Dios t'awayhat tä häpe yachuyaj lhay tä ichun
1Chik lechätho honhat tä Lhawuk Dios hiw'enla amhohen yämthilek alewuhuy, wet lhen haw'eta, 2chumela akäs lhay tä ichun tä tälho honhattso. Wet thathola lehi tuskal tä õyenlhi, wet hänela honhat lhip tä lham tatshupiye tä yen lew'eta. 3Chik lechäte, fwenhola sacerdote tä ihi ifwalastso, olak, “Olham oyok, Ifwalana oihi tä tatache Lhawuk Dios, wet oyok, Oihi t'at häp honhat p'ante Lhawuk hit'untejche lhämet tä ifwenho p'ante n'amel lhatetsel tä yok, Ow'enhihola ales.”
4Wet sacerdote tachumhiyela lehi tä tuskal tä lew'enho, wet itihihila tä Lhawuk Dios laka altar tatache. 5Wet nech'e lhohlak:
“Olham otes häpe p'ante Aram lhayis elh tä lew'et nikalelhäja. Wet lham tiyäjo p'ante Egipto wet ihi lhip, lhäy'e lew'et lheley tä nintäkwa. Tä paj häpe p'ante wichi tä wujpey wet äp takhajayhen. 6Mat wichi tä lew'et Egipto yen lakwenkaya ojchalis, wet ilänejen lechumet tä äytajche, wet wuj leteläythayaj. 7Wet lhamel t'änch'oye Lhawuk tä häpe lhatetsel laka Dios. Wet lham tach'ahuye t'alhyajay, wet hiw'en t'at tä wuj tä p'elitses tä õ'chumyenwethä lhamel wet õ'länejen lechumyaj. 8Wet itonphä lhamel tä ihi Egipto, häp tä isej lakhajyhayaj tä wuj, wet iwoye lechumtes tä lanhoch'ay ihi, wet hin'älit m'ayhay tä äyteschehen lhäy'e letetnhay tä wichi iseltejen. 9Wet ihän kana lhamel wet hiw'enho honhatna, häp honhat tä t'os lhäy'e akäyek tet iwoye inät, iläfwelchehen tä ihi. 10Häp tä tamenej tä olham ohän kana okäs yachuyaj lhay tä ichun tä lham Lhawuk hiw'en n'oho.”
Chik leleyej tä lewoyetso, is chik letihi lehi tuskal tä õyenlhi tä Lhawuk Dios tatache, wet letakhos katsi tä len'okwiyej häp lham. 11Wet chik leleyej, wola akäjyajayej nilhokej akäywet tä Lhawuk Dios hiw'en amho, am lhäy'e haw'et lheley, lhäy'e wichi tä letes Leví, lhäy'e wichi tä kahäpeya Israel lhayis tä i'amejen.
Diezmo tä õyenlhi tres nekchämispej
12Chik tres nekchämispej, w'enhata diezmo tä tälho nilhokej akäs lhay. Wet w'enhomchela wichi tä tälhe letes Leví, lhäy'e wichi tä kahäpeya Israel lhayis tä ihi aka honhat, lhäy'e chipenhas, lhäy'e tesalis, yämthilek lhamel tä i'amejen hiw'en m'ak chik isej. 13Wet chik leleyej, fwenhola Lhawuk Dios, olak:
“Olham ow'enhat lhip okäs lhay yämthilek häpe n'ot'amajchet. Wet ow'enho Leví lhayis, lhäy'e wichi tä kahäpeya Israel lhayis tä ihi oka honhat, lhäy'e chipenhas, lhäy'e tesalis. Owoye nilhokej m'ak tä lene'tek owoye. Ihichet'a ämet chik häpe chik n'am woye. 14Tä iche oelh tä y'il, wok okok'ayeje m'ak chik häpe, otufwit'a tähesna, wok otchuma lhip wet oyok, Oyen t'awayhata häp iyhäj tä pajche y'inhen.
“Iwuk Dios, owoye nilhokej m'ayhay tä lene'tek owoye. 15Lhek yahinchä tä lhehi Haw'et tä Amajchet tä ipuleye. Käpfwayeje m'ak tä is häp aka wichi Israel lhayis, lhäy'e honhat tä lew'en n'ohohen, häp honhat tä t'os lhäy'e akäyek tet iwoye inät, iläfwelchehen tä ihi, mälhyej tä lefwenho p'ante olhamel otetsel.”
Israel lhayis häpe Lhawuk laka wichi
16Ifwalana Lhawuk Dios ne'tek lhen achumyaja nilhokej lhämtestso tä ne'tek lewoye. Mälhtejwek ahusek tä lewoye, lhäy'e mälhewek atichunhayaj. 17Ifwalana lekalelhät tä Lhawuk häpe aka Dios. Wet lhok, “Onuhikwela Lhawuk len'äyij, wet owohiyela nilhokej lhämtes tä ne'tek owoye, wet olehiyejt'ala.”
18Häte lham Lhawuk ifwalana yäm kalelhäj tä am, Israel, ahäpe t'at laka wichi tä Lewuk häp lham, mälhyej tä pajche ifwel amho, yämthilek let'amajej wet lewoye nilhokej lhämtes. 19Lham ayenla häpeya wichi tä inu'pe nilhokej wichi tä i'pe honhat tä lham yenlhi. Ahäpkhila wichi tä lewujyaj ihi, wet atoyaj y'ajla'pe honhat. Ahäpkhila wichi tä Lhawuk Dios t'amajchet, mälhyej lhämet p'ante iwoye.