Na ỹotta'a't nqataxacpi
1Ñim Nataxala' 'enapega so Moisés, 'eeta':
2«Qonapega qome na Israel le'ecpi da ỹa'aqtac, 'eeta':
Ỹataqta qui'itta qome da qarataxaqui, cha'aye Aỹem Qarataxala'ai maye Qanatamnaxanala'ai, ỹataqta qui'itta da ỹataxac.
3Ñi 'oonolec ỹataqta huo'o da 'enec naqa'en ca lta'a, qataq aca late'e.
Qataq ỹataqta huo'o naq 'enec qanqa'eñi ye na'a'q mataxaqui, cha'aye Nachaỹem Nataxala' maye Qanatamnaxala'ai.
4Saishet da qanqo'oñiỹa da huo'o ca qoñiitapeguec ca ne'enaqtac lqui'ipi na atamnaxala'pi, qataq saishet da huo'o ca ỹo'ot ca le'enaqtac lcat, cha'aye Nachaỹem Nataxala' maye Qanatamnaxala'ai.
5Qaq da qaỹa'añiiua'a Ñim Nataxala' aca qarachetaqtaxanaqche maye qanhuaachigui, nache qaỹa'añiỹot aca ỹaỹamaxareeta Ñimaye. 6Qaq que'eca shiguiỹac maye qoỹaneuo, camaye iuen da nache qanallec que'eca na'a'q, qaq ca no'onañi nache ishet da qanallec ca lỹa na'a'q. Qaq ca ivirauga ca na'a'q tres, nache iuen da qaỹalat, qataq qaỹavigaxat. 7Qaq da huo'o ca chec aca nachetaqtaxanaqte da mashe ivirauga que'eca na'a'q tres, nache acamaye saishet da ỹaỹamaxaren Ñim Nataxala' cha'aye mashe qauem. 8Qaq ca chec acamaye, nache nque'etaxangui ca maiche lasouaxashet, qaq camaye nache qaỹo'orauec, ca'ai qanqa'en ca lauo' le'ecpi, cha'aye qaica ca naigui naqa'en cam qoỹanot Ñim Nataxala'.
9Da ivita ye laloxoqui da qanqache ca ala ca qa'añiguishequi, nache saishet qome da qanmacheeta ca ala, qataq saishet da qavi'iguelaqailec da qanatoi ca no'onañi ala. 10Qataq saishet da qanmacheeta aca ala aca qa'añiguishe uva, qataq saishet da qanatoi aca lli'ishe. Qauaqaita'a da yaqto' natosheguem na choxoraqpi, qataq ca ỹaqa'a ca chegaqa'ague. Qaq 'era da ỹa'aqtac, Aỹem Nataxala' maye Qanatamnaxala'ai.
11Saishet da qaucachi. Saishet da qauatenataxañi, qataq saishet da huo'o ca ỹatenachet ca lỹa.
12Saishet da qaỹa'añi ca qara'aqtaqui da qauatenataxañiỹa da ỹe'enaxat. Cha'aye da nache qoñeetec de'era, nache 'eeta'am da qaica ca naigui da le'enaxat Nam Nataxala' maye Qanatamnaxala'ai. Qaq 'era da ỹa'aqtac, Aỹem Nataxala'.
13Saishet da huo'o ca sa icherapec ca lỹa, qataq saishet da qauotaxañic ca maiche lalamaxat.
Qataq saishet da qanlliitañi ca nsheetenaguec ca 'onataxanaxaic da qaviraxachiỹa'a ca lỹa na'a'q.
14Saishet da huo'o ca isheueetac ca da'añaigui na lqaic.
Qataq saishet da huo'o ca quia'aqñi naqa'en ca sa nauaañi, souaxat da huo'o naq 'enec qanqa'eñi Aỹem. Qaq 'era da ỹa'aqtac, Aỹem Nataxala'.
15Saishet da huo'o ca qaỹo'ot sa ỹaỹamaxañi lataxac da qanmit ca huo'o ca lasouaxashet. Qataq saishet da qaiueelec ca choxoraq, huo'otaq ca sallaxanec. Nacherata da qaỹo'ot ca ỹoqta nalochiguiñi lataxac.
16Saishet da huo'o ca na'aqtaqa lo'o' da ỹalectaigui ca laỹepi, qataq da taỹa'a naqa'en da lchec da nachaalataxac ca lỹa shiỹaxaua, souaxat ca latenataxanaxac. Qaq 'era da ỹa'aqtac, Aỹem Nataxala'.
17Saishet da choche qauacheetaigui añi qarquiyaqche ca npe'enaxac ca qarỹai. Ỹataqta qoñiỹapega, yaqto' saishet da qanhuañiỹaua'a ca ỹo'ot lle'etaxaloxo.
18Saishet da huo'o ca ipalaique lvi' da ỹe'enaxata'aguet ca qaỹo'otec, qataq saishet da nache queta da nquiỹatega ca lỹa da huo'o ca ỹasouaxat. Nacherata da ỹauotec ca lỹa, 'eeta'am da ỹauotec da maiche nachaalataxac. Qaq 'era da ỹa'aqtac, Aỹem Nataxala'.
19Qauo'oche' qome ne'enaua iqataxaco.
Saishet qome da huo'o ca ỹo'oquiaxanaxana't caua ỹotta'a't na'ate'te, da yaqto' ỹotta'a't na llalec.
Saishet da huo'o ca ima'a't naqa'en aca ỹotta'a't nañiguishe ala da ỹaalec ca lanaxanaqa'.
