Naua loga'te ye 'alhua Canaán
1Ñim Nataxala' 'enapega so Moisés, 'eeta':
2«Qonapega qome na Israel le'ecpi, qoneta:
Qom qaunoxoñiiua'a ye 'alhua Canaán, yem 'alhua maye qaralamaxache, nache 'ena qome na loga'tpi yemaye:
3Ye loga't ye 'alhua maye pa'aigue da la'añaxa, tachiguiña ye toolec 'alhua ye Zin nache ivira'a ye 'alhua Edom. Qataq chegoqchiguiña da nala' lliguisheguem, nache tachiguiña ye loga't ye pa'aigue da la'añaxa aye Auaxai Leuaxai, 4qaq se'eso loga't queteueegue da pa'aigue da la'añaxa, nache ivittasheguema ye Acrabín, qataq quetelec ye Zin, nache ivitta'a ye Cadés Barnea. Qataq tateuga ye Jazar Adar ivitta'a ye Asmón, 5qataq chegoqchiguiña ye Asmón, nache ivitta'a so la'auaxac ye 'alhua Egipto, nache tachiguiña aso auaxai Mediterráneo.
6Qaq ye loga't ye pa'aigue da avit, nache tachiguiña so loigue aye auaxai Mediterráneo.
7Qaq ye loga't ye pa'aigue da sheu', nache chegoqchiguiña aye auaxai Mediterráneo, nache ivitta'a añi qasoxonaxa Hor, 8qataq chegoqchiguiña añi qasoxonaxa Hor, nache ivitta'a so ñegueuo ye Jamat. Ime, qaltaq jec, nache ivitta'a ye Zedad. 9Qaq ye loga't maye pa'aigue da sheu', chegoqchiguiña ye Zedad, nache ivitta'a ye Zifrón qataq, nache loga't ye Jasar Enán.
10Qaq ye loga't maye pa'aigue da nala' lliguisheguem, qalaq qaỹo'ot qome ca na'anec, chegoqchiguiña ye Jasar Enán, nache ivitta'a ye Sefán, 11qataq chegoqchiguiña ye Sefán, nache nachiguiña ye Ribla maye pa'aigue da nala' lliguisheguem ye Ayin, qataq naỹaña ye pa'aigue da nala' lliguisheguem aso auaxai Cineret, 12qataq nache chegoqchiguiña yemaye da naỹaña so tala Jordán, nache tachiguiña aso Auaxai Leuaxai.
Qaq 'ena na loga'tpi qome yi'iye qana'alhuai.»
Da lataxac da qoỹanec ye 'alhua
13So Moisés 'enapega so Israel le'ecpi, 'eeta':
«Qaq 'ena na 'alhua maye qaỹauota'a qome da alletaxac da qami' qoỹanoiguilo. Qaq Ñim Nataxala' 'eetega da ỹataqtac na qoỹanem ñi 'oonolec na nueve maye maiche nalamaxat nhuo' le'ecpi, qataq na laỹepi maiche nalamaxat nhuo' le'ecpi, maye ncolaxara'ache co'ollaxa, 14cha'aye na chegoxoguet so Rubén qataq so Gad, qataq na laỹepi na maiche nalamaxat nhuo' le'ecpi maye ncolaxara'ache co'ollaxa, maye chegoxoguet so Manasés, maye mashe huo'o ye na'alhua. 15Qaq ne'enaua dos qataq na maiche nalamaxat nhuo' le'ecpi maye ncolaxachigui co'ollaxa, mashe huo'o ye lalamaxat na'alhua pa'aigue da nala' lliguisheguem ye sa qaỹapeque ye tala Jordán, maye nalotta ye Jericó.»
16Ñim Nataxala' qaltaq 'enapega so Moisés, 'eeta':
17«Qaq 'enaua qome naua qami' ỹanoiguilo na 'alhua, ntaxaỹaxanaxanec Eleazar qataq Josué, som llalec so Nun. 18Qalaxaye nataqa'en qauỹaxañiỹa qome ñi 'oonolec na lataxala'pi, na maiche nalamaxat nhuo' le'ecpi da yaqto' itaua'n naamaye da qoỹanec na 'alhua. 19Qaq 'ena le'enaxatpi na ỹalleppi maye qaiỹaxana qome da ỹanec na 'alhua:
Caleb, som llalec so Yefune, maye chegoxoguet so Judá.
20Semuel, som llalec so Amiud maye chegoxoguet so Simeón.
21Elidad, som llalec so Quislón maye chegoxoguet so Benjamín.
22Qataq so nataxala' Buqui, som llalec so Yoglí maye chegoxoguet so Dan.
23Qaq na llalaqpi so José, Janiel som llalec so Efod, maye chegoxoguet so Manasés, 24qataq so nataxala' Kemuel, som llalec so Siftán maye chegoxoguet so Efraín.
25Qataq so nataxala' Elisafán, som llalec so Parnac maye chegoxoguet so Zabulón.
26So nataxala' Paltiel, som llalec so Azán maye chegoxoguet so Isacar.
27So nataxala' Ajiud, som llalec so Selomi maye chegoxoguet so Aser.
28Qataq so nataxala' Pedael, som llalec so Amiud maye chegoxoguet so Neftalí.»
29Qaq 'esopi so iỹaxana co'ollaxa Ñim Nataxala' da yaqto' ỹanec na 'alhua ye Canaán.