Da lo'onataxanaxac na leviitapi
1Nache Ñim Nataxala' 'enapega so Moisés qataq so Aarón, 'eeta':
2«Qauo'oche qome aca le'enaxat lmalate na leviitapi, maye chegoxoguet so Quehat, nache ỹataqtac qanqa'eñi na maiche chegoxoguet lta'alpi na maiche nalamaxat nhuo' le'ecpi, 3nache qa'iyiiuo na ỹalleppi, maye ivi' qataq napacalec ye treinta, qataq nam ivi' ye cincuenta vi'iye da nachaalataxac, na mashe ishet da do'onataxaneua'a ca npe'l maye naỹonqa'.
4Qaq da lo'onataxanaxac ne'ena chegoxoguetpi so Quehat, da ilo'ogue na nogoxoshetpi maye ỹataqta sa qaishetapec, 'eeta': 5Da ivita da jec ne'ena nhuo' le'ecpi, nache so Aarón qataq na llalaqpi, nachena na nqat qome ca lapoxot ca ñegueuo ca npe'l, nache dapoxona camaye da ỹapolec añi arca maye laỹe' da aỹamaxataxac. 6Qataq npa'axanasheguem na ỹataqta no'on lo'oc, qataq ỹaueguelec na hualoq laỹe imalaqalec ime, nache ỹanaguilo caua lachoxola'ate, da qaỹache añimaye. 7Qataq lapaxalec ca lmala' ana nauole maye qoỹanot Ñim Nataxala' ca hualoq laỹe imalaqalec, qataq ỹachalec camaye ca nquia'axaquipi, nemecpi, ỹomaxaquipi qapio'ole, qataq aca late'erai maye laỹe' na nachetaqtaxanaxat lataxa, qataq aca nauole maye nache qoỹaategueuo naxa ye na'a'q. 8Ime, qataq lapaxalec camaye ca hualoq laỹe togaxaraic, qataq npa'atcheguem ca ỹataqta no'on lo'oc, ime nache ỹanaguilo caua lachoxola'ate da qaỹache. 9Qataq ỹacona ca hualoq laỹe imalaqalec, nache ỹapolec aca ncoỹaraxanaxaqui lashe, qataq aca ncoỹaraxanaxaquipi, qataq ca nchegaxanaxat, qataq ca laỹe' na alo, qataq aca laỹe'pi na aceite. 10Ime, nache 'enauac camayepi da qaỹachalec qataq qalapaqtalec ca ỹataqta no'on lo'oc, qataq qaỹachaleguete caua 'epaxaye maye lachoxola'ate da qaỹache. 11Qaq aca nca'atoxonaxalate oro, qalapaxalec qome ca hualoq laỹe imalaqalec, qataq qaỹapolec acamaye ca ỹataqta no'on lo'oc. Ime, nache qoỹanaguilo caua lachoxola'ate 'epaxaye da qaỹache. 12Qataq qalaỹona't 'enauac ca laỹepi nogoxoshetpi maye no'onataxanaxatpi ca npe'l, nache qaỹachalec ca hualoq laỹe imalaqalec, qataq ca ỹoqta no'on lo'oc, nache qaỹachaleguete caua 'epaxaye maye lachoxola'ate da qaỹache. 13Qataq qaiỹota, qanqat na alo aca nca'atoxonaxalate, qataq qalapaxalec acamaye ca hualoq laỹe togaxaraic. 14Qataq acamaye, nache qaỹachalec 'enauac ca maiche logoxoshetpi da qaỹo'onataxaatega aca'aca nca'atoxonaxalate, aca poqo laỹe'pi, na'araxanaxatpi, nsheraxanaxatpi, nemaxanaqtepi, qataq 'enauac ca laỹe logoxoshetpi acamaye. Ime, nache qalpataxaalec ca ỹataqta no'on lo'oc, qataq qoỹanaguilo caua lachoxola'ate da qaỹache. 