Õyachaje Dios häp Lewukwe yämthilek häpe t'at lham t'amajchet
1Tä Salomón ileyej p'ante tä iwo t'alhyaja, wet nichätchä häp itäj tä tälh puleye wet iwunej häp itshätäy tä õ'länhen tä õyen n'okhayajayej Lhawuk, lhäy'e itshätäy tä õ'wunhomche tä õyen n'okhayajayej lham. Wet n'äl häp Lhawuk lewujyaj tä isi, tapoyej Lewukwe. 2Wet sacerdotes nemhit ikalhi chik tiyäjchufwi Lhawuk Lewukwe, tsi häp tä Lhawuk lewujyaj tä isi tapoyej. 3Wet tä Israel lhayis hiw'en tä nichätchä häp itäj tä tälh puleye, lhäy'e häp Lhawuk lewujyaj tä isi tä inuhchä wet hip'o'pe Lewukwe, lhamel t'upechehchä pajtha tatey taje piso tä n'okwiyej Lhawuk. Wet wuj tä akäjejlhi häp Lhawuk wet iten letenek tä yok:
“Wuj tä is Lhawuk, hap'altsentsaj.
Lajit lepesa häp lehumnhayaj.”
4Tä tajyäme täja, wet rey Salomón lhäy'e nilhokej Israel lhayis lhamel ilänhen itshätäy wet yen n'okhayajayej Lhawuk. 5Salomón hiw'enho Lhawuk veintidós mil (22.000) w'asetas tä õ'länhen wet ciento veinte mil (120.000) tson'atas.
Häp tä mälhyej p'antetso tä rey lhäy'e Israel lhayis yachaje Lhawuk häp Lewukwe yämthilek häpe t'at lham t'amajchet.
6Wet sacerdotes lhamel tachum'atwethä, yenlhi t'at lhamel lechumet. Wet Leví lhayis lhamel iwujyenej Lhawuk häp músicas tä rey David p'ante ne'tek õyenlhi yämthilek tach'ote häp iyhäj tä t'ichoywethä tä iten letenek tä yok, “Lajit lepesa häp Lhawuk lehumnhayaj”, lhäy'e tä iten iyhäj n'otenkay tä David ilesayen p'ante. Wet sacerdotes ihi t'at tä lhamel tatache tä yafwutchehen lefwolis, wet nilhokej häp Israel lhayis tä takasthen.
7Äpte Salomón yen t'amajchetayej Lhawuk häp hup ka'alho chowej tä ihi tä Lhawuk Lewukwe tatache. Wet häp tä äp ilänhen itshätäy tä iwunhomche yämthilek yen n'okhayajayej Lhawuk. Äpte yen t'awayhata Lhawuk häp itshätäy t'alhä yämthilek lha'isyene Lhawuk. M'ak tä tamenej tä yenlhi tä ihi Lhawuk ka'alho, häp tä itshätäytso lhäy'e t'awayhtes iyhäj w'awulhit'a'pe altar tä bronce tä Salomón ne'tek õyenlhi p'ante.
8-9Wet wujpe wichi tä nämhen tä tälhe nilhokej honhat, tälhe chenhas kawayhi tä ihi Hamat tä itafwojhiye, pajtha nichäte lhamel tä tälhe tewok lhäsaj tä tumejlä Egipto tä itapinhiye. Wet pajtha siete ifwalas tä lhamel iwo käjyajayej tä lhamel yachaje Lhawuk häp altar yämthilek häpe t'at lham t'amajchet. Wet tä noj lakäjyajtso, äp iche elh lhamel lakäjyaj tä lhey N'ohupelis pajtha äp siete ifwalas. Wet tä tajyäme täjtso, lhamel lhaihutwek wet n'okwiyej Lhawuk. 10Wet häp iwel'a tä siete wet ifwala tä veintitrés, wet rey iwo laka tajlhamayayej wichi tsi noj lakäjyaj. Wet wichi yikhen tä yäpnhomche lew'etes, wet wuj tä akäsejwethä häp m'ak tä hiw'en tä is tä Lhawuk iwoyeje lakawo p'ante David, lhäy'e Salomón, lhäy'e häp laka wichi Israel lhayis.
