Aso laỹepi nachetaqtaxanaqte maye sa imauaq da qaỹavigaxat
1Qaq 'era da llec aca nachetaqtaxanaqtepi maye sa imauaq da qaỹavigaxat, acamaye ỹataqta sa qaishetapec. 2Qaq da qaỹalauat ca nachetaqtaxanaxat shiguiỹac maye sa imauaq da qaỹavigaxat, nache huaña qanqa'en ca nalaataqa' na shiguiỹac maye nachetaqtaxanaxat. Qaq ca ltago'q nache qaicoroto naua laỹel añi nca'atoxonaxalate. 3Qaq 'enauac ca lcheta acamaye, nache qoỹaneuo, qataq 'enauac ca lcheta ca la'araxashet qataq ca lcheta na lauel le'ecpi, 4qataq caua lchiguishel ima'aguet nataqa'en ca lcheta, qataq ca lcheta ca l-laq lapat, nataqa'en ca lsheenec ca l-lamec. 5Ime, nache ca ntaxaỹaxanaxanec ỹavigaxat 'enauac acamaye, ỹachalec aca nca'atoxonaxalate yaqto' nachetaqtaxanaqte maye qaỹavigaxat da qoỹanot Ñim Nataxala'. Qaq 'era da 'eetec aca'aca nachetaqtaxanaqte maye sa imauaq da qaỹavigaxat. 6Qaq 'enauac ca ỹalleppi maye ntaxaỹaxanaxanecpi ishet da chec acamaye. Qataq da chec, nache huaña ca ỹaqauga ye nqasoxoc ñi npe'l, cha'aye acamaye ỹataqta sa qaishetapec.
Na ishet da qoỹanem na ntaxaỹaxanaxanecpi
7Qataq aca'aca nachetaqtaxanaqte maye sa imauaq da qaỹavigaxat qataq aca lỹa nachetaqtaxanaqte maye nataqa'en sa imauaq da qaỹavigaxat, caamaye, nache 'eeta'a't da llecỹaxa'c. Qataq que'eca ntaxaỹaxanaxanec maye ỹaneuo que'eca shiguiỹac, camaye nacheca ca taỹot acamaye. 8Nataqa'en ca ntaxaỹaxanaxanec maye ỹaneuo aca nachetaqtaxanaqte qaỹavigaxatta, camaye nache lalamaxat ca lo'oc que'eca shiguiỹac maye nachetaqtaxanaxat. 9Qataq 'enauac aca nachetaqtaxanaqtepi maye nauole maye nauotaxaqui ana qatelaxanaxaqui, huo'otaq aca taxaqui qataq ca nauoxonaxala' acamaye, nache taỹot ca ntaxaỹaxanaxanec maye ỹaneuo. 10Qataq 'enauac aca nachetaqtaxanaqtepi maye chegaqaigui na lsoche ana ala ca nañiguishec, ca mashe ndaqñiguishec qataq lalegue ca aceite, huo'otaq ca saxanaxa da qairaqten, nache taỹot 'enauac na llalaqpi so Aarón. Qataq nache 'eeta'a't ye lcata ca taỹot ñi 'oonolec.
Aso nachetaqtaxanaqte maye qanhuaachigui
11Qaq 'era da llec aca nachetaqtaxanaqte maye qanhuaachigui da qoỹanot Ñim Nataxala'. 12Qaq da huo'otaq qoỹaneuo aca'aca nachetaqtaxanaqte da qoỹan da 'achecỹaxac, nache qoỹaneuo aca nauole maye saishet da lalegue aca ỹasheeraxachigui ca ndaqñiguishec, ndotec da qairaqneguet ca aceite, qataq aca nauole sa nquesaxan, huo'otaq aca lỹa nauole maye lalegue ca aceite, chegaqaigui na no'on lsoche ca nañiguishec. 13Qaq aca nachetaqtaxanaqte maye qanhuaachigui, nache lỹateuo qanqa'en da qoỹaneuo aca nachetaqtaxanaqte nauole maye huo'o aca lalecte maye ỹashiiyigui naqa'en ca ndaqñiguishec. 14Qaq nache 'enauac acamayepi, ñi 'oonolec laỹe qaỹacona da qoỹaasheguem da qoỹanot Ñim Nataxala', qataq nache taỹot ca ntaxaỹaxanaxanec maye ichegoxouec ca ltago'q ca shiguiỹac nachetaqtaxanaxat maye qanhuaachigui. 15Qaq ca lapat ca shiguiỹac maye qoỹaneuo da qoỹan da 'achecỹaxac, da qanallec nache huetoigui qanqa'en ca na'a'q maye qoỹaneuo camaye. Qataq saishet qome da huo'o ca qano'onaxatañi da yaqto' ivira'a ca lỹa na'a'q.