15Nache ñi Aarón qataq ñeua llalqa, da ime da laỹona't 'enauac cam nogoxoshetpi maye sa qaishetapec, nache na Israel le'ecpi ishet da jec, nache anac na chegoxoguet so Quehat da ỹache 'enauac ca nogoxoshetpi. Qalaxaye saishet da ỹasheleua'a ca camachaqca que'eca nogoxoshetpi maye sa qaishetapec, yaqto' saishet da ileu. Qaq 'enauac que'eca logoxoshetpi que'eca npe'l maye naỹonqa', da nachena nam chegoxoguetpi so Quehat nam ishet da ỹache camaye. 16Qaq so Eleazar, maye llalec so ntaxaỹaxanaxanec Aarón, nacheso so pa'aiguet da ilo'ogue ca aceite maye lca'atoxot ana ncoỹaraxanaxaquipi, qataq ca nchenaxanaxat maye ama da laitaỹaxac, qataq ca nachetaqtaxanaxat maye chegaqaigui ana ala ca nañiguishec, qataq ca aceite maye ncoraxanaxat. Qataq ilo'ogue ca npe'l, qataq 'enauac ca sa qaishetapec logoxoshetpi camaye.» 17Ñim Nataxala' 'enapega so Moisés qataq so Aarón, 'eeta': 18«Saishet qome da qauashiñi da imeuo na maiche nalamaxat nhuo' le'ecpi, maye chegoxoguet so Quehat, da ỹalectaigui na leviitapi. 19Qaq da yaqto' saishet da ileu namayepi, souaxat da ỹasheleua'a ca nogoxoshetpi maye sa qaishetapec, nache namayepi ỹo'ot qome de'era 'eeta': So Aarón qataq soua llalqa, ỹapaxaguenec qome ñi 'oonolec namayepi ca lo'onataxanaxac qataq cam ishet da ỹache. 20Yaqto' namayepi saishet da huo'o ca huaña da pa'auo, da choche imeten ca nogoxoshetpi maye sa qaishetapec, cha'aye da 'eetec de'era nache ileu.» 21Nache Ñim Nataxala' 'enapega so Moisés, 'eeta':
22«Nataqa'en 'auo'ot qome aca le'enaxat lmalate 'enauac na chegoxoguetpi so Guersón, qalaxaye ỹataqtac 'anqa'en na chegoxoguet lta'alpi, na maiche nalamaxat nhuo' le'ecpi. 23Nache 'ereuo 'enauac na ỹalleppi maye ivi' qataq napacalec ye treinta, qataq ivira'a nam ivi' ye cincuenta vi'i da nachaalataxac, maye mashe ishet da do'onataxaneua'a ca npe'l maye naỹonqa'.
24Qaq 'era da lo'onataxanaxac qome na chegoxoguetpi so Guersón, 'eeta': 25Namayepi nachena na ỹache qome ca lapoxonaxatpi ca npe'l, qataq 'enauac que'eca npe'l, qataq ca ỹataqta no'on lo'oc maye qalapaxalec naxa na pa'aỹasheguem, qataq ca lapoxot ca ñegueuo ca npe'l maye naỹonqa', 26qataq ca lpaqtaxat ca npe'l, qataq ca lapoxot ca lasom ca ñegueuo ca qasoxoc, maye netaña aca nca'atoxonaxalate, nataqa'en ca lquetpi que'eca napoxonaxatpi, qataq 'enauac ca no'onataxanaxatpi naxa que'eca npe'l. Qaq 'era da 'eetec da lo'onataxanaxac namayepi. 27Qaq so Aarón qataq soua llalqa, nachesoua so ilo'oguelo qome 'enauac da lo'onataxanaxac nam chegoxoguetpi so Guersón da ivita da huo'o ca ỹacoolec da ỹo'ot, qataq nam ishet da ỹache namayepi. Qataq qauamaqailec da ỹataqta ilo'ogue 'enauac na qoỹami' da ỹache namayepi. 28Qaq 'era da lo'onataxanaxac na maiche nalamaxat nhuo' le'ecpi maye chegoxoguet so Guersón, da huaña ca npe'l maye naỹonqa', qaq so Itamar maye llalec so ntaxaỹaxanaxanec Aarón, nache ilo'ogue namayepi.
