Profetas tä kamatachehen
1Elat iche profeta chik i'amejen, wok häp hin'o tä yämehenpej lefwilhey. Wet ipäyen amehen n'otetnek wok m'ak chik wichi iseltejen. 2Wet elat hin'älte m'ak chik häpe, wet tä paj n'äl. Wet tahuy amejen wet yok, “¡N'ahän dios lhayis tä w'enha lhamej tä amel katäfwelayej! ¡N'en lhawuhuya lhamel!”
3Chik mälhyejtso, yej woyela hin'otso lhämet. Tsi Lhawuk Dios yelhtej amehen täjtso, t'uhläk hiw'en chik matche wet imälhewek ahusek tä lehumin häp lham. 4Yej leyej tä lehänlhi Lhawuk Dios. Wunit häp lham, woye lhämtes wet ch'ahuye. En Awuka wet ap'ajtejwek häp lham. 5Häp profetatso, wok hin'o tä yenpej lhämeta lefwilhey, letes ihi. Wet iwohiyet'ak õkniläna tä ne'tek amel letatayhlä Lhawuk Dios, häp lham tä ifwayhtejen ajchalis tä häpehen Egipto lakwenkay. Isit'a hin'otso, t'uhläk amel leleyej tä lenukwe Lhawuk Dios len'äyij tä lham ne'tek lenuyaykwe. Chik y'il hin'otso, häpkhilek noj m'ak tä ni'isa tä i'amhihen.
6Wet elat apuhfwa, wok äs, wok äse, wok hach'efwa tä matche tä lehumin, wok akalay'i tä lehumin, iweskatshayen ame lhämet tä yok, “¡Mäh n'en lhawuhuya dios lhayis tä w'enha lhamej!” Häp dios lhayistso letäfwenhiyejt'a, lhäy'e achätilis nitäfwenhiyejt'a. 7Häpe wichi tä i'pe honhat laka dios lhayis, häp dios lhayis tä wichi tä atofwe ahilä n'okwiyej, lhäy'e wichi tä ni'atofwaye ahilä. 8Yej tihila atichunhayaj wet yej tach'ahuyela m'ak tä aelh lenech'ethayaj tä ne'tek lewoye. Wet yej p'altsena, mat n'älita m'ak tä ni'isa tä iwoye. 9¡Län! Is chik am tä lechunej tä leneyhtejphä akwey wet tayhlä, wet nech'e nilhokej wichi tä lhamtejej. 10Thatejlhila tuntey pajla'tha y'il. Tsi lham t'uhläk leleyej Lhawuk Dios tä itonphä amel tä lheyayhihte Egipto tä ayen kwenkaya. 11Län t'at, häpkhilek nilhokej Israel lhayis ihanej wet yen sawkanyaja wet nowaye. Wet nemla yachajo chik iwoye m'ak tä mälhyejtso tä ni'isa.
12-13Wet chik lheyayhi honhat tä Lhawuk Dios hiw'en amhohen yämthilek lhenay haw'eta, elat leläte tä wichi yäme tä iche hin'ol tä kachuhantses tä ihi hupuy elh chik häpe, wet ichufwenejen wichi tä lew'et wet yok, “¡Mäh n'en lhawuhuya wichi tä w'enha lhamej laka dios lhayis!”, häp dios lhayis tä amel katäfwelayej. 14Chik mälhyejtso, is chik wuj tä letetshan. Wet chik lew'en tä matche t'at m'ak tä wichi yäme tä hin'oltso iwoye m'ak tä lhäy'e lhip tä ni'isa, 15iwohiyet'ak kalänahen nilhokej wichi tä ihi hupuytso, lhäy'e leläy itshätäy, wet täyhat nilhokej m'ayhay tä ihi. 16Hutawek nilhokej n'okäywet, tihila plaza wet wunho, lhäy'e hupuy, wet wujyeneja häp Lhawuk Dios. Wet hupuytso isit'ak õ'nech'aynhi, mat tehlat iwoye honhat tä õ'iskon.
17Wet amel yej tachumela elh chik häpe häp m'ayhay tä letäyhat, häpkhilek Lhawuk nitiya amejen lewäk. Mat itihla amejen lep'altsenyaj wet yämla wujpey amel, mälhyej tä ifwenho p'ante atetsel. 18Is chik lewoye nilhokej lhämtes tä ow'en amhohen ifwalana, wet lewoye m'ak tä is alhoho tä Lhawuk Dios akäjejlhi.