David iwaklhat wichi yämlek ihäne Jerusalén Lhawuk lhämet lehi
1David ne'tek õyenlhi lewukwey tä ihi Hupuy tä lham Lew'et. Häte iwaklhat lhip yämlek itihi Arca tä Dios lhämtes ihi wet yenlhi lewukwefwaj tä tsänt'äj tä lehitso lew'et. 2Wet yok:
–Häp Arca ihichet'ala elh chik ichäj, telhame häp Leví lhayis. Tsi Lhawuk tä itshupiye yämlek lhamel tä ichäj Arca wet hich'otepej Dios lechumet yämlek tiyäj'attsiy.
3Wet David t'änehen ilhokej Israel lhayis wet ihutwek tä ihi Jerusalén, yämlek lhamel ihäne Arca häp lhip tä iwaklhat tä itihi. 4Wet ihutwek hin'ol tä tälhe letes Aarón, lhäy'e Leví lhayis. 5Häp Leví lhayis tä tälhe letes Coat, näm Uriel tä häpe niyat lhäy'e ciento veinte (120) iyhäj tä lepuhfwas t'at.
6Häp Leví lhayis tä tälhe letes Merari, näm Asaías tä häpe niyat lhäy'e doscientos veinte (220) iyhäj tä lepuhfwas t'at.
7Häp Leví lhayis tä tälhe letes Gersón, näm Joel tä häpe niyat lhäy'e ciento treinta (130) iyhäj tä lepuhfwas t'at.
8Häp Leví lhayis tä tälhe hin'o p'ante lhey Elisafán, näm Semaías tä häpe niyat lhäy'e doscientos (200) iyhäj tä lepuhfwas t'at.
9Häp Leví lhayis tä tälhe hin'o p'ante lhey Hebrón, näm Eliel tä häpe niyat lhäy'e ochenta (80) iyhäj tä lepuhfwas t'at.
10Wet häp Leví lhayis tä tälhe hin'o p'ante lhey Uziel, näm Aminadab tä häpe niyat lhäy'e ciento doce (112) iyhäj tä lepuhfwas t'at.
11Wet David t'änehen sacerdotes Sadoc lhäy'e Abiatar, lhäy'e Leví lhayis Uriel, Asaías, Joel, Semaías, Eliel, lhäy'e Aminadab. 12Wet David ifwenho lhamel tä yok:
–Amel tä ahäpehen Leví lhayis kaniyatey, amaj amejen, alhen õt'amajchetesa, lhäy'e aiyhäj, yämlek iwoye chik lechäjay Arca tä Lhawuk tä Israel laka Dios lhämtes ihi wet lehänaye lhip tä pajche owaklhatej. 13Tsi mälhyej tä ichunte häpkhit'a amel tä lewoye, häp tä tumenej tä Lhawuk Dios lewäk ihi wet iti n'oyejen letasnhayaj. Tsi n'amel tek n'ach'ahuye m'ak tä lham ihuminche, n'en w'et m'ayeka.
14Tä mälhyejtso, sacerdotes lhäy'e Leví lhayis lhamel t'amaj lhamejen wet lhayen õt'amajchetesa yämlek iwoye tä lhamel tilhäj Arca tä Lhawuk tä Israel laka Dios lhämtes ihi. 15Wet Leví lhayis tä tilhäj Arca, ithatpe lefwapo wet isej hal'äy tä ihiche lew'etes yämlek hip'alkatchufwi, mälhyej Lhawuk lhämet p'ante ifwenho Moisés wet Moisés ne'tek lhamel iwoye.
16Häte David ifwenho Leví lhayis kaniyatey wet yok:
–Is chik letshupyene iyhäj aka wichi yämlek ichoythä wet y'aji música. Is chik lhamel yäm äytaji tä y'ajiche arpas wet y'ajwek chinaj lhipey tä hin'älit tä lakäjyaj ihi. 17Wet Leví lhayis itshupyenehen Hemán tä Joel lhäs, lhäy'e Asaf tä Berequías lhäs tä Hemán lepuhfwa, wet häte Etán tä Cusaías lhäs tä tälhe Merari kawichi. 18Häte lhamel itshupyenehen lepuhfwas iyhäj yämlek hich'ote lechumyaj. Häpehen Zacarías, Jaaziel, Semiramot, Jehiel, Uni, Eliab, Benaías, Maasías, Matatías, Elifelehu, Micnías, lhäy'e häp iyhäj tä lepewos, häpe Obed-edom lhäy'e Jeiel.
19Häp Hemán, Asaf, lhäy'e Etán, häpe lhamel tä y'ajwek chinaj lhipey tä bronce, 20wet Zacarías, Aziel, Semiramot, Jehiel, Uni, Eliab, Maasías, lhäy'e Benaías, lhamel tä w'enhayej tä y'aji arpas mälhyej tä Elam lhayis iwoye. 21Wet Matatías, Elifelehu, Micnías, Obed-edom, Jeiel, lhäy'e Azazías, lhamel tä w'enhayej tä y'aji arpas mälhyej tä Simín lhayis iwoye. Wet tä iwoynejetso, hich'ote lhamel tä iten letenkay. 22Wet Kenanías tä Leví lhayis kaniyat lham ichufwenej letenkay, tsi wuj tä ihanej música.
23Häp iyhäj tä t'uye Arca tä Dios lhämtes ihi häpe Berequías lhäy'e Elcana. 24Wet sacerdotes Sebanías, Josafat, Natanael, Amasay, Zacarías, Benaías, lhäy'e Eliezer, häpe lhamel tä yafwutchehen lefwolis trompetas tä lhamel ihi tä Arca itayche. Wet Obed-edom lhäy'e Jehías häte lhamel häpe iyhäj tä t'uye Arca.
David ihäne Jerusalén Lhawuk lhämet lehi
25Wet David lhäy'e hin'ol tä thänhäy tä ihi Israel, lhäy'e sip'älis kaniyatey, lhamel ihoye Obed-edom lew'et wet ichäje Arca tä Lhawuk lhämet lehi häp Jerusalén. Wet wuj tä lakäjyaj ihi. 26Wet tä Dios hich'ote Leví lhayis tä tilhäj Arca, wet õ'län siete w'asetas lhäy'e siete tson'atas tä asnakis tä õyen n'okhayajayej häp lham. 27Wet David ikäfwel lhamej wesaj tä lino tä wuj tä is, häte iwoye Leví lhayis tä tilhäj Arca, lhäy'e iyhäj tä ichoythä, lhäy'e Kenanías, häp lhamel tä yenlhi música laka niyat. Ilhokej lhamel tä hiw'uyhi lew'uy tä lino tä wuj tä is. 28-29Wet häp tä ilhokej Israel lhayis tä lhamel ihäne Arca tä Lhawuk lhämet lehi häp Jerusalén, hupuy tä David lew'et. Wet lhamel iwo lechosa tä t'änhen, wet yafwutchehen lefwolis tä tson'ataj ch'ul, wet y'ajiche arpas lhäy'e tä isichätthä lakafwus. Wet Mical tä Saúl lhäse tä ichufwi lew'et, wet hiw'enlä David tä katinlhi wet iwo lakäjyaja. Wet ilät lhame tä wuj tä n'äyiho'pe David häp m'ak tä iwoye.