Saishet da huo'o ca ỹaayiñi caua anogo maye ỹotta'a't aca lo'opi.
20Qaq ca ỹale da lauañi' aca nlata maye mashe nqataxanata da lhua ca lỹa ỹale, qalaxaye ñaq saxanaxa da qaisheenaxana da yaqto' huesoueeguesop da nlataguec, nache iuen da isheeten ca ỹale maye huotaique da lhua acamaye. Qalaxaye saishet da qaỹalaua't caamaye, cha'aye aca'aca 'alo saxanaxa da huesoueeguesop da nlataguec. 21Qaq que'eca ỹale iuen da ỹaneuo ca qagueta lhuaraic da yaqto' lachetaqtaxanaxat maye sa imauaq da qaỹavigaxat, qataq iroua'a ye ñegueuo ñi npe'l. 22Nache ca ntaxaỹaxanaxanec ỹanot Ñim Nataxala' ca qagueta maye nachetaqtaxanaxat, yaqto' qaỹapalaxat ca lasouaxashet que'eca shiỹaxaua.
23Qaq da ivita da qaunoxoñiiua'a que'eca 'alhua, qataq da qaỹa'añiilec aca ỹotta'a't nañiguishe, qo'oipaq maye qanallec ana ala, nache saishet da qauchiqui aca lcoue qataq saishet da qollequi aca la'auaqteguishe ala, cha'aye acamaye saishet da qanallec caua tres vi'iye. 24Qaq da ivireuga ca vi'i cuatro, nache 'enauac aca ala aca'aca nañiguishe qoỹanot Ñim Nataxala', huetoigui qanqoỹen da qaỹo'ot ca ño'oxonnataxanaxac. 25Qaq da ivildec caua cinco vi'iye, nache ishet da qollequi aca ala. Qaq da qoñiitec de'era, nache ỹataqta nquiguec aca ala aca qa'añiguishe qo'oipaq. Qaq 'era da ỹa'aqtac, Aỹem Nataxala' maye Qanatamnaxala'ai.
26Saishet da qollequi ca ñaq huo'o na huetaigui ltago'q.
Saishet da qaua'axachiỹaua'a ca saqcha'a nhuennataxac. Qataq saishet da qaunacheetac ca nqui'i, da yaqto' qaua'axachiỹa'aguet ca saqcha'a lataxac.
27Saishet da huo'o ca npetec na laue, qataq icheguec na lsheenec aca lqa' laue, souaxat da lasouaxac.
28Saishet da huo'o ca ipelectac na lo'oc, qataq da ỹauo'o aca na'are na lo'oc, souaxat da huo'o ca ileu. Qaq 'era da ỹa'aqtac, Aỹem Nataxala'.
29Saishet da 'auamaqtalec aca 'aỹa'ale da nquisheshaxac, souaxat ca qaỹa'amaqteetac, yaqto' saishet da 'enauac ana 'alhua nlaxalec na sa ỹaỹamaxañesat qataq da quishishaxac.
30Ñi 'oonolec ỹataqta huo'o naq 'enec naqa'en ye na'a'q mataxaqui. Qataq saishet da ỹa'ashaxanai' ye atamnaqa' maye ỹanataqa', qaq 'era da ỹa'aqtac, Aỹem Nataxala'.
31Saishet qome da qanqo'oñiỹa ca ltaxaỹaxaua na nqui'ipi, qataq ca ilaviigui ca lỹa, cha'aye ỹo'ot da saishet da qui'itta da qarataxaqui. Qaq 'era da ỹa'aqtac, Aỹem Nataxala' maye Qanatamnaxala'ai.
32Ỹataqta 'anachaañi da 'auqocha'a ca ỹa'axaiquiolec, souaxat da huo'o naq 'enec 'anqa'en. Qataq huo'o naq 'enec 'anqa'en na 'Anatamnaxala'. Qaq 'era da ỹa'aqtac, Aỹem Nataxala'.
33Saishet da qauauo'oi da nque'eenaxac ca ỹaqa'a ca chegaqa'ague maye qami' netaiguilo. 34Nacherata da 'eeta'am da qoñeetec ca maiche qarhuo'oi le'ec da ỹataqta qauauochec camaye, cha'aye nache 'ena'am da qoñiita. Cha'aye nache 'eetec qami' co'ollaq qoviita'a ye Egipto da qauachegoqỹauec. Qaq 'era da ỹa'aqtac, Aỹem Nataxala' maye Qanatamnaxala'ai.
35Saishet da sa ipaigui qanqa'eñi ca ỹoqta 'eesa loga't ca naloqnaxanaxat, huo'otaq aca naloqnaxanaxaqui, qataq aca naloqnaxaqui ca 'etaxat. 36Nacherata da qauo'ogoxoñiỹa aca naloqnaxaqui ca 'etaxat, qataq ca naloqnaxanaxat, qataq aca naloqnaxanaxaqui maye ỹataqta nalochiguiñi da huo'o ca qanaloqten. Qaq 'era da ỹa'aqtac, Aỹem Nataxala' maye Qanatamnaxala'ai maye qami' ñeqateeguesopa co'ollaxa ye Egipto.
37Qaq ỹoqo'oye qoquiiteguelo qome naua lleco naua iqataxaco, qataq naua ỹamaxasoxonaxaco, qataq qaupaquiichiguilo qome. Qaq 'era da ỹa'aqtac, Aỹem Nataxala'.»