Da lataxac ca lapat maye nachetaqtaxanaxat
16Qalaxaye da qoỹaneuo aca nachetaqtaxanaqte da huo'o ca qoỹan na'aqtac, huo'otaq aca nachetaqtaxanaqte maye maiche chegoqchigui da qoỹan, nache acamaye iuen da nache qanallec que'eca na'a'q maye huetoigui da qoỹaneuo, qaq ca no'onañi, nache ishet da qanallec ca lỹa na'a'q. 17Qalaxaye da ivirauga ca na'a'q tres, da ñaq huo'o ca no'onañi lapat aca nachetaqtaxanaqte, nache camaye iuen da qaỹalat qataq qaỹavigaxat. 18Qaq da huo'otaq huo'o ca chec que'eca lapat maye ivirauga ca na'a'q tres, nache Ñim Nataxala' saishet da ỹaconeguet qataq qaica ca naigui naqa'en aca'aca nachetaqtaxanaqte, cha'aye mashe qauem. Qaq que'eca shiỹaxaua maye chec que'eca lapat, camaye nque'etaxangui qome ca lasouaxashet.
19Qaq ca lapat maye nhuoiguet ca camachaqca nam qaiqaigapi, nache camaye saishet da qanallec, nacherata da qaỹalat qalaxaye qaỹavigaxat. Qaq que'eca lỹa lapat, nache 'enauac ca shiỹaxauapi maye qui'itta da lataxac ishet da chec.
20Qaq ca shiỹaxaua maye nshepaxan da lataxac, da huo'otaq chec ca lapat aca nachetaqtaxanaqte qanhuaachigui maye qoỹanot Ñim Nataxala', nache camaye qaỹo'orauec, ca'ai qanqa'en ca lauo' le'ecpi.
21Qaq ca shiỹaxaua da ỹashelagui ca la'atec ca shiỹaxaua, huo'otaq ca shiguiỹac maye qaiqaiga, huo'otaq ca camachaqca nam qaiqaigapi, da chec ca lapat aca nachetaqtaxanaqte qanhuaachigui maye qoỹanot Ñim Nataxala', nache camaye qaỹo'orauec, ca'ai qanqa'en ca lauo' le'ecpi.»
Da lataxac ca lcheta qataq ca ltago'q ca nachetaqtaxanaxat
22Ñim Nataxala' 'enapega so Moisés, 'eeta':
23«Qonapega qome na Israel le'ecpi, qoneta':
Saishet qome da qollequi ca lcheta ca huaca, qagueta huo'otaq aca quetaq. 24Qataq ca lcheta ca shiguiỹac leuaxaic, huo'otaq ca lcheta ca shiguiỹac lalaatac ca lỹa shiguiỹac maye dequi'iỹapec, camaye nacherata da ishet da qaiuen da qaỹo'onataxana huo'otaq da huo'o ca macheca lỹa naigui qanqa'en, qalaxaye saishet qome da qollequi.
25Qaq que'eca chec ca lcheta ca shiguiỹac maye qoỹanot Ñim Nataxala' da yaqto' nachetaqtaxanaxat maye qaỹavigaxat, camaye qaỹo'orauec, ca'ai qanqa'en ca lauo' le'ecpi.
