy n'oyej wet yok:
–Lhek íthat n'ohohen atsi m'ak tä yäme häp m'ak tä lewoye.
20Wet onchulho lhamel wet oyok:
–Lhawuk tahuy n'oyej wet yok, 21“Is chik lefwenho Israel lhayis wet lhok, Amel matche tä lehumin Lhawuk Lewukwe tä T'amajchet. Leyahin t'at wet häp tä alechäjejlhi, tsi lefwetaj häp tä akhajyhayaj tälhe. Mat Lhawuk nemhit yenla t'amajcheta Lewukwetso, wet amel ales tä lewomayhi Jerusalén, häp tä õ'länhiyejena n'ofwajnhates. 22Wet amel tä lewohiyela m'ak tä owoyena. Nemhit lep'ohla'pe hak'aj tä apäsey ihi chik lhenla atetnekayej alhakli tä i'amejen. Wet nemhit letufwla häp n'olhäk tä wichi tä tesalis lhäk. 23Wet nemhit lemälhthiyeja akawon'a wok lemälhtej anisähes. Wet lajit ateläythayajayej wet nemhit letafwilhila. Wet lenofwiyeja'pe hach'isukyajay tä lewoyaye, wet wujla ateläythayaj tä ihla amejen. 24Wet olham Ezequiel häp tä n'otetnekej amejen, häp m'ak tä in'oyej häp tä tehlattso m'ak tä ihla amejen. M'ak tä owoye häp tä tehlattso m'ak tä amel lewohiyela. Wet chik nichäte lewhäy tä ihla amejen häp m'ayhayna, wet häp tä nech'e amel lehanhiyeja tä Lhawuk häpe t'at lhaka Dios.”
25Wet Lhawuk äp tahuy n'oyej wet yok:
–Israel lhayis lakhajyhayaj häpe t'at Owukwe, wet lesilatyaj tä ihi häp tä ikäjyenwethä häp lhamel, wet lhamel iyahin t'at wet matche tä ihumin. Mat olham osohiyeja lhamel häp lakhajyhayajtso, wet äpte osohiyeja leles häp lhamel. 26Wet ifwalatso elh chik tafwayej letayhfwas ihohla ame, häp tä iwohla siläta ame häp m'ak wit'äy tä iche. 27Chik nichäthiyela ifwalatso, wet nemhit a'opahila, nech'e letahuyhila, wet häp tä lhämhihoplhila häp elhtso tä tafwayej letayhfwas tä lhayämet. Wet ahäpkhila otetnek amej wichi, wet nech'e lhamel nitäfwenhiyeja tä olham tä ohäpe Lewuk Dios.