Wichi iwasthiche õn'okhayajw'etes tä ni'isahen
1Häp tä tiyäme p'ante m'ayhaytso, wet ilhokej Israel lhayis tä ihi õkäjyaj tä lhamel ihoye hupuy tä ihi Judá. Wet lhamel iwasthiche tuntey tä wichi iwo len'okhayajayej, häte yisthen hal'äy tä dios tsinha tä kamatache tä lhey Asera lepeykas, wet iwasthiche altares lhäy'e õn'okhayajw'etes tä ihiche lhipey tä toschephä, yäk nofwej tä ihi honhat tä lewuk Judá lhayis, lhäy'e tä ihi honhat tä lewuk Benjamín lhayis, wet hätej p'ante tä ihi honhates tä lewuhuy wichi tä tälhehen letetsel Efraín lhäy'e Manasés. Tä lhamel ileyej, elh weihalhapej yäple honhat tä lew'et ihi.
Ezequías ikanchä sacerdotes lhäy'e Leví lhayis
2Wet Ezequías ikanchä sacerdotes lhäy'e Leví lhayis tä õhw'entejchehen lechumyaj. Elh weihalhapej õ'tshupyeneje m'ak tä ichuma tä yen lechumyaja tä yen n'okhayajayej Lhawuk tshätäy tä õ'wunhomche, lhäy'e tshätäy tä õ'länhen yämlek wichi lha'isyene Lhawuk. Hätej ne'tek lhamel iwunit Lhawuk wet hiw'enho laka gracias wet hich'ote lechumet tä ihi Lew'et. 3Wet rey hiw'enho lhamel iyhäj leläy yämlek ilänhen wet iwunhomche tä yen n'okhayajayej Lhawuk ifwalapej tä nech'e nat lhäy'e tä honaj. Wet ithatlä iyhäj leläy yämlek lhamel iwo len'okhayaja tä ifwala tä õt'elakw'etpej, lhäy'e tä wel'a tä nech'ayekpej, lhäy'e lakäjyajay iyhäj tä lhamel iwoyepej, mälhyej tä Lhawuk lhämtes ne'tek õ'woye.
4Hätej rey inityenej wichi tä ihi Jerusalén chik hiw'enho m'ak tä t'uhawetej sacerdotes lhäy'e Leví lhayis, yämlek iche m'ak tä lhamel isej yämlek ikalhi tä iwoye ilhokej Lhawuk lechumtes tä Lhawuk lhämtes ne'tek lhamel iwoye. 5Häpe p'ante tä õ'wo siläta wichi tä ihi Israel, wet lhamel ihuminche. Wet lhamel hiw'enho laka yachuyaj lhay tä lechunkatshay, trigo, hat'es, aceite, käyek, lhäy'e ilhokej m'ayhay tä õlhäk tä tälhpe honhat. Häte lhamel hiw'enho laka diezmos tä tälho ilhokej m'ayhay tä lhamel hiw'en.
6Hätej Israel lhayis lhäy'e wichi iyhäj tä ihi Judá tä lhamel hiw'enho tä yen laka diezmoya w'asetas lhäy'e tson'atas, lhäy'e m'ayhay iyhäj tä lhamel yen t'amajchetayej Lhawuk Dios. Wuj m'ayhay tä lhamel ihän alhoho. 7Häp ihi wel'a tres tä lhamel iwo tesa tä iskonhen m'ayhaytso, wet lhamel ihämit leskonkay tä ichäte wel'a siete tä noj tä iskonhen m'ayhay. 8Häp täjp'ante Ezequías lhäy'e leniyatfwas tä lhamel iyahne m'ayhay tä õ'iskonhen, wet lhamel iwunit Lhawuk wet t'alhe chik ikäpfwaye laka wichi Israel lhayis.
9Wet Ezequías y'ätshaneje sacerdotes lhäy'e Leví lhayis häp m'ayhay tä õ'iskonhen. 10Wet Sacerdote tä Lhamya tä lhey Azarías tä lechäti p'ante Sadoc, lham ichulho tä yok:
–Häp tälhe lewhäy tä wichi iwo tesa tä ichäje Lhawuk Lew'et m'ayhay tä olhamel ow'ayhtes, wet olhamel ow'en m'ak tä otuj wet naya, wet kamaj wuj m'ak tä imälhehi. Tsi Lhawuk matche tä ikäpfwaye laka wichi.