26Qaq na'aictaxa ca pa'aigue ca qoñiitaña ana 'alhua, saishet qome da qollequi ca ltago'q ca maỹo, huo'otaq ca shiguiỹac. 27Qaq ca shiỹaxaua da chec ca lapat maye ñaq huo'o na ltago'q, nache camaye qaỹo'orauec, ca'ai qanqa'en ca lauo' le'ecpi.»
Som qaiỹotauga maye taỹot so ntaxaỹaxanaxanecpi
28Nache Ñim Nataxala' 'enapega so Moisés, 'eeta':
29«Qonapega qome na Israel le'ecpi, qoneta':
Ca shiỹaxaua da ỹaneuo aca lachetaqtaxanaqte maye qanhuaachigui, da ỹanot Ñim Nataxala', nache iuen da iỹotauga ca laỹe aca'aca lachetaqtaxanaqte, 30qataq nacheca camaye da iroua'a añi nca'atoxonaxalate maye lalamaqte Ñim Nataxala'. Qaq huaña, nache ỹacona ca ltogue lapat qataq ca lcheta ca shiguiỹac da ỹaasheguem da ỹanot Ñimaye. 31Ime, nache ỹanem ca ntaxaỹaxanaxanec, da yaqto' ỹavigaxat ca lcheta ỹachalec añi nca'atoxonaxalate. Qaq ca ltogue lapat, nache taỹot ca ntaxaỹaxanaxanecpi maye ltauapi so Aarón. 32Qaq ca ltele'eta aloiguishec ca shiguiỹac maye nachetaqtaxanaxat, nache taỹot ca ntaxaỹaxanaxanec. 33Cha'aye camaye nacheca ca taỹot da lalamaxat ca ntaxaỹaxanaxanec maye ỹaneuo ca lcheta, qataq ca ltago'q que'eca nachetaqtaxanaxat. 34Cha'aye aca nachetaqtaxanaqtepi maye qanhuaachigui maye Aỹem ỹanot qome nam Israel le'ecpi, seỹotauga qome ca ltogue lapat qataq ca ltele'eta da yaqto' nache 'eetai' qome da taỹot ñi ntaxaỹaxanaxanec Aarón, qataq cam chegoxoguetpi ñimaye. Qaq 'era qome da nache 'eetai' lataxac da llecỹaxac na Israel le'ecpi.
35Qaq aca'aca nachetaqtaxanaqtepi maye qaỹavigaxat da qoỹanot Ñimaye, nachaca qome aca taỹot ñi Aarón qataq cam chegoxoguetpi, nache chegoqchiguiña qome que'eca na'a'q da qoỹanagui da ntaxaỹaxanaxanec da qaitaxaỹapegue' Ñim Nataxala'. 36Nache 'era da lamaxasoxonaxac Ñim Nataxala', da yaqto' na Israel le'ecpi iỹotauga ne'ena laỹe aca lachetaqtaxanaqtepi da yaqto' taỹot ca ntaxaỹaxanaxanecpi, chegoqchiguiña que'eca na'a'q da qoỹanagui da lo'onataxanaxac camayepi. Qaq 'era qome da nache 'eetai' lataxac 'enauac na Israel le'ecpi.»
37Qaq 'era da llec aca nachetaqtaxanaqtepi qaỹavigaxatta, qataq aca chegaqaigui ana ala ca nañiguishec, qataq 'enauaque caua nachetaqtaxanaqte maye sa imauaq da qaỹavigaxa't, qataq aca nachetaqtaxanaqte da huo'o ca qoỹanagui da lo'onataxanaxac, qataq aca qanhuaachigui.
38Qaq 'era da 'eetec Ñim Nataxala' co'ollaq huaña añi qasoxonaxa Sinaí, co'ollaq ỹamaxalec so Moisés da 'enapega na Israel le'ecpi, huaña ye toolec 'alhua ye Sinaí da yaqto' ỹaneuo ana lachetaqtaxanaqtepi.