Da atamnaxac da qaiỹaxanot Ñim Lo'onatac 'Enauacna
1'Am Nataxala', 'am ỹalamaqtot ñaqa'en da ñatamnaxac,
2'Am Ñatamnaxala', ỹataqta 'am sepe'etega,
ỹoqo'oye saishet qome da 'auo'ot ca ỹa'aloxo.
Saishet da 'aua'aqta'a da aỹem lashetac na ñepa'aguenaxauapi.
3Qataq saishet qome da 'auo'ot
ca la'aloxo na ỹataqta 'am pe'etega,
Nacherata da 'auo'ot da la'aloxo
na choche chegoqchiiya' da 'am dataỹa'aguet.
4'Am Nataxala', aỹem 'auachaxana qome na 'anqa'aicpi,
qataq aỹem 'auapaxaguenec da 'eetec na salca'ague 'anqa'aicpi,
5qataq aỹem 'auachaxana da llec
da 'eesa lataxac, qataq aỹem 'auapaxaguen,
cha'aye nache 'am Ñatamnaxala' qataq 'am ica'alaxaqui.
Qataq nache 'am sepe'etega 'enauaque naua na'axa'te.
6'Am Nataxala', 'auennata'a qome da 'arsoxoyec
qataq da 'arauotaxanaqtaic maye nache 'eetai'
naxa da aỹem 'auachaxaatega.
7Qataq saishet qome da 'auennatega
na ỹasouaxashetpi, qataq na qauemsat
maye so'ot co'ollaq ñaq aỹem nsoqolec,
'Am Nataxala', aỹem 'auennata'a qome,
souaxat da lta'araic 'arsoxoyec qataq 'arauotaxanaqtaic.
8Ñim Nataxala' ỹataqta soxoraic
qataq no'on da lataxac, ỹoqo'oye ishet
da ỹapaxaguenec da no'on ñecỹaxac na 'etaxaloxoicpi.
9Qataq ỹauega da no'on ñecỹaxac
na qaica ca la'amaqchec, qataq ỹapaxaguenec
da llec na ỹaỹamaqchiguiñi lataxacpi.
10Qaq 'enauac de'era llecỹaxac Ñim Nataxala'
huetaigui da lsoxoyec qataq da 'eesa lataxac,
da yaqto' talec nam ipacchigui da naỹamaxataxac
qataq na lamaxasoxonaxacpi Ñimaye.
11'Am Nataxala', souaxat da huo'o naq 'enec
'anqa'en da 'are'enaxat, nache 'auapalaxat qome
da lta'araic ỹasouaxashet.
12Ca ỹale da huo'o naq 'enec naqa'en Ñim Nataxala',
nache Ñimaye ỹachaxana ca ỹataqta no'on
nqa'aic da yaqto' quegue camaye,
13qataq qaica ca iueetac naqa'en,
qataq ca chegoxoguetpi camaye nache netalec qome na 'alhua.
14Ñim Nataxala' ỹataqta nauochaxaua
nam huo'o naq 'enec naqa'en Ñimaye,
qataq ỹauattonaxanaxanec da naỹamaxataxac Ñimaye.
15Da imeenaxanaxac qalaq nache 'eetai'
naxa da salleto'ot Ñim Nataxala',
cha'aye Ñimaye aỹem nca'alaxateeguesop
naxa 'enauac na lcheeguesat.
16Ñaq aỹem 'anamata'a qataq aỹem 'auchoxoren 'am Nataxala',
cha'aye aỹem ñerauec qataq huo'o da ỹachetataic.
17Qataq nquictauec da laquicoxo añi iquiyaqte,
qaq no'on da aỹem 'anqateeguesop da iuogoxo.
18Ñaq 'aula'a qome da ỹaquicoxo
qataq da ñeque'eenaxac nache 'auapalaxat
'enauac na ỹasouaxashetpi.
19Ñaq 'aula'a da ỹataqta nquictauec
ye lcata na ñepa'aguenaxauapi, qataq ỹataqta
sa la'axaic da lquiỹaxa da aỹem ilota'a.
20¡Ñaq aỹem 'antela'a,
qataq 'anca'alaxatec da ñachaalataxac!
¡Saishet da aỹem 'auasheneguet da ña'aloxonaxac,
cha'aye nachaq 'amta da aỹem 'ampaxattalec!
21Ñaq aỹem mpaxaalec qome da ño'oxonnataguec
qataq da qaica ca sasouaxat,
cha'aye ỹataqta 'am sacheto'ot da ñaquitaxac.
22¡'Am Ñatamnaxala', ñaq 'anca'alaxateeguesop qome
na Israel le'ecpi 'enauac na nque'eenaxaguesat!