Ca qoỹan nalamaxat maye qaica ca 'ena'am
1Ñaq aỹem 'antela'a qome 'Am Ñatamnaxala',
cha'aye nache 'amta da 'am ỹe'eguenaxala'.
2Cha'aye 'am shenapega co'ollaxa, sheeta':
«Nache 'amta da 'Am Ỹataxala',
qaica ca lỹa chegoqo'ot na ỹalamaxatpi.»
3Na atamnaxala'pi maye huetalec
ne'ena 'alhua ỹataqta 'añaxaicpi,
cha'aye nache 'enapec na ỹo'oxoreetac namayepi,
4qalaxaye na quetague' ne'ena atamnaxala'pi nquictauec da nqui'ic.
Qaq aỹem saishet qome da salegueua'a
na icoldec naua ntago'q da lachetaqtaxanaxat.
Qataq saishet da ñasaxauec na le'enaxatpi namayepi.
5'Am Nataxala', nache 'amta da aỹem qoueta'aguet,
cha'aye nache 'amta da aỹem 'aỹa'anem da 'archoxonnataxanaxa,
da ñachaalataxac qalaq nache huetaiguilo naua 'arhua'q.
6Ỹataqta 'onaxaic ye aỹem taalec da ima',
qataq ỹataqta 'onaxaic ye aỹem taalec da ỹalamaxat.
7Sanot da ña'achecỹaxac Ñim Nataxala',
cha'aye Ñimaye aỹem hua'aqtega,
cha'aye ivira'a ye pe da ỹa'aloqchetta'ape naua iuennataxaco.
8Qaq aỹem qalaq nache 'eetai' naxa da sa seỹotaique Ñim Nataxala',
Ñimaye nache huetaua'a ñaqa'en na aỹoic,
nache qaica ca ishet da souañi naqa'en.
9Qaq ỹoqo'oye ỹataqta machiguiñi añi iquiyaqte,
qataq aỹem nlaqchigui da ñetonaxac.
Nache 'enauac da ñachaalataxac qaica ca ndaqtaique,
10cha'aye da ñachaalataxac saishet da 'ano'onaxatangui aca huachiqui,
qataq saishet da 'aualatangui aca nshere ne'ena 'aramaxashec.
11Qataq aỹem 'auachaxana da llec da achaalataxac,
qataq aỹem nlaqchigui 'anqa'en da ñetonaxac
da 'am soota'aguet qataq nache 'eetai'
da ỹamaicỹaxac da soota'ague na 'oic.