Qaỹapalaxat ca nasouaxashet
1Ỹataqta machiguiñi qome ca shiỹaxaua
maye imauec da qaỹapalaxat na lasouaxashetpi
qataq da lle'etaxaloxo.
2Ỹataqta machiguiñi ca shiỹaxaua
maye saishet da qauem ca 'eetapeguec,
qataq Ñim Nataxala' saishet da huo'o ca ỹasaxalec lasouaxashet.
3Qaq co'ollaq saxanaxa da sa'axat na ỹasouaxashetpi,
nache da ỹo'ocỹaxac taỹañicra souaxat
da ỹachotaxac 'enauaque naua na'axa'te,
4cha'aye ye na'a'q qataq ye pe,
qalaq da 'arhuaqỹaxac huetalec da sheeta.
Nache sheeta'am aca lauoxo maye daqaqtañi,
souaxat na le'eraxa aso nala' da ivita ye cotap,
qaq 'era da 'eetec da saỹañicra.
5Qalaxaye 'am sa'axatem co'ollaxa na ỹasouaxashetpi,
qataq saishet da 'am soxocheesop na qauem maye so'otpi,
nache sheeta': «Aỹem sa'axatem na ỹasouaxashetpi Ñim Nataxala'.»
Nache 'am 'auapalaxat 'enauac namayepi.
6Qaq ỹoqo'oye da qanayeuaigui da que'eenaxac,
nache na 'am quetague'pi 'am iỹaxanot,
qaq na'aictaxa da ỹa'auat na 'etaxat qataq npaxaasheguem,
qalaxaye saishet da ivitsheguema namayepi.
7Qaq 'am nache 'am ỹe'eguenaxala',
qataq aỹem 'ampaxattalec souaxat na lcheeguesat,
qataq aỹem coleesop 'anqa'en da no'onaxanaxac
maye naigui da aỹem huesochiguiñi.
8Qaq Ñim Nataxala', 'eeta':
«Aỹem 'am sanem qome na ỹapaxaguenataxanaxacpi,
qataq na iqataxacpi qataq 'am sachaxana
so nqa'aic maye ishet da qoquetegue.
Qataq nache 'am salletagui qome.
9Qaq saishet qome da qoneta'am na 'ashena
huo'otaq na caaỹo, maye qaica ca ỹaỹaanapec
nache iuen da qaỹauo'o ca nmiiguishec
qataq naua lqueenaxanaqa'ate da yaqto' qanllañi,
cha'aye da sa qoỹeetec de'era, nache saishet da qaipoteua'a.»
10Qaq na qauemaicpi ỹataqta qalota qome na nqui'iguesat,
qalaxaye da lsoxoyec Ñim Nataxala',
ỹataqta coleesop na pi'iỹa'a Ñimaye.
11Qantoñiito'ot qome Ñim Nataxala',
qami' shiỹaxauapi maye qami' soxoraicpi
qataq qami' ỹo'oxoraiqa,
qauamaichiguiñi qataq qauo'onaxañiitac
souaxat da qantonaxaqui.