Ỹataqta 'aupi'iỹa'a Ñim Nataxala'
1Saishet qome da 'aualemata souaxat na qauemaicpi,
qataq saishet da 'anquiỹatega na ỹo'ottac na qauempi,
2cha'aye namayepi saqaỹaloq da deqaqa 'eeta'am ana huoue.
Qataq saqaỹaloq da deqaqa 'eeta'am na 'auaqpi.
3Ỹataqta 'aupi'iỹa'a Ñim Nataxala'
qataq 'auo'ot ca ỹaỹamaqchiguiñi,
yaqto' nache qonetai' da qonetalec
ana 'alhua qataq qoquetegue Ñimaye.
4Ỹataqta 'auauotec Ñim Nataxala',
nache Ñimaye ipacchigui qome ca qonetapeguec.
5Ỹataqta 'aumato'ot qome da 'anachaalataxac Ñim Nataxala',
ỹataqta 'aupi'iỹa'a Ñimaye,
nache Ñimaye anac qome da 'am itauan.
6Ñimaye ỹo'ot qome da 'eroigui da no'on 'arataxac.
Qataq da ỹaỹamaqchiguiñi 'arataxac
'eeta'am na le'eraxa añi nala' da mashe na'a'q laiñi.
7Ỹataqta 'añe'emaxat da qoueto'ot Ñim Nataxala',
qataq 'auauo'o da 'arhualaxavic da 'auata'a da 'am itauan Ñimaye.
Saishet da 'am inogoqchet ca huo'o da na'achecỹaxac,
huo'otaq ca lapaqtapiguiñi na qauemsat.
8'Axanec da 'annogoxonaxac qataq qoca'ai da 'aralemataic,
saishet da 'aualemata cha'aye damaye 'am ỹauecta'a ca qauem.
9Cha'aye na qauemaicpi imeuo qome qanqa'en,
qalaxaye ca naquitto'ot Ñim Nataxala'
qalaq taỹot da lalamaxat qome ne'ena 'alhua.
10Cha'aye mashe sa qaỹaloq da imeuo ne'ena qauemaicpi,
qaq na'aictoxo' da 'anmittaique qome
qalaxaye saishet da qaltaq 'auanata.
11Qalaxaye na qaica ca na'amqaanaxac,
taỹot qome da lalamaxat ne'ena 'alhua,
qataq ỹataqta imauec da lactapiguiñi.
12Na qauemaicpi nmitta'a da ỹo'otec
ca qauem ca ỹale no'on da lataxac,
da ỹamata'a qalaq nlaqchigui da lquiỹaxa da lmeenaxanaxac.
13Qalaxaye Ñim Nataxala' daỹalleguettac,
cha'aye ỹaỹaten da ne'ena qauemaicpi,
mashe saqaỹapeque ca loga't.
14Na qauemaicpi qalaq nqatsheguem na lainec,
qataq ichegaxattelec na lchecnec da yaqto' huañi naqa'en
na choxoraqpi qataq na huo'o da lhuenaxanaxa,
qataq ỹalauat na ỹataqta no'on da lataxac.
15Qalaxaye na maiche lainec namayepi,
maiche ỹa'ayigui qome añi lquiyaqte,
qataq na lchecnecpi ỹataqta huacaigui qome.
16Na saq 'amaqtaq lalamaxat ca ỹale no'on da lataxac,
namaye ỹataqta 'onaxaic, qaq saq 'ena'am
na qalota lsallaxa na qauemaicpi.
17Cha'aye naua lhua'q na qauemaicpi taỹa'alo da huaca'c,
qalaxaye Ñim Nataxala' nllichiguiñi na no'on da lataxac.
18Ñim Nataxala' ntela'a na qaica ca ỹasouaxat,
qataq nache 'eetai' naqa'en nam lalamaxatpi namayepi.
19Qataq da ivita da qauema naua na'axa'te,
qalaq namayepi qaica ca iueetac,
qataq da ivita da huo'o na nqouaxa
qalaq namayepi huañi na aloq.
20Qaq na qauemaicpi qalaq taỹa'a da imeuo,
na npa'agueetague' Ñim Nataxala'
qalaq taỹa'a da nlaguiñi, 'eeta'am na lmala'q.
