1Mälhyej p'antetso tä õ'wo t'ufwahtesa ilhokej Israel lhayis, wet õ'tihi lheyis häp õlesaynekhi tä lhey “Reyes tä ihi Israel.” Mat Judá kawichi õ'chäje p'ante Babilonia tä õyen kwenkaya, häp m'ak tä ni'isa tä lhamel iwoye häp tä tumenej.
Wichi tä pilthä tä tälhe Babilonia
2Häp lhamel tä ichun tä pile lew'etes tä ihi Judá häpe Israel lhayis, sacerdotes, Leví lhayis, lhäy'e iyhäj tä hich'ote Dios Lew'et. 3Wichi tä tälhe letetsel Judá, Benjamín, Efraín, lhäy'e Manasés, elhpej lhamel yen lew'eta Jerusalén.
4Elh lhamel tä tälhe Judá kawichi häpe Utay tä lajcha Amihud wet lechätilis Omri, Imri, Bani, tä lhamel tälhe Fares tä häpe Judá lhäs. 5Wet elh häpe Asaías lhäy'e leles tä lhamel tälhe Judá lhäs elh tä lhey Sela. 6Wet elh häpe Jeuel lhäy'e lepuhfwas tä lhamel tälhe Judá lhäs elh tä lhey Zera. Wet tä ilhokej, iche seiscientos noventa (690) wichi tä Judá lhayis tä yen lew'eta Jerusalén.
7Wet wichi tä tälhe letes Benjamín tä yen lew'eta Jerusalén, häpe Salú tä lajcha Mesulam wet lechätilis Hodavías lhäy'e Senúa, 8wet Ibneías tä lajcha Jeroham wet lechätilis Ela, Uzi, lhäy'e Micri, wet Mesulam tä lajcha Sefatías wet lechätilis Reuel lhäy'e Ibnías. 9Wet tä õhp'ajtej lepuhfwas, tä ilhokej iche novecientos cincuenta y seis (956) Benjamín lhayis tä iyhäj kaniyatey tä yen lew'eta Jerusalén.
Sacerdotes tä yen lew'eta Jerusalén
10-12Häp tähisna sacerdotes tä yen lew'eta Jerusalén:
Jedaías, Joyarib, Jaquín,
Azarías tä lajcha Hilcías
wet lechätilis Mesulam, Sadoc, Merayot, lhäy'e Ahitub.
Azarías häpe hin'o tä t'uye Dios Lew'et
wet itetshan õchumet tä ihi.
Adaías tä lajcha Jeroham
wet lechätilis Pasur lhäy'e Malquías.
Masay tä lajcha Adiel
wet lechätilis Jazera, Mesulam, Mesilemit, lhäy'e Imer.
13Tä ilhokej sacerdotes, iche mil setecientos sesenta (1.760). Ilhokej lhamel häpehen iyhäj kaniyatey, wet wuj tä ihanej tä hich'ote Dios lechumet tä ihi Lew'et tä T'amajchet.
Leví lhayis tä yen lew'eta Jerusalén
14-16Häp tähisna Leví lhayis tä yen lew'eta Jerusalén:
Semaías tä lajcha Hasub
wet lechätilis Azricam, Hasabías,
tä lhamel tälhe letes Merari.
Bacbacar, Heres, Galal,
Matanías tä lajcha Micaías
wet lechätilis Zicri lhäy'e Asaf.
Abdías tä lajcha Semaías
wet lechätilis Galal lhäy'e Jedutún.
Berequías tä lajcha Asa wet lechäti Elcana
tä ihi honhat tä tott'aho hupuy tä lhey Nichätchä.
Wichi tä ihi Jerusalén tä t'uye Dios Lew'et
17Häp hin'ol tä t'uye Dios Lew'et häpe Salum, Acub, Talmón, lhäy'e Ahimán. Salum häpe laka niyat, 18wet yäk athana tä t'uye lepe tä rey inukwe tä tumej tä ifwala tälhche. Pajche lhamel häpehen lepewos tä t'uye Leví lhayis lew'etes.
19Wet Salum lajcha lhey Coré, häpe Ebiasaf lhäs, wet Ebiasaf lajcha häpe elh Coré p'ante tä lhäs. Wet Salum lhäy'e lepuhfwas Coré lhayis, lhamel lhaitumtej tä t'uye Lhawuk Lew'et lepe, mälhyej tä pajche tä lhamel lechätilis iwoyepej tä lhamel t'uye p'ante lepe elh tä tumejlä Lhawuk lew'et tä carpa. 20Ifwalas tä pajche p'ante, Finees tä Eleazar lhäs häpe lepewos kaniyat wet Lhawuk iyej p'ante lham.
21Wet Zacarías tä Meselemías lhäs häpe elh tä t'uye p'ante lepe elh tä tumejlä Lhawuk lew'et tä carpa.