Lhawuk yachajo tä lhain'ältej häp Salomón
11Wak'alh p'ante Lhawuk Lewukwe tä Salomón ne'tek õyenlhi, lhäy'e häp rey lewukwe tä lham lew'et. Nilhokej häp m'ayhay tä t'up'antehläk õyenhoplhi Lhawuk Lewukwe lhäy'e häp rey lewukwe, nech'e wak'alhen nilhokej. 12Wet tä honatsi p'ante Lhawuk lhain'ältej häp Salomón wet yok:
–Olätnaj ame tä lewo alhyaja. Wet ottshupiye honhat lhipna tä õyen häpeya ow'et yämthilek wichi yen n'okhayaja n'oyej itshätäy tä õ'länhen. 13Wet tä mälhyejtso, chik nemhit ofwoyenche pule wet nemhit iwomchä, wok ochen chol häpkhilek ikänchi hal'äy tä w'atshan chik tufw, wok ochene äytes häp oka wichi, 14wet chik oka wichi, häp lhamel tä olhey iyej, lhamel lhay'ayhatchä, t'u n'okwe wet iwo t'alhyaja, wet ilechehen lakeyis tä ni'isachehen tä iwoye, chik mälhyejtso, olham otch'ahuhiyela tä oihi Ow'et tä ipuleye. Nemla otichunche lhamel lech'isukyajay tä iwoye, tsi otäyhat letes wet yachajo tä isila lhamel laka honhat. 15Tälhe athana nech'e oyahnhiyejahchä oka wichi wet otch'ahuhiyela lhamel t'alhyajay chik iwoye tä ihi häp honhat lhipna. 16Ottshupiye Owukwena wet otiyej okäpfwayaj, wet nech'e häpe t'at ot'amajchet wet lajit lepesa tä ow'et t'at. Olham ot'uhiyela nilhokej ifwalas wet oyikhit'alach'oye. 17Wet am is chik leten ajcha David wet lewoye m'ak tä is alhoho. Is chik lewoye t'at olhämtes wet lhen achumyaja nilhokej ochufwenyajay. 18Chik mälhyejtso m'ak tä lewoye, wet ot'uhiyela aniyatyaj. Oyämla kalelhäj, mälhyej olhämette ofwenho ajcha David tä oyok, “Lajit lepesa tä äspej t'at tä häpe Israel lhayis laka rey.”
19“Isit'a chik lelehla n'oyej, nemhit letetshan olhämtes lhäy'e ochufwenyajay tä ow'ente amhohen, häp tä lhen awuhuya dios lhayis iyhäj wet len'okwiyej. 20Chik mälhyejtso m'ak tä lewoye, wet osohiyeja Israel lhayis häp honhat tä ow'enhohte lhamel. Nemla ihi tä ottache Owukwe tä oyennaj ot'amajcheta, owom, wet nilhokhiyeja wichi tä i'pe honhat tä iläkwlhi. 21Hupna ts'ilakhilat lhipey tä ikatsi, tsi owasthihila. Wet nilhokhiyeja wichi chik nekhila lhipche inuhthila lhamhohen wet yohlak, ¿Chipte tä Israel laka Dios iwoynejatsi häp huptsi lhäy'e honhatna? 22Wet lhamel elh yohlak, Häp tä lhamel yikch'oye Lewuk Dios tä itonphä p'ante lhamel lechätilis tä itälhtho honhat tä Egipto. Wet nech'e lhamel ihänlhi dios lhayis iyhäj, lhamel yen lewuhuya wet n'okwiyej. Häp tä tamenej tä lham itiyej wuj m'ak tä ni'isa lhamel.”