1Ch'ahuyaye olhämet, atsinhay tä haw'et Samaria,
amel tä lhätajen, mälhyej iwoye w'asetas tä ihi Basán,
wet lelhaklit wichi tä p'elitses,
wet tek lep'altsen wichi tä iwatlä m'ayek,
wet letahuyej hach'efwas tä lhopejkwe:
“Chäj n'oye hat'es yämthilek oyäyej.”
2Lhawuk Dios hit'unhatche lhämet tä yok:
“Tä ohäpe Elh tä le'isyaj ihi,
ofwel amhohen tä nämla ifwalas tä õ'chäjla amel,
õ'tälhthihomchela anhutsuy
chinhas tä tet iwoye nichätey,
wet õ'kafwuynhiyejomchela nichätey
häp ales chik õ'ton lhamel.
3Alet'ununhihena tä letälhchehen letowhäy
häp n'olafwek tä hupuy lep'ot tä atayhfwas itoyenlhi,
wet õ'thatla amehen chenaj Hermón.”
Häp täjtso Lhawuk lhämet.
N'on'okhayaj tä kamatache
4“¡Israel lhayis, mähen tä lehoyaye Betel
wet woye t'at hach'isukyaj!
¡Wet chik äp lehoye Gilgal,
ísej lhip hach'isukyaj tä lewoye!
Wet chäj t'at itshäwet tä lelän tä nech'e fwalapej,
lhäy'e aka diezmo tä tres ifwalaspej.
5Wet p'ajtej t'at otw'ayhat tä pan tä lewo graciasa,
wet en asilätyaja tä lewoye otw'ayhtes
tä atichunhayaj t'at tä let'uhläk lew'en n'oho.
Tsi häp täjtso tä amel lehuminay tä lewoye.”
Lhawuk lhämet t'at täjtso.
Tej tä õ'tasin Israel lhayis, mat t'unhen lehusey
6“Olham t'at tä olän amejen nehläs
tä lhehiche haw'etes wet äk ihichet'a.
Mat tej tä mälhyej'attso thayej,
tek lewoyay ahusey iyhäja.
Olham tä ohäpe Awuk Dios olhämet täjtso.
7Wet olham t'at tä one'tek nem iche pelhay
tres iwel'as tä kamaj niwak'alha yachuyaj.
Wet iche honhates tä ochene pelhay,
wet iche honhates tä tek iwomhihchä.
Wet äp iche n'olafwey tä w'atshan,
wet äp iche n'olafwey tä tamchäy tä pelhay newache.
8Wet wichi ihoyehen lhipey tä t'ukwe inät,
mat lhimphaj tä nilhoke,
w'awulhiyejt'a tä iyäyej tä ichim.
Mat tej tä mälhyej'attso thayej,
tek lewoyay ahusey iyhäja.
Olham tä ohäpe Awuk Dios olhämet täjtso.
9Olänejen akäs häp tafwojhi tä chayo,
lhäy'e lewos tä tuj,
wet chol ihämit nilhokej m'ak tä ihiche alafwey.
Mat tej tä mälhyej'attso thayej,
tek lewoyay ahusey iyhäja.
Olham tä ohäpe Awuk Dios olhämet täjtso.
10Ochen amehen t'inhayaj mälhyej tä ochenehte Egipto,
wet olänhen aka mamses tä ihi n'oka'tshayaj.
Wet letayhfwas lhayen lewuka yel'atas tä lew'utey,
wet wuj tä najut n'op'itseyhay
tä ihiche aka'tshayajw'etes.
Mat tej tä mälhyej'attso thayej,
tek lewoyay ahusey iyhäja.
Olham tä ohäpe Awuk Dios olhämet täjtso.
11Oselkat amejen awit'äyhyaj,
mälhyej täjte ochätyenpe Sodoma lhäy'e Gomorra,
wet ahätet iwoye hal'ä chik otiyej kanhihlä itäj.
Mat tej tä mälhyej'attso thayej,
tek lewoyay ahusey iyhäja.
Olham tä ohäpe Awuk Dios olhämet täjtso.
12Tä mälhyejtso, Israel lhayis,
awit'äyhyaj ihihila, kalelhäj owohiyela.
¡Tä mälhyejtso awaklhathen,
tsi lew'enla aka Dios!”
13Häp Dios tä lhenek chenhas wet lhenek yafwthi,
häp lham tä itäfwnhatej hin'o häp lham letichunhayaj,
wet yen isiya honatsi wet t'äsche'pe chenhas,
Lhawuk Dios tä lajit letumfwaya, häp täjtso lhey.