1Tä mälhyejtso, leyayej nilhokej m'ak tä ni'isachehen lhäy'e n'otkanyaj. Yej tenay lhamel tä fwetaj lhayen isa, yej t'äytene aelh, wet yej lhäme sitäy. 2Atech'aynej t'at nä'tshas tä nech'e ichehen. Wopej yiya akat'os tä ts'ilak, wok oyok, Dios lhämet tä ahusey lhäk, häpkhilek aisej wet alechiheltejen yämlek lekatej afwayhyaj. 3Tsi matche tä letäfwelej Lhawuk lep'altsenyaj.
Cristo hätet iwoye tunte tä iläy
4Hoyaye häp Cristo, tä lham hätet iwoye tunte tä iläy, häp tunte tä hin'ol itiyej kanhi, mat Dios tatshupiye wet yen häpeya tunte tä lhäy'e lhip tä laha ihi. 5Häte amel, a'enay häpeya tuntey tä iläyhen häpkhilek Dios ayen Lew'eta. Ahäpkhila sacerdotes tä t'amajchetes, tsi han'okhayaj tä lewunthiyeja Dios hätehlat iwoye m'ak tä sacerdotes yen Dios t'awayhtesa. Wet Dios lakäjyaj ihiyeja han'okhayajtso, tsi tälhiyela t'at ahusey häp tä isej Jesucristo. 6Häp Dios lhämet tä ihi Lehi yok:
“Lhek yahinya, otihi Sión tunte
tä häpe tunte tä lhamya,
häp tunte tä ottshupiye lhäy'e tä wuj laha.
Wet häp elh chik häpe chik ichaye,
ihichet'ala m'ak chik lhaifwech'enejlhi.”
7Häp amel tä lechaye tuntetso, wuj tä aisej, tsi matche t'at tä laha ihi. Mat lhamel tä nichayaye, nech'e matche Dios lhämtes tä ihi Lehi tä yok:
“Häp tunte tä hin'ol
tä yenlhi hup itiyej kanhi,
nech'e häpe t'at tunte tä lhamya.”
8“Häp täja tunte
tä wujla'pe wichi tä tanhäphänejlhi
wet nichätche katsi.”
Tä lhamel tanhäphänej, häp tä nitch'ahuyaye Dios lhämet. Mat häpe t'at täjtso tä Dios itshupyeneje lhamel.
9Mat amel ahäpehen wichi tä Dios tatshupiye, ahäpe sacerdotes tä tach'ote wet n'okwiyej Niyat tä Lhamya, wet ahäpe wichi tä t'amajchetes tä lham ikalhi wet lhayen Lewuka. Lham tatshupi amehen häpkhilek lhenay asilätyaja m'ayhay tä isis tä yenlhi, tä lham t'än amehen yämthilek lhekch'oye honataj wet lechätho laka isi tä wuj tä isilataj. 10Fwalas tä pajche kalelhäjit'a m'ak tä ahäpehen, mat athana nech'e ahäpehen t'at Dios laka wichi. Häte fwalas tä pajche Dios lep'altsenyaj ihit'a amejen, mat athana lham ahip'altsenhen.
“Woyaye m'ak tä t'uhawetej tä ahäpehen Dios lakawos”
11Ipuhfwas tä oalehumnhay, olhaip'altsen amehen amel tä awichi tä lheyayhi ayej honhatna tä kahaw'eta, yej wahin amejen anech'ethayajay tä tatayhlä ahusey. 12Äm is alhoho m'ak tä lewoye tä lhewej wichi tä nitäfwelayej Dios, häpkhilek lhamel tej chik yäm amehen tä fwetaj akni'isahen, mat chik hiw'en achumyaj tä is, iwunthila Dios chik nichäte fwala tä lham ikalelhät nilhokej wichi.
13Tä ahäpehen Lhawuk leles, ch'ahuyaye nilhokej niyatey tä i'pe honhat, wok häp lhaka niyat Romano tä häpe elh tä len'ohyaj inu'pe iyhäj, 14wok häp n'owustas tä lechenhay tä ne'tek itasnhen wichi tä iwoye m'ak tä ni'isa, mat itiyej lech'otyaj häp lhamel tä iwoye m'ak tä is. 15Tsi Dios ihuminche chik lewoye m'ak tä is, häpkhilek tej chik wichi tä nhanache m'akejen tä isukis, newache lhämet chik itäyhtej ahilähen.
16Athana nemhit ahäpehen n'okwenkay. Mat yej lhok, “Olewuk t'at m'ak tä owoye”, wet athahit'a amho tä lewoye m'ak tä ni'isa. Matkat woyaye m'ak tä t'uhawetej tä nech'e ahäpehen Dios lakawos. 17Yej lhenay w'et m'ayeka elh at chik häpe. Huminay apuhfwas, wujyen Dios wet woye lhämtes. Enay häpeya hin'o tä len'ohyaj ihi häp lhaka niyat Romano.
Cristo leteläythayaj lhäy'e n'amel lhateläythayaj
18Amel tä ahäpehen n'okawos, ch'ahuyaye awuhuy wet enay häpeya hin'ol tä len'ohyajay ihi. Ts'ilakhit'a lhamel tä hap'altsentses lhäy'e tä lehusey ihi tä letach'ahuyaye, mat häte iyhäj tä fwitses. 19Tsi wuj tä laha ihi chik letetshan Dios lenech'ethayaj, tej chik leteläytej ateläythayaj tä nit'uhawetayej. 20Mat chik lewoyaye m'ak tä ni'isa wet awuhuy aitasinwethä'pe, tej chik alekhajyenhen tä leteläytej, lajit lahaya. Mat chik häpe m'ak tä is tä lewoye tä tamenej tä ateläythayaj i'amejen, häp tä laha ihi wet Dios akäjlhi amejen.
21Häpe t'at täjtso tä Dios t'änej amehen, tsi Cristo iwo p'ante leteläythayaja atapehen yämthilek letenay t'at m'ak tä iwoye. Häpe t'at täjtso han'äyij. 22Tsi lham niwohit lech'isukyaj chik häpe tä iwoye, wet tek ifwech'enlhi elh chik häpe. 23Tä wichi iläkwlhi, mat lham tek iläkwlhi wichi. Wet tä lhamel itiyej leteläythayaj, mat lham tek yok, “Owohla ohayahlä lhamel.” Mat lhayachaje Dios, tsi ihanej tä is alhoho lakalelhthayaj tä iwoye. 24Cristo tilhäj n'amel lhach'isukyajay wet iti letape tä i'pe cruz, yämthilek häte n'amel y'alhayen häpeya lep'itseyhay tä y'ehi tä lhach'isukyajay tatache, mat y'aläyhen tä y'ehi lha'isyaj. Häpe t'at lham lelätshay tä aisej tä lechesen. 25Tsi fwalas tä pajche amel amälhyet iwoye tson'atas tä wetahen. Mat athana letapilaye Cristo tä t'u amehen, hätet iwoye tson'ataswo tä t'uyehen leläy.