29Nataqa'en 'auo'ot qome aca le'enaxat lmalate 'enauac nam chegoxoguetpi so Merari, nache ỹataqtac 'anqa'en na chegoxoguet lta'alpi, na maiche nalamaxat nhuo' le'ecpi. 30Nache 'ereuo 'enauac na ỹalleppi maye ivi' qataq na napacalec ye treinta, nache ivira'a nam ivi' ye cincuenta vi'i da nachaalataxac, nam mashe ishet da do'onataxaneua'a ca npe'l maye naỹonqa'. 31Qaq da lo'onataxanaxac da huapegue' ca npe'l, nache ỹache ca nchiiguishec 'epaqpi, qataq ca l-llecnaxanaxatpi ca npe'l, huoqtepi, qataq ca na'attalecpi naxa acamaye, 32qataq aca lauoqtepi ca npaqtaxanaxat maye coleesop ca nqasoxoc ca npe'l, qataq aca na'attalecpi naxa, qataq aca qaitoqnañi lashepi ca lquetpi, qataq 'enauac ca no'onataxanaxatpi que'eca npe'l. Qaq ñi 'oonolec namayepi ỹataqtac na 'auamaxalec da ỹache. 33Qaq 'era da lo'onataxanaxac qome na chegoxoguet so Merari, da huapegue' ca npe'l, qaq so Itamar maye llalec so ntaxaỹaxanaxanec Aarón, nacheso so ilo'ogue qome namayepi.»
34Nache so Moisés, Aarón, qataq so lataxala'pi so lapoota'a't nhuo' le'ecpi, ỹo'ot aso le'enaxat lmalate som chegoxoguetpi so Quehat, ỹataqtac naqa'en so chegoxoguet lta'alpi na maiche nalamaxat nhuo' le'ecpi. 35Nam mashe ivi' qataq napacalec ye treinta, nache ivira'a na ivi' ye cincuenta vi'i da nachaalataxac, maye mashe ishet da do'onataxaneua'a so npe'l maye naỹonqa', 36nache da ima'a't se'eso nereguishecpi ỹalleppi, nache ivi' dos mil setecientos cincuenta. 37Qaq 'iye ye lcata 'enauac so nereguishecpi maye chegoxoguet so Quehat, maye mashe ishet da do'onataxaneua'a so npe'l maye naỹonqa', som lereguishecpi co'ollaxa so Moisés qataq so Aarón. Nache ỹataqta ipacchigui da lamaxasoxonaxac Ñim Nataxala', maye ỹamaxalec co'ollaxa so Moisés.
38Qataq qaỹo'ot aso le'enaxat lmalate na chegoxoguet so Guersón, qataq ỹataqtac qanqa'en na chegoxoguet lta'alpi na maiche nalamaxat nhuo' le'ecpi, 39maye ivi' qataq napacalec ye treinta, nache ivira'a nam ivi' ye cincuenta vi'i da nachaalataxac, maye mashe ishet da do'onataxaneua'a so npe'l maye naỹonqa', 40nache 'enauac se'eso nereguishecpi ivi' dos mil seiscientos treinta ỹalleppi. 41Qaq 'iye ye lcata 'enauac som chegoxoguetpi so Guersón, maye mashe ishet da do'onataxaneua'a so npe'l maye naỹonqa', som lereguishecpi co'ollaxa so Moisés qataq so Aarón. Qaq nache ipacchigui da lamaxasoxonaxac Ñim Nataxala'. 42Qataq qaỹo'ot aso le'enaxat lmalate na chegoxoguetpi so Merari, nache ỹataqtac qanqa'en na chegoxoguet lta'alpi, na maiche nalamaxat nhuo' le'ecpi, 43maye mashe ivi' qataq napacalec ye treinta nache ivira'a nam ivi' ye cincuenta vi'i da nachaalataxac, maye mashe ishet da do'onataxaneua'a so npe'l maye naỹonqa', 44nache se'eso nereguishecpi ivi' tres mil doscientos ye lcata. 45Qaq 'iye ye lcata som chegoxoguetpi so Merari, som lereguishecpi co'ollaxa so Moisés qataq so Aarón. Nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.
46Qaq 'iye ye lcata 'enauac so leviitapi maye lereguishecpi so Moisés, Aarón qataq so lataxala'pi so Israel le'ecpi, ỹataqtac qanqa'en na chegoxoguet lta'alpi, na maiche nalamaxat nhuo' le'ecpi, 47maye mashe ivi' qataq napacalec ye treinta, nache ivira'a nam ivi' ye cincuenta vi'iye da nachaalataxac, maye mashe ishet da do'onataxaneua'a so npe'l maye naỹonqa', 48qaq ye lcata se'eso nereguishecpi ivi' ocho mil quinientos ochenta. 49Nache ipacchigui da la'aqtac Ñim Nataxala' maye ỹamaxalec co'ollaxa so Moisés, da qoỹiyiñi ñi 'oonolec somayepi, qataq ỹataqtac qanqa'en na ishet da ỹo'ot, qataq ỹache. Qaq 'era da 'eetec co'ollaq qaỹo'ot aso ne'enaxat lmalate, nache qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.