21Na qauemaicpi ỹauo'o na la'aalec,
qalaxaye saishet da isheeten,
qaq ca ỹale maye no'on da lataxac,
qalaq dechoxonnataxan qataq dachetaqtaxan.
22Ñim Nataxala' nam ỹanem da nqouagaxa,
namayepi talec qome da lalamaxat na 'alhua,
qaq na ỹasaxalec da qauem qalaq namayepi nlaguiñi.
23Ñim Nataxala' ilo'ogue da lqauaxac ca ỹale,
da ỹaỹamaxareeta da no'on lataxac,
24nache na'aictaxa da quia'aqñi, qalaxaye saishet da huañi,
cha'aye Ñim Nataxala' nasoqtañi camaye.
25Co'ollaq ñaq aỹem nsoqolec qataq nagui
da mashe aỹem ỹa'axaiquiolec, qalaq saishet
da sauaachigui da qaỹalata'a't na no'on da lataxac,
qataq saishet da sauaachigui na llalaqpi
da dashelaxaataique ca aloq.
26Ỹataqta imerauec naua na'axa'te
da huo'o da lchoxonnataxanaxa qataq ỹan da na'aalaxanaxac,
qaq na llalaqpi chegoqchigui da nchoxonnataxanaxa.
27Qoca'ai qome na qauemsat, qataq 'auo'ot ca ỹaỹamaqchiguiñi,
yaqto' nache 'eetai' da huo'o ca 'arma' maye ishet da qonetaña.
28Cha'aye Ñim Nataxala' ỹauotec da nalochiguiñi lataxac,
qataq saishet da ca'ai ca quetegue Ñimaye.
Qalaxaye nlaxaañi na qauemaicpi qataq saishet
da huo'o ca no'onañi naqa'en na chegoxoguetpi.
29Na shiỹaxauapi maye no'on da lataxac namayepi taỹot na 'alhua,
qataq nache 'eetai' qome da netalec namaye.
30Na no'on da lataxac da detaqa,
qalaq ỹaanaxanaxaiqa naua la'aqtaqa,
qataq ỹaỹamaqchiyiñi naua la'aqtaqa.
31Qataq naua lapaxaguenataxanaxaco Ñim Lo'onatac 'Enauacna,
huetaiguilo añi lquiyaqte ỹoqo'oye
saishet da desalvi' naua lapia'ate.
32Na qauemaicpi qalaq nauaatac na no'on da lataxac,
cha'aye huotaique da ỹalauat.
33Qalaxaye Ñim Nataxala' saishet da loxonec naqa'en namayepi,
qataq saỹashen da qaỹauo'o ca lasouaxashet da qanmit namayepi.
34Qaq 'am 'auata'aguet qome Ñim Nataxala',
qataq 'aupacchigui na 'eetapeguecpi,
yaqto' Ñimaye 'am ỹo'oxoraq naqa'en,
qom 'am ỹanem yi'iye 'alhua da 'aralamaxat.
Qataq 'auauaachigui qome da qanlaxaañi na qauemaicpi.
35Aỹem sauaachigui so qauemaic maye ỹataqta ño'oxonnaxaic,
da nquictauec 'eeta'am ana qo'oipaq,
da qalochiguiñi ana lcouepi,
36qalaxaye jec, nache saishet da qaltaq yo'oq,
aỹem ñimittaique qalaq saishet da sanata.
37Ñaq 'aumeten qome ca nalochiguiñi qataq no'on da lataxac,
cha'aye no'on ca taỹa'a ca huo'o da l-lagaxayec.
38Cha'aye 'enauac na 'etaxaloxoicpi taỹa'a da nlachiguiñi,
qataq taỹa'a ne'ena qauemaicpi da nmichiguiñi.
39Da lca'alaxa na ỹalleppi maye no'on da lataxac,
chegoqo'ot Ñim Nataxala',
Ñim lle'eguenaxala' da huo'o da lqalaic.
40Qaq Ñim Nataxala' itauan namayepi da yaqto' qoỹetauec,
ỹeltaxaneguet na qauemaicpi, nache nca'alaxatec,
cha'aye namayepi ỹataqta pi'iỹa'a Ñimaye.