22Wet tä ilhokej lhamel tä õ'tshupyenehen tä häpe lepewos, ihi p'ante doscientos doce (212), mälhyej tä õ'wo t'ufwahtesa tä ihi lew'etes. Häpe t'at hin'ol tä iyhäj ichayehen, wet häp tä rey David lhäy'e profeta Samuel itshupyeneje p'ante lechumtestso. 23Mälhyej p'antetso lhamel lhäy'e leles tä häpe lepewos, lhamel tä lechumet tä lhaitumtej tä t'uye Lhawuk Lew'et tä T'amajchet. 24Wet lhamel t'uye lepe tä tumej tä ifwala tälhche, lhäy'e lepe elh tä tumej tä ifwala itayche, lhäy'e lepe elh tä tumej tafwojhiye, lhäy'e lepe elh tä tumej tapinhiye. 25Wet lepuhfwas tä lew'etes ihi lhipey iyhäj, lhamel nämhenpej yämlek hich'ote iyhäj. Wet lhamel tä lhaitumtejpej tä t'uye lepelis lewhäypej siete ifwalas. 26Mat cuatro lepewos tä niyatey tä Leví lhayis tä hanlä tä lhamel lechumet. Wet ilhokej lewhäy tä lhamel t'uye hupuy lech'oye lhäy'e m'ayhay tä laha ihi tä ichufwi Dios Lew'et. 27Wet ilhokej honatsispej tä lhamel t'uye Dios Lew'et. Tsi lhamel tä lechumet tä t'uye lhäy'e tä ifwoyenchehen lepelis ilhokej nech'e natpej.
28Wet iche iyhäj lhamel tä t'uye m'ayhay tä õ'chumyenthä tä õn'okwiyej Lhawuk. Wet lhamel iwo t'ufwahtesa tä itonchephä lhäy'e tä y'uythen. 29Häp iche iyhäj tä t'uye m'ayhay tä õt'amajchetes, lhäy'e õlhäkhis, õlhäthis, lhäy'e m'ayhay iyhäj, lhäy'e harina, hat'es, aceite, incienso, lhäy'e iyhäj m'ayhay tä lenij akäjche. 30Wet iche sacerdotes tä lhamel tä yenlhi lakacha m'ayhay tä lenij akäjche. 31Wet iche Leví lhayis elh tä lhey Matatías, Salum lhäs tä thaläkw, häpe Coré lhayis elh. Lham tä ichuttej tä yenlhi m'ayhay tä õtulhlhek tä õyen Lhawuk lew'ayhata. 32Häte iche iyhäj tä Coat lhayis, lhamel tä yenlhi pan tä õyen t'amajcheta tä lhamel itihipej ilhokej ifwalas tä õt'elakw'et.
33Häte iche iyhäj tä itetshan tä yenlhi música. Häpe Leví lhayis tä iyhäj kaniyatey tä lhamel yen lew'eta õwukwey tä ichufwi Lhawuk Lew'et. Tek m'ak elh tä lhamel itetshan, ts'ilak lechumettso tä ichuma tä ifwala lhäy'e tä honatsi.
34Ilhokej lhameltso häpe Leví lhayis tä iyhäj kaniyatey yäk ichäte leles tä lepes lheley. Wet lhamel yen lew'eta Jerusalén.
Rey Saúl lhäy'e wichi tä tälhe
35Iche p'ante hin'o tä lew'et Gabaón tä lhey Jehiel, wet lech'efwa lhey Maaca. Lham häpe Gabaón lajcha, 36wet leles iyhäj häpehen Abdón tä häpe elh tä lechunkatsek, Zur, Cis, Ba'al, Ner, Nadab, 37-38Gedor, Ahío, Zacarías, lhäy'e Miclot tä häpe Simea lajcha. Wet ilhokej lhameltso iwo lew'etawhäye lepuhfwas tä ihi Jerusalén.
39Ner häpe p'ante Cis lajcha, wet Cis häpe p'ante Saúl lajcha, wet Saúl leles häpehen Jonatán, Malquisúa, Abinadab, lhäy'e Es-ba'al. 40Jonatán lhäs lhey Merib-ba'al, wet lham häpe p'ante Micaías lajcha. 41Micaías leles häpehen Pitón, Melec, Tarea, lhäy'e Acaz. 42Acaz häpe p'ante Jara lajcha, wet Jara leles häpehen Alemet, Azmavet, lhäy'e Zimri. Zimri häpe p'ante Mosa lajcha, 43wet Mosa häpe p'ante Bina lajcha, wet Bina häpe p'ante Refaías lajcha. Refaías häpe p'ante Elasa lajcha, wet Elasa häpe p'ante Asel lajcha.
44Asel leles p'ante ihi seis, lhamel lheyis Azricam, Bocrú, Ismael, Searías, Abdías, Hanán. Häp tähistso Asel leles.