11Tä Ezequías iläte täjtso, wet ne'tek lhamel iwaklhat lew'et m'ayhay yämlek itichufwi Lhawuk Lew'et. Wet tä wak'alh, 12wet lhamel ihänchufwi yachuyaj lhay tä lechunkatshay, lhäy'e laka diezmos, lhäy'e m'ayhay tä lhamel yen t'amajchetayej Lhawuk. Häp lhamel itumtej Conanías, Leví lhayis elh, lham tä itetshan ilhokej m'ayhaytso, lhäy'e lepuhfwa Simey tä ihänphä elh tä lhalech'otfwas p'ante. 13Wet rey Ezequías lhäy'e Azarías tä Sacerdote tä Lhamya tä ihi Dios Lew'et, lhamel itshupyene hin'ol iyhäj yämlek hich'ote Conanías lhäy'e Simey. Häp hin'oltso lheyis Jehiel, Azazías, Nahat, Asael, Jerimot, Jozabad, Eliel, Ismaquías, Mahat, lhäy'e Benaías.
14Häp Leví lhayis elh tä lhey Coré tä Imna lhäs, häpe elh tä lepewo tä t'uye Lhawuk Lew'et lepe tä tumej lhip tä ifwala tälhche. Wet lham tä itetshan m'ayhay tä wichi hiw'enho Lhawuk Dios, wet hiw'enhomche iyhäj m'ak tä tälho Lhawuk lew'ayhtestso, lhäy'e m'ayhay tä lhamya tä õyen t'amajchetayej Lhawuk. 15Wet iche hin'ol tä hich'ote Coré tä ihi hupuy tä sacerdotes lew'etes. Lhamel lheyis Edén, Minjamín, Jesúa, Semaías, Amarías, lhäy'e Secanías. Wet lhamel iwoye lechumet tä hiw'enhomche m'ayhay häp iyhäj tä lepuhfwas tä thänhäy lhäy'e tä nithänhäya tä õhw'entejchehen lechumtes. 16Hätej hiw'enhomche m'ayhay häp hin'ol tä inu'pe tres nekchämis tä lheyis ihi lehi, ilhokej lhamel tä ihochufwi Lhawuk Lew'et yämlek ichumthä tä iwoye lechumet ifwalapej, mälhyej tä lhamel w'enhayej lechumet tä iwoye. 17Häp sacerdotes tä lheyis ihi lehi, õ'thatlä lepuhfwas lheyis, wet Leví lhayis tälhe tä hiw'en veinte nekchämis, õ'lesaynhen lheyis mälhyej m'ak tä lhamel lechumyaj lhäy'e tä w'enhayej lechumyaj tä lhamel iwoye. 18Häte õ'lesaynhen lheyis häp lech'efwas lhäy'e leles. Tsi iwatläk sacerdotes lhaiwaklhathenpej tä lhayen t'amajchetesayej Lhawuk yämlek iwoye lham lechumet. 19Wet ilhokej hupuy tä iche hin'ol tä ihi tä õ'tshupyenehen yämlek lhamel tä w'enhayej tä hiw'enho m'ayhay tä õw'ayhtes ilhokej sacerdotes tä tälhe letes Aarón, lhäy'e ilhokej Leví lhayis tä õ'lesaynhen lheyis tä lhamel yen lew'etesa honhat lhipey tä iwhäye hupuy.
20Häp ilhokej täjtso m'ak tä rey Ezequías iwoye tä ihi p'ante Judá. Wet is m'ak tä iwoye, häp is alhoho lhäy'e tä matche, wet Lhawuk tä laka Dios käjejlhi. 21Tsi matche tä t'ukwe Dios, wet m'ak at chik häpe tä iwoye tä hich'ote Dios Lew'et, n'äl tä ithatlä ilhokej letichunhayaj, lhäy'e tä iwoye Dios lhämtes lhäy'e lechufwenyajay. Wet häp tä tumenej tä is alhoho häp m'ak tä iwoyepej.